Masalimo 132 - Mawu a Mulluku

Otitimiha enyumba ya Apwiya

Nchipo na Davide nawiipiwa voowellani o Yerusalemu.

¹ Nyu Apwiya, muupuwelleni Davide ni ddookatamiha ddittheddene nnddo avillenlleeye.

² Aallupella wa Apwiya, aalonjeza wa Amasiva Mattheene a Yakobo wi,

³ “Ngivollowa mpa mwaka, apaalle okona vabedini vaka,

⁴ ngaakhullella okona apaalle okwindima

⁵ ophiyera kaaphwanyenlle Apwiya nipuro, mookhalla Amasiva Mattheene a Yakobo.”

⁶ Nahiiwa dda nibokosi na echipangano o Efurata, naaniphwanya mu emata dda o Yaara.

⁷ Hankoni niye onipuroni Apwiya enakhalliiwawo, naallapelle woonyingallavo manyallwiiwa.

⁸ Nyu Apwiya venyani, muye onipuroni nanyu nawiithuuwellawo, nyu ni nibokosi na echipangano, echizindikiro ya masivaanyu.

⁹ Allupa mukuthwaanyu ekhalle eechilungamo, oororomelleyaanyu ekhuwe moohakallalla.

¹⁰ Ekaamba ya oorumeyellaanyu Davide, muhimureye etulli oozoziwaanyu.*

¹¹ Apwiya yaamullupellella Davide moomusimikizella wi khewa esintha, yaallota wi, “Kineeromukeraatthiha va mpando woomwene mmodda a edduullu ddawo.

¹² Edduullu ddawo ddasunga echipanganwaaka ni malamulwaaka ayo kinaddihuddiheemi, edduullu ddiwattho ddineerokhalla va mpandwaawo woomwene wa enthawi yoohimalla.”

¹³ Apwiya aamutthoolla Ziyoni, enapaallesesa wi akhalle nipuro niwa nookhallamo.

¹⁴ Yaallota wi, “Nenna sika nipuro naka nawiithuuwellamo wa enthawi yoohimalla, kinaakhalle weewuno kaambiiwa koopaallesesawo.

¹⁵ Kineeromudalisa wunchichi Ziyoni, vawuuvahani ddoopaalla ddiwa. Athwaaye oohoowa, kineerewaavaha ddoocha ddookwakhwanella.

¹⁶ Allupa mukuthwaaye kineerewaawariha ovullusa oororomelleyaaye eneerokhuwa moohakallalla.

¹⁷ Davide kineeromuphuwelliha nnyaka wenko, koomukhozella enyali oozoziwaaka.

¹⁸ Adanaaye kineerewaawariha owulliwa muru, koma olliye aneerowarihiwa enduwira yoonyezimella.”