Masalimo 119 - Mawu a Mulluku

Malamulo a Apwiya

¹ Oodala tti ayo meetellwiiwa ehinna yoochimwa, ayo eneeta moothwara malamulo a Apwiya.

² Oodala tti ayo enasunga malamulo a Apwiya, ayo enawaashaasha ni murimiiwa muttheene,

³ ayo ehinalakwa, koma eneeta mu ettilla ddiwa.

⁴ Moovelleella malamulwaanyu, moolamula wi ethwariwe moororomelleya.

⁵ Waphaama meetellwaaka yaariki oohitikheya, vawiiwellellani malamulwaanyu.

⁶ Vano ngiwulliwa muru, kathwara malamulwaanyu mattheene.

⁷ Kineerewuutitimihani vaweerani ddoophwanellella, voohudderani malangizwaanyu oolungama.

⁸ Kineerothwara malamulwaanyu, muhiwe mukihiya meekha.

Wiiwellella malamulo a Apwiya

⁹ Ethiyo musombwe ttuusunga mwawiidde makhallellwaaye wi akhalle aweella? Vowaapwathani moollikana ni mawaanyu.

¹⁰ Kinnawaashaashani ni murimaaka muttheene, muhaakhullelle wi kihollowe ohiya malamulwaanyu.

¹¹ Kohaasunga mawaanyu m'murimani mwaka wi kihuuchimwelleni.

¹² Nyu Apwiya, mutitimiheye, kihuddiheni malamulwaanyu.

¹³ Kinnallalleya ni eyanwaaka mawu a muwano mwanyu.

¹⁴ Weeta mu ettilla ya malamulwaanyu onnakihakallalliha okhwaranya okhalla ni eyuuma yinchichi.

¹⁵ Kineeroganiza dda malamulwaanyu, kineeropwatha ettilla ddanyu.

¹⁶ Kineerohakallalla ni malamulwaanyu, mawaanyu ngiwa kaatiwalla.

Ohakallalla wa oosunga malamulo a Apwiya

¹⁷ Keerelleni echifundo mi oorumeyellaanyu wi kikhalle ni okumi ni osunga malamulwaanyu.

¹⁸ Hullani miitthwaaka wi koone ddoottikhiniha ddoovenyera mu malamulwaanyu.

¹⁹ Mi tti mulleto mu ellapo yavatthi, muhikiipitthihelle malamulwaanyu.

²⁰ Murimaaka woofooka ekaamba yoopaalla malangizwaanyu enthawi ettheene.

²¹ Nyuwaano munnaahumullulla awiitukhulla, ootembeleliwa tti ayo enahiya malamulwaanyu.

²² Mukivenyihelle ddoovevulla ni ddookinyemulla ddiwa, kaambiiwa koosunga ombonaanyu.

²³ Naari enduna ddikipanganenlle ddoonanara, mi oorumeyellaanyu, kineerekoganizerave malamulwaanyu.

²⁴ Ombonaanyu onnakihakallalliha, tti yooyo onakilangiza.

Opaallesesa wiiwellella malamulo a Apwiya

²⁵ Kinalluwella vanthupini, kihokolloselleni okumaaka moollikana ni mawaanyu.

²⁶ Katthoponlleemi dda ettilla ddaka, nyuwaano mwaakaakhulla, kihuddiheni malamulwaanyu.

²⁷ Kikavihereni wiiwesesa malamulwaanyu, kineeroganizera ddoottikhiniha ddanyu.

²⁸ Kookhumuwa ekaamba ya ethakaraka, killipiheni moollikana ni mawaanyu.

²⁹ Muhikeetihe mu ettilla ddookhoromana, mukeerelle echifundo vookihuddihani malamulwaanyu.

³⁰ Miyaano kootthoolla wi kikhalleke oororomelleya, kohaasunga malamulwaanyu m'murimani mwaka.

³¹ Nyu Apwiya, kinnawanddeellella malamulwaanyu, muhaakhullelle wi kiwullihiwe muru.

³² Kineerothwara moohakallalla ettilla dda malamulwaanyu, mwakoonjerera ezeru.

Nivekello na ezeru

³³ Nyu Apwiya kihuddiheni ettilla ya malamulwaanyu, kineeroddithwara ophiyera omamallihello.

³⁴ Kivaheni ezeru wi kisungeke malamulwaanyu, kaathwareke ni murimaaka muttheene.

