Masalimo 19 - Mawu a Mulluku

Otitimiheya wa Mulluku mu ddoophatusiwa ddaye

Wa oohoollella wiipa. Salimo na Davide.

¹ Ddooddullu ddinnallalleya otitimiheya wa Mulluku, omiraponi onnooniha mitteko dda mattaaye.

² Orive otthaana onnatthopoollella ddenndda otthaana woothwarellella, orive mahiiyu onnalleella ddenndda wa mahiiyu oothwarellella.

³ Khenaphariha mutteko ollota mawu, khawiivo okhuwa oniiweya.

⁴ Koma othengiiwa onnavuwa va ellapo yavatthi ettheene, mawiiwaayo ennaphiya wookomella ellapo yavatthi. Mulluku aanimakella nndduwa enyumba muddullummo.

⁵ Nndduwanno ninnakhuma wonanko ootthella oohakallalla, wonanko oodduwella othamaka, ookhozekella mpikisano.

⁶ Ninnakhuma ovenyera waambenlle eddullu, naapheella naphiya okomelle eddullu, kheyiivo ello enaawore othawa oviha wiwa.

⁷ Malangizo a Apwiya tti aphaama wunchichi, ennahihimulla okumi. Omboni wa Apwiya tti woororomelleya, onnaavaha ezeru ayo ehinna.

⁸ Ehuddiho ya Apwiya tti yawoona, ennahakallalliha murima. Malamulo a Apwiya tti aweella, ennaahulla athu miittho.

⁹ Owoova Apwiya tti waphaama, khonamalla. Echiweruzo ya Apwiya tti yawoona wunchichi, tti yoolungama erive enthawi.

¹⁰ Ddenndda tti ddoopaalleya omukhwaranya golide, naari golide aphaama. Tti ddoonang'aneya okhwaranya enwi, ddoondonya ovenyera m'makallaphani mwiwa.

¹¹ Oorumeyellaanyu annahuddihiwa ni malamulwaanyu, vawaasungani annathuviwa wunchichi.

¹² Ttaani anaadduwelle ddoolakwa ddaka? Nyu Apwiya, muhuwe ddoochimwa ddaka ddawiipittheya.

¹³ Muhaakhullelle wi oorumeyellaanyu achimweke phudda ahilamulelliweke ni machimo. Vano kineerokhalla oolungama, ohikhalla ni mullatu wa machimo muullupalli.

¹⁴ Mawaaka ni maganizwaaka yaakhullelleye vamiitthoni vanyu, nyu Apwiya, nlluku naka ni oovullusaaka.