Masalimo 25 - Mawu a Mulluku

Davide anaaveka Apwiya wi emuhoollelle nave emuseere

Salimo na Davide.

¹ Kinavelleella murimaaka wa nyu Apwiya.

² Murimaaka muttheene kinahiya va nyu Mullukwaaka, muhinaakhullella wi adanaaka ekiwulliheke muru, muhinaakhullella wi ehakallallelleke ohoosiwa waka.

³ Ddawoona, attheene awuuroromellani ehiwulliwe muru, koma ayo enuukhootani mwaawullihe muru.

⁴ Nyu Apwiya, mukidduwellihe musewaanyu, mukihuddihe ettilla ddanyu.

⁵ Mukihoollelle mu yawoonaanyu nave mukilangize vawi nyu tti Mulluku, oovullusaaka, kinnuuroromellani mallapo mattheene.

⁶ Nyu Apwiya, upuwellani echifundwaanyu ni echikondaanyu yoohisintheya eyo moonihalleenyu waambeella khalle.

⁷ Muhinuupuwella machimo a esombwaaka ni ovudduwa waka koma mukeerelle echifundo, nyu Apwiya ekaamba ya echikondaanyu yoohisintheya vawi nyuwaano tti aphaama.

⁸ Apwiya tti aphaama ni oolungama, ennamuhuddiha oochimwa ettilla ddiwa.

⁹ Ennaahoollella awiiyeviha weera ddoolungama, ennaahuddiha ettilla ddiwa.

¹⁰ Ettilla ddittheddene dda Apwiya tti dda echikondi yoohisintheya, tti ddoororomelleya wa athu oosunga echipanganwiiwa ni malamulwiiwa.

¹¹ Nyu Apwiya, ekaamba ya nnddina nanyu, mukikhululukelle machimwaaka vawi mullatwaaka tti muullupalli.

¹² Ttaani anawoova Apwiya? Yooyo Apwiya eneeromuhuddiha ettilla yawi ayithware.

¹³ Yooyo aneerokhalla ni okumi woohakallalla, edduullu ddaye ddineerewaakhella ellapo wi ekhalle yayiwayayiwa.

¹⁴ Apwiya ennaattana ni oowoova alliwa, ennaadduwelliha echipanganwiiwa.

¹⁵ Miitthwaaka enaweha wa Apwiya enthawi ettheene vawi ennootta manyallwaka munthavini.

¹⁶ Nyu Apwiya, kiweheni, keerelleni echifundo vawi kiri meekha nave koohoosiwa wunchichi.

¹⁷ Ddoohoosa murimaaka ddinimaatave, kivulluseni mu ddoohoosanndda.

¹⁸ Onani ddoohoosa ddaka ni ddookatamiha ddaka, kikhululukelleni machimwaaka mattheene.

¹⁹ Onani waata wa adanaaka, waata wa okiita wiwanko.

²⁰ Tetezani okumaaka nave mukivulluse, muhaakhullelle wi ekiwullihe muru vawi nyu tti woothawella waka.

²¹ Ohilakwa ni echilungamwaaka ddikiteteze vawi kinnuuroromellani.

²² Nyu Mulluku, avulluseni athwaanyu Aisraele mu ddookatamiha ddiwa ddittheddene.