³⁵ Kihoollelleni mu ettilla ya malamulwaanyu, kaambiiwa kinnahakallallana.

³⁶ Keeriheni wi kikondeke malamulwaanyu, woohikhalla eyuuma.

³⁷ Hiihani miitthwaaka wi ehiweheke etthiru, kivaheni okumi moollikana ni mmo mwalonjezelleenyu.

³⁸ Mukisimikezelle mi oorumeyellaanyu mawaanyu, eyo munaweerelleenyu athu oowoovani.

³⁹ Mukivenyihelle epewe eyo kinayooveemi kaambiiwa malangizwaanyu tti aphaama.

⁴⁰ Ngoonani kinnakhallella munkhella malamulwaanyu, mukivahe okumi kaambiiwa nyuwaano tti oolungama.

Ororomella malamulo a Apwiya

⁴¹ Apwiya, koonihelleni echikondaanyu yoohisintheya, kivulluseni moollikana ni mawaanyu.

⁴² Vaavo kineerokhalla ni yoowaakhulla athu ookinyemulla, vawi kinnakhulupilila mawaanyu.

⁴³ Muhikivenyihelle vayanoni vaka mawaanyu awoona naari vang'ono, vawi kinnatiyerella malangizwaanyu.

⁴⁴ Kineerothwara malamulwaanyu wa enthawi yoohimalla.

⁴⁵ Kineereweeta mwamurendelle, kaambiiwa kinnapwatha malamulwaanyu.

⁴⁶ Kineerollota omboni vamiitthoni va mamwene, ngiwulliwa muru.

⁴⁷ Kinnahakallallana malamulwaanyu ayo kinaakondeemi.

⁴⁸ Kinnariiha malamulwaanyu ayo kinaakondeemi, kineeroganizera dda malangizwaanyu.

Okhulupilila malamulo a Apwiya

⁴⁹ Upuwellani mawaanyu wa mi oorumeyellaanyu, mawu ayo enakivaha etiyerello.

⁵⁰ Enakihakallalliha mu ddookatamiha ddaka tti yawi malonjezwaanyu tti oovaha okumi.

⁵¹ Athu awiitukhulla ennakivevulla wunchichi, koma nginahiyanana malamulwaanyu.

⁵² Nyu Apwiya, kaganizera malamulwaanyu akhallekhalle, ennakikhurumusa murima.

⁵³ Kinnasha murima wunchichi ekaamba ya oonanara ayo ehinathwara malamulwaanyu.

⁵⁴ Malamulwaanyu aatthattuwa echipwaaka orive weko kinayeemi.

⁵⁵ Nyu Apwiya, kinnuupuwella nnddina nanyu mahiiyu, kinnathwara malamulwaanyu.

⁵⁶ Madaliso yaalla tti aaka, vawi kinnathwara malamulwaanyu.

Wiivelleella o malamulo a Apwiya

⁵⁷ Nyu Apwiya sika yoohallanaaka, kinnalonjeza wiiwellella mawaanyu.

⁵⁸ Kinnuuvekani ni murimaaka muttheene, mukeerelle echifundo moollikana ni mawaanyu.

⁵⁹ Kaaganizellaka ettilla ddaka, kinnarukunuwa wi kithware malamulwaanyu.

⁶⁰ Kinnaakuva wunchichi, nginaselliwa othwara malamulwaanyu.

⁶¹ Naari athu oonanara ekireyille musampha, ngitiwalla malamulwaanyu.

⁶² Kinnavenya mahiiyu wi kuutitimiheni, ekaamba ya malangizwaanyu oolungama.

⁶³ Mi tti mukhwiiwa a oowoovani, athu oothwara malamulwaanyu.

⁶⁴ Nyu Apwiya, ellapo yavatthi yooddalla ni echikondaanyu yoohisintheya, kihuddiheni malamulwaanyu.

Oreera wa malamulo a Apwiya

⁶⁵ Nyu Apwiya, mookeerella echifundo mi oorumeyellaanyu moollikana ni mawaanyu.

⁶⁶ Kivaheni ezeru ni wiiwesesa kaambiiwa kinnakhulupilila malamulwaanyu.

⁶⁷ Kihinaambe ollakeya kaanahollowa, koma vano kinniiwellella mawaanyu.

