Masalimo 17 - Mawu a Mulluku

Ovekella wa muthu oohilakwa

Salimo na Davide.

¹ Nyu Apwiya, iwani ovekella wa oolungama, apellani maaru winlla waka, iwani ovekella wa oohoottha.

² Ohilakwa waka moonihelle vaweella, mwaaweeruzaka, miitthwaanyu yoone echilungamo.

³ Naari mweese murimaaka, khaya okiwehesesa mahiiyu, naari mukitthurumelle mwawiidde, khamukiphwanya ni mullatu, vayanoni vaka khavinallota yoonanara.

⁴ Voohipwathani makhallello a athu amodda, kinniiwellella mawu a muwano mwanyu, nginathwara ettilla dda athu awaanganyera.

⁵ Koothwara phaama ettilla ddanyu ddittheddene, nginaserenguweke naari vang'ono.

⁶ Kinaveka wa nyu Mulluku, kaambiiwa munnakaakhulla, kaapelleni maaru wi mwiiwe mawaaka.

⁷ Onihani echikondaanyu yoohisintheya vaweerani ddoottikhiniha, nyuwaano munnaavullusa ni nnattanatta nanyu namasiva, attheene ayo enawa wa nyuwaano yaawaathawaka adaniiwa.

⁸ Mukipwathe wonanko niittho nanyu, mukikhupaarelle ni muuphellwaanyu,

⁹ ehikoone athu oonanara, adanaaka awoopiha ayo enakaapheella.

¹⁰ Ahummiha mirima ddiwa, ennallota mwawiitukhulla.

¹¹ Ennakithwarathwara manyallo, ennakaapheella, ennakiweha wi ekiphwanyelle ettilla yookikuhella.

¹² Tti wonanko mukango oyo onapaalla okikhaddulla, oyo okiipitthenlle.

¹³ Nyu Apwiya venyani, mukumanena wi mwaagonjihe. Mukivulluse wa oonanaraalla ni nsupada nanyu.

¹⁴ Nyu Apwiya ni nnatta nanyu mukaakihere wa adani, wa athu ayo okumiiwa ori ni erive ello eyo enapaalliiwa. Mwaallake ni ddoohoosa nnddo mwaasungenlleenyu, aniiwa ekhallena ddinchichi, alliwattho yaahiyere aniiwa.

¹⁵ Koma miyaano ni echilungamwaaka, kineerewoona ekhovaanyu. Kineerohakallalla ni mooneeyellwaanyu kavenya.