Masalimo 147 - Mawu a Mulluku

Waatitimiha Apwiya Amasiva Mattheene

¹ Aleluya! Tti waphaama wiipa machipo oomutitimiha Mullukwaahu, tti woohakallalliha ni waphaama waatitimiha.

² Apwiya ennamumakattho Yerusalemu, ennaatthukumaniha Aisraele oopallalleya.

³ Ennaachiriha athu a murima woovoreya, ennaamaka makhwatiiwa.

⁴ Ennaganizella dda waata wa etheneeri, ennaddivaha manddina ddittheddene.

⁵ Apwiyaahu tti uullupalli, tti amasiva manchichi, ezeru ddiwa khaddinna vookomella.

⁶ Ennaawelliha oonyingallelliwa, koma ennaakitthiha athu oonanara.

⁷ Wiipelleni Apwiya moothokoza, mwiipelleni Mullukwaahu nchipo ni zeze,

⁸ ayo enahuruwella eddullu ni mirapo, enarupihella ethaya murimu, enamelliha manasi vamwaangoni,

⁹ ayo enavaha yoocha wa enama ni wa asaana a anakhuku yaawinllellaka yoocha.

¹⁰ Masiva a akavalo khenaaddivella, ekophollo dda akhoto kheddinaahakallalliha,

¹¹ koma Apwiya ennahakallalla ni athu oowoova, ayo enatiyera echikondiiwa yoohisintheya.

¹² We Yerusalemu, atitimihe Apwiya, we Ziyoni, muriihe Mullukwaawo.

¹³ Vallethi ennallipiha mikoko dda millako ddawo, ennaadalisa athu ayo eri mwa weyaano.

¹⁴ Ennawaana murendelle m'malireni a ellapwaawo, ennuuvoniha ni tirigu aphaama.

¹⁵ Ennavelleella lamulo va ellapo yavatthi, mawiiwa enneeta mwawaakuva.

¹⁶ Ennammoriha nakhuttu aweella wonanko nthoche, ennamwara echifunga wonanko ntuura,

¹⁷ ennamoriha marallalla wonanko malluku. Ethiyo ttaani anaawore ovillella oriirya wiwa?

¹⁸ Yalamula wi ddivenyevo, ddinnattotthowa, yoopiha ephevo, maaddi enneeta.

¹⁹ Ennamudduwelliha Yakobo mawiiwa, ennamuhuddiha Israele malamulwiiwa ni malangizwiiwa.

²⁰ Kheyaaweerille nndda wa athu a mitundu ddimodda sika kheyaadduwella malangizwiiwa. Aleluya!