⁶⁸ Nyuwaano tti ooreera murima, ddaweera ddanyu tti ddaphaama, kihuddiheni malamulwaanyu.

⁶⁹ Athu awiitukhulla yaakootthera, koma kinnathwara malamulwaanyu ni murimaaka muttheene.

⁷⁰ Athu awi ddiidda khenaganiza phaama, koma miyaano kinnahakallalla ni malamulwaanyu.

⁷¹ Tti waphaama wi kaallakiwa wi kihuddere malamulwaanyu.

⁷² Malamulo avayanoni vanyu ennakiddivella okhwaranya golide ni siliva.

Echilungamo ya malamulo a Apwiya

⁷³ Mattaanyu yaakipanga nave yaakoopa, kivaheni wiiwesesa wi kihuddereke malamulwaanyu.

⁷⁴ Athu oowoovani eneerokoona nave eneerohakallalla, vawi koororomella mawaanyu.

⁷⁵ Nyu Apwiya kinnadduwella wi echiweruzwaanyu tti yoolungama moollikana ni ororomelleya wanyu.

⁷⁶ Echikondaanyu yoohisintheya ennakikhurumusa murima mi oorumeyellaanyu, moollikana ni mmo mwalonjezelleenyu.

⁷⁷ Mukeerelle echifundo wi kikhalle ni okumi vawi malamulwaanyu ennakihakallalliha.

⁷⁸ Athu awiitukhulla mwaawullihe muru kaambiiwa aakilakwella vookoottherani. Koma kineeroganizera dda malamulwaanyu.

⁷⁹ Athu oowoovani ewe wa miyaano wi ehuddere malamulwaanyu.

⁸⁰ Murimaaka ohikhalle ni yoolakwa va malamulwaanyu wi kihiwulliwe muru.

Nivekello na ovullusiwa

⁸¹ Okumaaka woofooka vootiyerani ovullusa wanyu, koma kinnaroromella mawaanyu

⁸² Miitthwaaka aafiira vooweherani malonjezwaanyu, kinnakoha wi, ethiyo munaakikhurumuse murima niini?

⁸³ Kootthattuwa nthumba nanttapara noothuwella, komave ngitiwalla malamulwaanyu.

⁸⁴ Ethiyo mi oorumeyellaanyu kivillelle ophiyera niini? Ethiyo athu ookihoosa munaawaallake niini?

⁸⁵ Athu awiitukhulla, oohithwara malamulwaanyu, aakikatella nlliti.

⁸⁶ Malamulwaanyu mattheene tti oororomelleya, athwaayo ennakihoosa ni woottha wiwa, kikavihereni!

⁸⁷ Yahanlle vang'ono okivenyiha va ellapo yavatthi, komave ngihiya othwara malamulwaanyu.

⁸⁸ Tetezani okumaaka ekaamba ya echikondaanyu yoohisintheya, wi kithware malamulo avayanoni vanyu.

Ororomella malamulo a Apwiya

⁸⁹ Nyu Apwiya, mawaanyu tti ookeraattheya oddullu wa enthawi yoohimalla.

⁹⁰ Ororomelleya wanyu onnakhalla wa mibado ddittheddene, nyuwaano mookeraatthiha ellapo nave khenatikheya.

⁹¹ Ddoophatusiwa ddinnaphwanyeya ollello ekaamba ya olamula wanyu, sika ddinnuurumeyellani.

⁹² Malamulwaanyu yahikihakallallihalleke, ddaano koonongeyille ni ddoohoosa ddaka.

⁹³ Ngiwa kitiwalla malangizwaanyu, vawi mookivahana okumi.

⁹⁴ Mi tti aanyu, kivulluseni vawi koopwatha malamulwaanyu.

⁹⁵ Athu oonanara aakiipitthella wi ekiiphe koma miyaano kinnaganizera dda malamulwaanyu.

⁹⁶ Koodduwella wi ddaphaama ddittheddene ddookhalla ni mamallihellwiiwa koma malamulwaanyu khenamalla.

Okonda malamulo a Apwiya

⁹⁷ Kinnakonda malamulwaanyu wunchichi, kinnaaganizera nllapo nittheene.

⁹⁸ Malamulwaanyu ennakivaha ezeru waakhwaranya adanaaka vawi kinnakhallana enthawi ettheene.

