Masalimo 139 - Mawu a Mulluku

Apwiya annadduwella ni opwatha ddittheddene

Wa oohoollella wiipa. Salimo na Davide.

¹ Nyu Apwiya mooheesa murimaaka nave mookidduwella

² Munnadduwella kaakeraatthiki, kaavenyaka, munnadduwella maganizwaaka muri wuuteete.

³ Munnakiwehesesa kaaweetaka, kaakonaka, munnadduwella ettilla ddaka ddittheddene.

⁴ Naari mawu ehinaphiye vayanoni vaka, nyu Apwiya, munnaadduwella mattheene.

⁵ Munnakaapheella mutulli ni muhoollo, munnatukhullella nnatta nanyu va miyaano.

⁶ Ezeru ddenndda tti ddookittikhiniha, tti ddoowallamella, ngiwora oddiphiyera.

⁷ Kinaaye wuuwi voopaallani wiitta munepaanyu, voopaallani othawa ekhovaanyu?

⁸ Kawella oddullu, nyu muri wenko, kakonaatthi mu ellapo ya ookhwa, nyu muri mwemmo.

⁹ Kavavella wookhuma nndduwa, apaalle woovollowa nndduwa, wookomella enyanja,

¹⁰ naari wenkottho muneerokihoollella, nnattanatta nanyu nineerokiseera.

¹¹ Kallota wi, “Epiphi ekihuruwelle, owala okaapheelle otthattuwe mahiiyu,”

¹² epipheeyo, wa nyuwaano khe epipittho, wa nyuwaano mahiiyu tti wonanko otthaana, epiphi tti wonanko owala.

¹³ Valle tti nyuwaano mwapangille dda muwari mwaka, mwaakoopa m'murimani mwa amoowaaka.

¹⁴ Nyu awoopiha ni oottikhiniha, kinnuutitimihani, munnakidduwellesesa phaama, mitteko ddanyu tti ddoottikhiniha, murimaaka onnayidduwella yeella.

¹⁵ Ngaavittheyille vamiitthoni vanyu, kapangiweemi moovittheya, koopiweemi mweeruso m'mirimani mwa amoowaaka.

¹⁶ Miitthwaanyu yaakoona kihinayariwe, mallapo a okumaaka yaalembiwa munibukhuni mwanyu, ehinaambe ni weerengiwa wene.

¹⁷ Nyu Mulluku, maganizwaanyu tti oowallamella wa miyaano, tti ooheerengeya naari vang'ono.

¹⁸ Kaweerengilleke, ddaano eri manchichi okhwaranya mihava, kaavenyaka kinakhallave ni nyuwaano.

¹⁹ Nyu Mulluku, wakhalla wooworeya woonongeni athu oonanara, kivenyiherenivoni athu oomoriha nikhame.

²⁰ Athwaayo ennuullotellani ddeko ddoonanara, adanaanyu ennaromolla nnddina nanyu mwawoottha.

²¹ Nyu Apwiya, ethiyo kihiitanena athu ayo eniitana ni nyuwaano? Ethiyo kihinanariwe ni ayo enuuwukilani?

²² Kinniitanana wiitanawiitana, kinnaweesa adanaaka.

²³ Nyu Apwiya, ashaashani wi mudduwelle murimaaka, keeseni wi mudduwelle maganizwaaka.

²⁴ Moone kaarimi kithwaraka erive ettilla yoonanara, mukihoollelle mu ettillaanyu yoohimalla.