Masalimo 22 - Mawu a Mulluku

Winlla ekaamba ya ddoohoosa ni nchipo nootitimiha

Wa oohoollella wiipa, voottakihani miipello a nchipo na epaalla yoohinase. Salimo na Davide.

¹ Mullukwaaka, Mullukwaaka kaambiiwa tini mukihiyalleenyu? Kaambiiwa tini muhinakikavihereenyu naari vang'ono? Kaambiiwa tini muhiniiweenyu wiipullella waka?

² Mullukwaaka kinnawiithanani orive otthaana koma khamunakaakhulla, kinnawinllellani orive mahiiyu koma nginoopiwa ephevo.

³ Koma nyuwaanothi tti aweella, oyo anakeraatthi va mpando woomwene, oyo anatitimihiwa ni Israele.

⁴ Makhollwaahu yaanuuroromellani nyuwaano, yaanuukhulupililani vawi mwaanaavullusa.

⁵ Yaanawinllellani nave mwaanaavullusa, yaanuuroromellani nave khamwaaphariha nthuwa.

⁶ Koma miyaano tti wonanko enyambo, ngihiyo muthu naari vang'ono, oyo athu enamuvevulliiwa ni omukhoota.

⁷ Attheene ookoona ennakittheya, ennakinyindulla ni otikha miru ddiwa.

⁸ Enallota wi, “Waaroromella Apwiya, Apwiya yaayo yuuvulluse, ewoopollethi vano vawi ennuukonda.”

⁹ Koma tti nyuwaano mwaakhullenlle wi miyaano kiyariwe, nyuwaano sika mwakitetezille kiri vanipelleni na amoowe.

¹⁰ Kookhalla kuuroromellakani nyuwaano ephatuwellwaaka, nyuwaano mookhalla Mullukwaaka ovenyera mvo amoowe yakiyarelliiwa.

¹¹ Muhinakirekamella, vawi ddoohoosa ddookaatamella, khaavo ookikavihera.

¹² Adanaaka anchichi amasiva aakaapheella, aakuupa wonanko anankhoro a enari.

¹³ Aakaatthamella eyano wonanko mukango oyo onathuruma voopaallani okikhaddulla.

¹⁴ Okumaaka wootathiya wonanko maaddi, makhuvaaka mattheene aheengereya, murimaaka tti wonanko nimphora nittotthowille.

¹⁵ Ommilloni waka wohumma wonanko nivalli, nllumi naka nohaangellella onramani. Mookihiya vanthupini wi kikhwelle vaavo.

¹⁶ Athu eekuku aakaapheella wonanko enama ddamuhakani, aaphovolla mattaaka ni manyallwaaka.

¹⁷ Makhuvaaka mattheene eri vaweella koma adanaaka ennakiwehesesa moohakallalla.

¹⁸ Aakawana ddoowara ddaka, ahoombesa va mukanjwaaka.

¹⁹ Koma nyu Apwiya muhinakirekamella, nyu masivaaka, akuvani wi mukikavihere.

²⁰ Vullusani okumaaka onsupadani, kaakihereni muwano mwa enama ddamuhakani.

²¹ Kivulluseni muwano mwa mukango, akiherani okumaaka omanyakani a enari.

²² Kineerewaatthopoollella abalaaka dda nyuwaano, kineerewuutitimihani vamutthukumanoni wa athwaanyu.

²³ Kineerollota wi, “Nyu oowoova Apwiya, atitimiheni nyu attheene edduullu dda Yakobo, ariiheni, nyu attheene Aisraele, avaheni olemu.

²⁴ Vawi kheyaamuvevullalle muthu oohoosiwa, kheyaananariwalle ni ohoosiwa waye. Khemwiipitthihelle ekhoviiwa, koma yaamwiiwa inlleeye.”

²⁵ Kineerewuutitimihani va mutthukumano muullupalli ekaamba ya nnddo mukeerelleenyu. Ddittheddene kalonjezilleemi kineeroddeera vamiitthoni va attheene enawoovani.

²⁶ Oohoosiwa eneerocha ni ovona, oowaashaasha Apwiya eneerewaatitimiha. Mukhalle ni okumi woorekama.

²⁷ Mitundu ddittheddene ddineerowuupuwella Apwiya ni waarukunuwella. Malloko mattheene eneerewaallapella.

²⁸ Vawi olamulello ottheene tti wa Apwiya, alliwa tti mwene a mitundu ddittheddene.

²⁹ Athu attheene eeyuuma eneeromukokhorella. Naari athu attheene ekhwaka ehiworaka osunga okumiiwa koma eneerewaakokhorella, ni ayo ehinawora wiisungella okumiiwa.

³⁰ Edduullu ddamuhoollo ddineerewaarumeyella Apwiya, athu eneerotthopoollella mbado onawooyo dda alliwa.

³¹ Eneerollalleya dda ovullusa waye wa athu ayo ehinayariwe ophiyera ollello, voollotani wi Apwiya sika yaavullusalle athwiiwa.