Masalimo 137 - Mawu a Mulluku

Okhupanya wa Aisraele mu ellapo yeelleto

¹ Mukhwipi mwa mihinje dda Babiloni, wenko naakeraatthi vatthi, nininlla nuupuwellaka o Ziyoni.

² Wenko naatthomeya magitaalaahu, vamiteekhoni dda nnjalle.

³ Wenko ooniphara okaporo yaaniveka wi niipe nchipo, oonihoosa yaaniwatihera wi nihakallalle voollotani wi, “Nganiipelleni machipo a o Ziyoni.”

⁴ Vano hiyaano naallota wi, “Ninaawiipe mwawiidde machipo a Apwiya, wuno o ellapo yeelleto?”

⁵ Kuutiwalla we Yerusalemu, nnattanatta naka numme.

⁶ Nllumi naka niwanddeellelle muddullu mwa muwano mwaka, kaahiwuupuwella we Yerusalemu ni owoona wi weyaano tti ookihakallalliha wunchichi.

⁷ Nyu Apwiya, upuwellani nndde yeerille Aedomu va nllapo nawoonongeya wa Yerusalemu, valle yallotiiwa wi, “Mukumulleni Yerusalemu, mukumulleni Yerusalemu, ophiyera vamatthipello vaye.”

⁸ We muzinda wa Babiloni, oneerewoonongiwa, oodalisiwa tti oyo anaawuhokolloselle ddoonanara nndda oneerelleewe.

⁹ Oodalisiwa tti oyo anaawaphare aniinyu a m'mattani ni waanyenya vamallukuni.