Masalimo 140 - Mawu a Mulluku

Nivekello na echitetezo

Wa oohoollella wiipa. Salimo na Davide.

¹ Nyu Apwiya, kivulluseni wa athu oonanara, kaakihereni wa athu eekuku.

² Alliwa ennaganizella yoonanara m'murimani mwiwa ennaambiha okangana enthawi ettheene.

³ Ennaandusa nllumi niwa wi nikhalle wonanko na enowa, muwano mwiwa mookhalla nttipwi na enowa ya namarawe.

⁴ Nyu Apwiya, kitetezeni wa athu oonanara, kaakhihereni wa athu eekuku, ayo enaganiza ddookikuha.

⁵ Athu awiitukhulla aakireya musampha mwawiipittheya, nikwekwe, millapa mukhwipi mwa ettilla.

⁶ Kinnaalleella Apwiya wi, “Nyu tti Mullukwaaka.” Nyu Apwiya, kireyeni maaru wi mwiiwe ovekella waka.

⁷ Nyu Apwiya, Apwiyaaka, oovullusaaka amasiva, mooteteza okumaaka va nllapo neekhoto.

⁸ Nyu Apwiya, muhinamuvaha muthu oonanara ddoopaalla ddaye, muhinamukavihera echiwembwaaye.

⁹ Adanaaka ookaapheella ehikigonjihe, mawiiwa ootembelela yaarukunuwelle.

¹⁰ Mankhalla amunllo yaamorelle, evokhelliwe m'mallitini oowallamella, ehikhumemottho.

¹¹ Muhaakhullelle wi avayanoni akeraattheye mu ellapo, yoonanara emuthwareke muthu eekuku ophiyera emoonongille.

¹² Nyu Apwiya kinnadduwella wi munnaateteza oohoosiwa, munnaweeruza mweechilungamo athu oopaneya.

¹³ Ddawoona, athu oolungama eneerewuutitimihani, eneerokhalla vamiitthoni vanyu.