Masalimo 135 - Mawu a Mulluku

Nchipo nootitimiha

Salimo na Davide.

¹ Aleluya! Titimihani nnddina na Apwiya. Nyu oorumeyella a Apwiya, atitimiheni,

² nyu oorumeyella mu enyumba ya Apwiya, m'mathatoni a enyumba ya Mullukwaahu!

³ Atitimiheni Apwiya vawi tti aphaama, ipani machipo ootitimiha nnddina niwa, vawi tti noohakallalliha wunchichi.

⁴ Ahiitthoollella Yakobo wi akhalle ayiwa, Israele wi akhalle yoohallaniiwa.

⁵ Vawi kinnadduwella wi Apwiya tti uullupalli, Apwiya aakhwaranya milluku ddittheddene.

⁶ Erive ello Apwiya enapaalliiwa weera enneera oddullu ni va ellapo yavatthi, mu enyanja ni moowallamella mutthemwene.

⁷ Tti alliwa enakhumiha mirapo wookomella ellapo yavatthi, enasherimiha ettari wi eweena murimu, enoopiha ephevo ovenyera mu moosungellamo mwiwa.

⁸ Tti alliwa yawiiphalle anamwani awaamba a o Iguputo, a athu ni a enama ddene.

⁹ Tti alliwa yamoonihelle Farao ni oorumeyellaaye attheene ezizindikiro ddamasiva ni ddoottikhiniha mu Iguputo.

¹⁰ Tti alliwa yoonongille mitundu ddinchichi dda athu, owiipha mamwene amasiva,

¹¹ Sihoni mwene Aamori, Ogi mwene a o Bashani ni mamwene mattheene a o Kanani.

¹² Aneerovelleella ellapwiiwa wi ekhalle yoohallana, yoohallana ya athwiiwa Aisraele.

¹³ Nyu Apwiya nnddina nanyu, tti na enthawi yoohimalla, athu a mibado ddittheddene eneerowuupuwellani.

¹⁴ Vawi Apwiya eneerokamulla wi athwiiwa kheyinna mullatu, eneeroweerella echifundo alliwa.

¹⁵ Mafano a mitundu ddimodda dda athu tti asiliva ni agolide, tti mitteko dda matta a athu.

¹⁶ Aakhalla ni eyano koma khenallota, aakhalla ni miittho koma khenoona.

¹⁷ Aakhalla ni maaru koma kheniiwa, khenna mpweya.

¹⁸ Athu ayo enapanga mafanwaayo ephwanaphwanena, emoddamoddave yeeyo ayo enaaroromella.

¹⁹ Nyu a munibanjani na Israele, atitimiheni Apwiya! Nyu a munibanjani na Aroni, atitimiheni Apwiya!

²⁰ Nyu a munibanjani na Levi, atitimiheni Apwiya! Nyu attheene munawoova Apwiya, atitimiheni!

²¹ Edaliseye Apwiya ovenyera o Ziyoni, ayo enakhalla o Yerusalemu! Aleluya!