Masalimo 146 - Mawu a Mulluku

Nchipo nowaatitimiha Apwiya oovullusa

¹ Aleluya! We murimaaka, atitimihe Apwiya.

² Kineerewaatitimiha Apwiya mu okumaaka muttheene, kineerewiipa machipo oomutitimiha Mullukwaaka, enthawi ettheene kakhalla mukumi.

³ Muhinaaroromellaka mamwene apaalle athu amodda ayo ehinawora ovullusa.

⁴ Mpweya wa muthu wakhumamo muttheene, muthooyo annahokollweella o ethaya, nllapo nenno ddoolinga ddaye ddinnamalla.

⁵ Oodalisiwa tti muthu oyo nikavihero naye ninavenyera wa Mulluku a Yakobo, oyo etiyerellwaaye eri va Apwiya Mullukwaaye,

⁶ oophatusa oddullu ni ellapo yavatthi, enyanja ni ddittheddene ddiri mwemmo. Ennasunga malonjezwiiwa enthawi ettheene,

⁷ ennaweerella ddoolungama athu oonyingallelliwa, ennaavaha yoocha athu eettalla. Apwiya ennaattaphulla a mundende,

⁸ ennahulla miittho a athu oohoona. Apwiya ennaawelliha athu ookitthihiwa, ennaakonda oolungama.

⁹ Apwiya ennaateteza alleto, ennamuseera naamukhwelle ni mukhwaadduni, koma ettilla dda athu oonanara ennaddivirikaniha.

¹⁰ Apwiya eneerokhalla mwene wa enthawi yoohimalla, we Ziyoni, Mullukwaawo aneerolamulella wa mibado ddittheddene. Aleluya!