Masalimo 143 - Mawu a Mulluku

Nivekello na nikavihero

Salimo na Davide.

¹ Nyu Apwiya, iwani oveka waka, kireyeni maaru wi mwiiwe nivekello naka, Mukaakhulle ekaamba ya ororomelleya wanyu ni echilungamwaanyu.

² Muhinakiipa mullatu mi oorumeyellaanyu vawi khaavo muthu mukumi oyo ari oolungama vamiitthoni vanyu.

³ Mudanaaka ookithwara manyallo oonyingallella okumaaka muthayani. Ookikeraatthiha mwiipiphini wonanko muthu oyo akhwille khalle.

⁴ Sika murimaaka woofooka muwari mwaka, m'murimani mwaka mooddalla woova.

⁵ Kinnuupuwella mallapo akhalle, kinnaganizera dda ddittheddene muddeerilleenyu, mitteko dda mattaanyu.

⁶ Kinnattaphurusella mattaaka wa nyuwaano, murimaaka onnavolliwa nthona nawuupaallani, mmo muneerella ellapo yawumma.

⁷ Nyu Apwiya, akuvani okaakhulla, kootathilla murima wunchichi. Muhiniipitthiha ekhovaanyu, woova wi kinaaphwanaphwane ni ookitthella o mahame.

⁸ Ohinase mukiiwihe dda echikondaanyu yoohisintheya, kaambiiwa kinnuuroromellani. Mukitthoonyihelle ettilla yawi keetemo, vawi kinnavelleella murimaaka wa nyuwaano.

⁹ Nyu Apwiya, kivulluseni wa adanaaka, koothawella wa nyuwaano.

¹⁰ Kihuddiheni weera ddoopaalla ddanyu vawi nyuwaano tti Mullukwaaka. Munepaanyu waphaama okihoollelle va yoomwaramwarelliwa phaama.

¹¹ Nyu Apwiya, sungani okumaaka, ekaamba ya nnddina nanyu. Mukiruulle mu ddookatamiha ekaamba ya echilungamwaanyu.

¹² Attholloseni adanaaka ekaamba ya echikondaanyu yoohisintheya va miyaano. Muwoononge attheene ookihoosa, ekaamba ya miyaano oorumeyellaanyu.