Masalimo 12 - Mawu a Mulluku

Ovekella wa nikavihero

Wa oohoollella wiipa, voopharihani mutteko ezida dda enthambo dditthanu ni ddiraru. Salimo na Davide.

¹ Apwiya, kikavihereni, vawi khaavo muthu anuupwathani, khaavo oororomelleya variyari vahu.

² Arive muthu annamoottottha mukhwaaye, anniisha nllumi naye, annallota ni murima mmodda.

³ Apwiya, tiyellani eyano ddittheddene ddawoottha, hiihani nirive nllumi nawiitukhulla.

⁴ Vallethi athu yaalla enallota wi, “Nineeropambana ekaamba ya nllumi nahu, eyano nookhallana, vano anaanigonjihe ttaani?”

⁵ Ekaamba yawi oohoowa ahaakhiwa ddayiwa, oorama ddeko ennakhupanya, Apwiya enallota wi, “Vano kineerohiyavo nnatta naka, kineerewaavullusa mmo enapaallelliiwa.”

⁶ Mawu a Apwiya tti aweella, wonanko siliva aweekiwa phaama, aweellihiwa otthanu ni opiilli.

⁷ Apwiya niseereni, nikhupaarelleni wa athu yaalla wa enthawi yoohimalla.

⁸ Athu oonanara emmoona weeteeta virive veko, athu ennatetheella ddoonanara ddiwa.