Masalimo 144 - Mawu a Mulluku

Mwene anaathokoza Apwiya ekaamba ya opambana vakhotoni

Salimo na Davide.

¹ Etitimiheye Apwiya, nlluku naka, ayo enahuddiha mattaaka ni eyaalla ddaka owana ekhoto.

² Tti oororomelleyaaka ni woothawellawo waka, mpandaaka wookivullusa ni echishangwaaka yoothawellawo, ennahiya mitundu dda athu vatthi va olamulellwaaka.

³ Nyu Apwiya, “Muthu ttaani wi mumuupuwelleke? Muthu ttaani wi mumpwatheke?”

⁴ Muthu ari wonanko mpweya, mallapwaaye tti wonanko muuthuuchi woohillekella.

⁵ Nyu Apwiya, hullani mirapo wi mukitthe ttannyani miyaango wi ddithuwe mwiisi.

⁶ Sheremihani ettari wi mwaamware adanaaka, vokhani mavakaanyu wi muwiikarihe.

⁷ Ttaphurusani nnatta nanyu ovenyera oddullu, kaakhiheni, kiruulleni o maaddi oowallamella, koopolleni m'mattani mwa athu a mitundu ddimodda,

⁸ ayo enallota ddawoottha, enallupella moolleka.

⁹ Nyu Mulluku kineerowiipellani nchipo nanaanweene, kineerowiipellani echida ya enthambo khumi.

¹⁰ Nyuwaano munnaapambaniha mamwene vakhotoni, munnamwaakhiha Davide oorumeyellaanyu onsupadani.

¹¹ Kivulluseni m'mattani mwa athu a mitundu ddimodda, ayo enallota ddawoottha, enallupella moolleka.

¹² Aniihu aallopwana veesombweni viwa ekhalle amasiva wonanko miteekho. Aniihu aatthiyana ekhalle ooreera wonanko apoto ooreerihiwa a enyumba yoomwene.

¹³ Ekhokwe ddahu ddikhalle ddooddalla, ddisunge ddoohata dda orive mutundu. Enkhosa ddahu ddaarelle asaana ooheerengeya m'makhollani mwahu.

¹⁴ Eng'ombe ddahu ddikhalle ni mapelle, ddihivudde apaalle olephela oyara. M'misewuni mwahu muhikhalle winlla ekaamba ya ddookatamiha.

¹⁵ Oodalisiwa tti athu awaakhella madaliso yaalla, woodalisiwa tti mutundu ayo Mullukwiiwa tti Apwiya.