Masalimo 145 - Mawu a Mulluku

Nchipo nootitimiha

Salimo na Davide.

¹ Nyu Mullukwaaka, mwene, kineerewuutitimihani, kineeroriiha nnddina nanyu wa enthawi yoohimalla.

² Kineerewuuthokozani nllapo ni nllapo, kineeroriiha nnddina nanyu wa enthawi yoohimalla.

³ Apwiya tti uullupalli, oophwanella otitimihiwa wunchichi, wunnuwa wiwa tti wookatamiha owiiwesesa.

⁴ Mbado oneerotitimiha mitteko ddanyu wa mbado mmodda, oneerollalleya ddaweera ddanyu ddamasiva.

⁵ Kineeroganizera dda ntitimiho nanyu, dda omwenaanyu muullupalli, dda mitteko ddanyu ddoottikhiniha.

⁶ Athu eneerollota dda masiva a mitteko ddanyu ddawoopiha, miyaanottho kineerollalleya dda ottekweenaanyu.

⁷ Eneerovuwiha dda ophaamaanyu, eneerewiipa otitimiha echilungamwaanyu.

⁸ Apwiya tti eechifundo ni ooreera murima, oohisha murima mwawaakuva, ooddalla ni echikondi yoohisintheya

⁹ Apwiya tti aphaama wa attheene, ennaddeerella echifundo ddittheddene yaddiphatusalliiwa.

¹⁰ Nyu Apwiya, ddoophatusiwa ddanyu ddittheddene ddineerewuutitihani, athwaanyu attheene oororomelleya eneerewuuriihani.

¹¹ Eneerollota dda ntitimiho na omwenaaye, eneerotthopoolla dda masivaanyu

¹² wi yaadduwellihe athu attheene dda mitteko ddanyu ddamasiva ni dda ntitimiho na omwenaanyu muullupalli.

¹³ Omwenaanyu tti omwene wa enthawi yoohimalla, olamulellwaanyu tti wa mibado ddittheddene. Apwiya tti oororomelleya va mawiiwa mattheene, tti eechifundo va ddaweera ddiwa ddittheddene.

¹⁴ Apwiya ennaaseera attheene enamora, ennaawelliha attheene ookitthihiwa.

¹⁵ Miittho a awuutiyerani nyu Apwiya, munnaavaha yoocha va enthawiiwa.

¹⁶ Munnattaphulla nnatta nanyu, munnakwakhwanihella erive yookumi yoopaalliiwa.

¹⁷ Apwiya tti oolungama mu ettilla ddiwa ddittheddene, tti eechifundo mu ddaweera ddiwa ddittheddene.

¹⁸ Apwiya eri vakhuviru ni attheene ayo enawiithana, ayo enawiithana mwawoona.

¹⁹ Ayo enawoova Apwiya ennavahiwa ddoopaalla ddiwa, ennawiiwa winlla wiwa, ennaavullusa.

²⁰ Apwiya ennaateteza attheene owaakonda koma oonanara attheene eneerowoononga.

²¹ Vayanoni vaka vineerewaatitimiha Apwiya, ddookumi ddittheddene ddineeroriiha nnddina niwa naweella wa enthawi yoohimalla.