Masalimo 21 - Mawu a Mulluku

Davide anathokoza ekaamba yowaagonjiha adani

Wa oohoollella wiipa. Salimo na Davide.

¹ Apwiya, mwene annahakallalla kaambiiwa moomuvaha masiva, annathapella wunchichi kaambiiwa moomupambaniha.

² Moomuvaha nnddo murimaaye wapaalliiwa, khamumwiimanne nnddo eyanwaaye yavekilliiwa.

³ Munnaphiya wa mwenooyo ni madaliso aphaama wunchichi, munnamuwariha enduwira yoomwene ya golide aphaama va muru vaye.

⁴ Olliye uuvekilleni okumi, nyuwaano mwaamuvaha okumi woorekama, woohimalla.

⁵ Mwaamupambaniha wi ariiheye wuullupalli, mwaamweeriha wi akhalle ni olemu muullupalli.

⁶ Ddawoona, moomudalisa wa enthawi yoohimalla, moomuhakallalliha ni ophwanyeya wanyu.

⁷ Vallethi mwenooyo annaaroromella Apwiya khanatikheya ekaamba ya echikondi yoohisintheya ya Amasiva Mattheene.

⁸ Aneerewaagonjiha adanaaye attheene, ni nnattanatta naye aneerewaaphara attheene awiitanana.

⁹ Akhumellella, aneerowoononga wonanko munllo wawoopiha. Apwiya eneerewaatthollosa ekaamba yowaallutuwella, eneerewaashellelliha.

¹⁰ Aniiwa eneerewoonongeya va ellapo yavatthi, edduullu ddiwa ddineerotthollowa variyari va athu.

¹¹ Yaaganizeraka omweerella yoonanara ni omuvoreya, ehiwore,

¹² vawi aneeroweeriha wi ethawe, vawaavokhani mipaamba.

¹³ Nyu Apwiya mutitimiheye ekaamba ya masivaanyu, nineerewiipa ni otetheella masivaanyu muullupalli.