Masalimo 18 - Mawu a Mulluku

Nchipo na Davide aagonjihalle adani

Wa oohoollella wiipa. Salimo na Davide, oorumeyella a Apwiya, awiipelle Apwiya emuvullusalle wa adanaaye attheene owaaka wa Saulo.

¹ Kinnuukondani Apwiya, masivaaka.

² “Apwiya sika nlluku naka, mpandaaka ni oovullusaaka. Alliwa tti Mullukwaaka, nlluku naka kinathawelleemiwo. Sika echishangwaaka, masiva ookivullusa ni yookiipitthihaaka.

³ Kinnavekella wa Apwiya, ayo eri oophwanella otitimihiwa vawi ennakivullusa wa adanaaka.

⁴ Mikwe dda okhwa ddookihuruwella, mihinje ddawoononga ddaakisefukella.

⁵ Onyolo wa mahame waakimaka, millapa dda okhwa ddaakikola.

⁶ Kaawiithana Apwiya mu ddoohoosa ddaka, kaakhuwella wa Mullukwaaka wi akikavihere. Mu enyumbaaye ahiiwa mawaaka, winlla waka waaphiya wa olliye.

⁷ Vano ellapo yavatthi yaatthukumella etikheya, matthipello a miyaango yaatikheya ni orindimuwa, kaambiiwa Apwiya yaasha murima.

⁸ Mphunani mwaye mwaathuwa mwiisi, muwano mwaye mwaanakhuma munllo wawoononga, mallumi amunllo yaari llave, llave!

⁹ Ahaahulla oddullu akittha vatthi, epiphi yoottika yaari vatthi va manyallwaaye.

¹⁰ Aawella va akerubi* avava, aheeta ni ephevo mwawaakuva.

¹¹ Ahiikhuneella ni epiphi yawi phii! Iihuruwella ni mirapo ddoottika dda murimu.

¹² Ovenyera mu owala muhoollo mwaye, okhwaranya mirapo ddoottikanndde, mwaanakhuma marallalla ni mankhalla amunllo.

¹³ Apwiya yaagugudeya ovenyera oddullu, Mulluku Amasiva Mattheene mawaaye yahiiweya.

¹⁴ Aavokha mipaamba ddaye, waapallallesa adanaaye, ahaamolleella ni ettari awiikariha.

¹⁵ Mitthipidda dda enyanja yoowallamella ddahooneya, matthipello a ellapo yavatthi yaakhalla vaweella, Nyu Apwiya mwasimweenyu moowalli, mwavumeenyu mwamasiva ovenyera mphunani mwiwa.

¹⁶ Eri oddullu Apwiya yaattaphurusa nnatta niwa ekiphara, ekiruulla m'maaddini oowallamella.

¹⁷ Yaakivullusa wa adanaaka amasiva, wa attheene ayo yiitana ni miyaano, ayo yaari amasiva okikhwaranya miyaano.

¹⁸ Adanaayo yaakillika miyaano, kaariimi muddoohoosani, koma Apwiya yaakiseera.

¹⁹ Yaakiphiyiha onipuroni namurendelle, yaakivullusa kaambiiwa yaahakallalla ni miyaano.

²⁰ Apwiya yaakithuva moollikana ni echilungamwaaka, yaakidalisa moollikana ni ohichimwa waka.

²¹ Miyaano kaathwara ettilla dda Apwiya, ngaachimwalle voomuhiyani Mullukwaaka.

²² Kahiiwellella malangizwaaye mattheene, malamulwaaye mattheene ngawaatathillalle.

²³ Ngaari ni mullatu vamiitthoni vaye kaanaarapa machimo mu okumaaka.

²⁴ Ella sika ekaambiiwa Apwiya ekithuvelliiwa, moollikana ni echilungamwaaka ni oreera murima waka vamiitthoni viwa.

²⁵ Wa athu oororomelleya, nyu Mulluku munnaddooniha oororomelleya. Wa athu aphaama wunchichi, munnaddooniha aphaama wunchichi.

²⁶ Wa athu ooreera murima, munnaddooniha oreera murima. Koma wa athu oonanara munnaddooniha onanara.

²⁷ Vallethi awiiyeviha munnaavullusa koma awiitukhulla munnaayeviha.

²⁸ Nyu Apwiya, munnakhariha enyalaaka, Mullukwaaka, munnakimolleella mwiipiphini.

²⁹ Ni okikavihera wanyu miyaano ttuugonjiha mulloko wakhoto, ni nyu Mulluku, miyaano ttuullupha esiri ya mpanda.

³⁰ Ettilla dda Mulluku tti ddaphaama wunchichi, mawu a Apwiya tti awoona. Alliwa sika yawiitetezella wa attheene oothawellawo.

³¹ Khaavo Mulluku mmodda koma Apwiyave, khaniivo nlluku nimodda noothawellavo koma Mullukwaahuve.

³² Mullukoolla sika annakivaha masiva, annakivenyihella ddawoopiha muttillani mwaka.

³³ Annallipiha meto ddaka wonanko dda naahe, annakeetiha phaama m'mwaangoni.

³⁴ Annahuddiha mattaaka owana ekhoto, wawi ttuupinda muura wamukoko.

³⁵ Nyuwaano mookiteteza ni yawiitetezellaanyu yoovullusa. Nnattanatta nanyu nookiseera, mookiwelliha ni nikavihero nanyu.

³⁶ Mooramballalliha ettillaaka wi keete phaama, sika manyallwaaka kheyaaserenguwalle.

³⁷ Kahaathwara mutulli adanaaka nave kahaaphwanya, ngaahokollowille ophiyera kahaatthollosa.

³⁸ Kahaaphoriiha wawi kheyaahihimuwallettho, kahaanyingallella ni manyallwaaka.

³⁹ Vallethi tti nyu mwakivahille masiva oowanella ekhoto, tti nyu mwakigonjihelle athu ookiwukila.

⁴⁰ Nyu sika mwawiikanre adanaaka wi ethawe, ayo yiitana ni miyaano kaawoononga.

⁴¹ Yaakhuwa koma khaarivo naari mmodda aavullusalle, yaawinllella Apwiya koma kheyaawaakhullalle.

⁴² Kahaasillasilla wonanko nthupi noovava ni ephevo, kahaanyingallella wonanko matokwi a m'musewuni.

⁴³ Mwaakivullusa wa oollipana ni miyaano, mwaakitthattusa mwene a mitundu, sika athu oohaadduwella yaanakirumeyella.

⁴⁴ Yiiwalle mawaaka yahaamba okiiwellella, athu a ellapo ddimodda yaananiwaramella.

⁴⁵ Athu a mitundu ddimodda yaatathilla murima yaakhuma m'mipandani mwiwa etthukumellaka.

⁴⁶ Apwiya tti ookumi! Nititimiheye nlluku naka, ariiheye Mullukwaaka, ookivullusaka!

⁴⁷ Mulluku sika akikavihere wi kihokolloselle ddoonanara ni ogonjiha mitundu ddimodda.

⁴⁸ Nyu sika mwakivullusalle wa adanaaka, mwaakiwelliha okhwaranya ookiwukila, mwaakaakihera wa athu eekuku.

⁴⁹ Sika Apwiya, kineerewuutitimihani variyari va mitundu, kineerowiipa machipo ootitimiha nnddina nanyu.

⁵⁰ Mulluku annamupambaniha wunchichi mwenaaye, annooniha echikondaaye yoohisintheya wa oozoziwaaye,* wa Davide ni edduullu ddaye wa enthawi yoohimalla.”