Masalimo 148 - Mawu a MullukuOlleella ddoophatusiwa wi ddaatitimihe Apwiya 1 Aleluya! Atitimiheni Apwiya ovenyera oddullu, nyu ookhalla muddullu, atitimiheni! 2 Nyu angelwiiwa attheene, atitimiheni, nyu akhotwiiwa attheene ooddullu, atitimiheni! 3 Nyu nndduwa ni mweeri, atitimiheni, nyu etheneeri ddittheddene ddoowala, atitimiheni! 4 Nyu mirapo ddamuddullu, nyu maaddi amuddullu, atitimiheni! 5 Ddittheddenennddo ddititimihe nnddina na Apwiya! Vallethi yaalamula nave ddaaphatusiwa. 6 Yaaddikeraatthiha wi ddikhalle wa enthawi yoohimalla, yaahiyavo lamulo nno ninaaworeye osintheya. 7 Atitimiheni Apwiya ovenyera va ellapo yavatthi, nyu enama ddawoopiha ddam'maaddini ni enyanja ddittheddene ddoowallamella, 8 nyu munllo ni marallalla, nyu nakhuttu ni mirapo, nyu ephevo ddawoopiha ddawiiwellella malamulwiiwa, 9 nyu miyaango ni asimiyaango ddittheddene, nyu miteekho dda ezipaso ni mikunguza ddittheddene, 10 nyu enama ddamuhakani ni eziweto ddittheddene, nyu ddeko ddawaapadda ni epallame ddoovava! 11 Atitimiheni Apwiya, nyu mamwene a va ellapo yavatthi ni athu a mitundu ddittheddene, nyu attekweene ni oolamulella ellapo yavatthi! 12 Nyu asombwe ni anamwalli, nyu awuulluvalla ni anamwaneene! 13 Attheenaayo yaatitimihe Apwiya, vawi nnddina niwave nenno tti nooriiheya, ntitimiho niwa tti nookhwaranya vatthimva ni muddullu mwene. 14 Apwiya ahaawelliha athwiiwa vawaavahani masiva, ahaariiha athwiiwa attheene oororomelleya, Aisraele ayo enaakondiiwa. Aleluya! |
The Bible in Elhomwe © The Bible Society of Malawi, 2019.
Bible Society of Malawi