Masalimo 138 - Mawu a Mulluku

Nivekello noothokoza

Salimo na Davide.

¹ Nyu Apwiya, kinnuuthokozani ni murimaaka muttheene ni wiipa machipo awuutitimihani vamiitthoni va milluku.

² Kinnakokhora moowarama, owiitthoni wa enyumbaanyu yaweella. Kinnatitimiha nnddina nanyu ekaamba ya echikondaanyu yoohisintheya ekaambattho ya ororomelleya wanyu. Mohunnuwiha nnddina nanyu navettho mawaanyu aakhwaranya erive ello.

³ Va nllapo nne kawiitthanneemini mwaakaakhulla, munnakillipiha murima ni masivaanyu.

⁴ Nyu Apwiya, mamwene mattheene eneerewuutitimihani, kaambiiwa ahiiwa mawu avayanoni vanyu.

⁵ Eneerewiipa machipo ootitimiha ettilla dda Apwiya vawi ntitimiho na Apwiya tti nuullupalli.

⁶ Naari Apwiya tti avaddullu ennaapwatha athu oovevuwa, ennaadduwella athu awiitukhulla eri vuutete.

⁷ Naari keete variyari va ddookatamiha, nyu, munnasunga okumaaka. Munnattaphurusa nnatta nanyu waahiiha adanaaka oosha murima, nnattanatta nanyu ninnakivullusa.

⁸ Apwiya eneerewoonesesa wi yoolingiiwa va miyaano yoheereya, Nyu Apwiya, echikondaanyu tti yoohisintheya, mukhwaranyihe mutteko mwaambilleenyooyo.