⁹⁹ Kinniiwesesa waakhwaranya ahuddihaka attheene, vawi kinnaganizera dda malamulwaanyu.

¹⁰⁰ Kookhalla ni ezeru waakhwaranya attekweene vawi kinnathwara malamulwaanyu.

¹⁰¹ Kinnahiiha meto ddaka mu ettilla yoonanara, wi kisungeke mawaanyu.

¹⁰² Nginahiyanana malangizwaanyu vawi nyuwaano mwaakihuddiha.

¹⁰³ Mawaanyu tti oonang'aneya wunchichi kaallawiha, ennaddiva okhwaranya enwi muwano mwaka.

¹⁰⁴ Kinnaphwanya ezeru ekaamba ya malamulwaanyu sika kinniitana ni erive ettilla yoolleka.

Malamulo a Apwiya ennamolleella

¹⁰⁵ Mawaanyu tti enyali ya omanyalloni waka, ennamolleella ettillaaka.

¹⁰⁶ Koollupella nave koosimikiza wi kiiwellelle malangizwaanyu oolungama.

¹⁰⁷ Koohoosiwa wunchichi, nyu Apwiya, kivaheni okumi moollikana ni mawaanyu.

¹⁰⁸ Nyu Apwiya, akhellani mavekellwaaka oothokoza, mukihuddihe malangizwaanyu.

¹⁰⁹ Okumaaka ori mu ddawoopiha enthawi ettheene komave nginatiwalla malamulwaanyu.

¹¹⁰ Athu oonanara aakireya musampha, komave ngihollowa ohiya ettilla ya malamulwaanyu.

¹¹¹ Malamulwaanyu tti yoohallanaaka yoohimalla, ddawoona, enahakallalliha murimaaka.

¹¹² Koohiyavo murimaaka wi okondeke malamulwaanyu enthawi ettheene.

Malamulo a Apwiya ennamuvullusa muthu

¹¹³ Kinniitanana a mirima miilli, koma kinnakonda mawaanyu.

¹¹⁴ Nyuwaano tti mwawiipitthamo mwaka, echishangwaaka kinnaroromella mawaanyu.

¹¹⁵ Nyu aweera ddoonanara kivenyerenivoni wi miyaano kithwareke malamulo a Mullukwaaka.

¹¹⁶ Kiseereni moollikana ni mawaanyu wi kikhalleke ni okumi, kihiwulliwe muru va yootiyerellaaka.

¹¹⁷ Kiseereni wi kivulluwe wi kithwareke malamulwaanyu enthawi ettheene.

¹¹⁸ Munnaakhoota athu attheene oohiiwellella malamulwaanyu, ddawoona, ochenjera wiwa tti woohikhalla ni mutteko.

¹¹⁹ Athu attheene a va ellapo yavatthi, munaweesa wonanko ddavaddallani, sika ekaambiiwa kinakondelleemi malamulwaanyu.

¹²⁰ Mwiillaaka onnatthukumella ekaamba yoowoovani, kinnoova echiweruzwaanyu.

Wiiwellella malamulo a Apwiya

¹²¹ Koheera nnddo ddiri ddoolungama nave ddaphaama, muhikihiye m'mattani mwa ookihoosa.

¹²² Kilonjezeni wi muneerokeerella ddaphaama mi oorumeyellaanyu, muhinaakhullella wi athu awiitukhulla ekihoose.

¹²³ Miitthwaaka aatopa ekaamba yootiyerella ovullusa wanyu, okwakhwanihiwa wa malonjezwaanyu oolungama.

¹²⁴ Keerelleni echifundo mi oorumeyellaanyu, ekaamba ya echikondaanyu yoohisintheya, mukihuddihe malamulwaanyu.

¹²⁵ Mi tti oorumeyellaanyu mukivahe wiiwesesa wi kidduwelleke malamulwaanyu.

¹²⁶ Nyu Apwiya yookwakhwana enthawi yawi mweerevo ello vawi athu aatathilla malamulwaanyu.

¹²⁷ Koma miyaano kinnapwatha malamulwaanyu omukhwaranya golide, golide aphaama.

¹²⁸ Malamulwaanyu mattheene ennookollella meetellwaaka, kinniitana ni erive ettilla yoolleka.

Opaallesesa wiiwellella malamulo a Apwiya

¹²⁹ Malamulwaanyu tti aphaama, sika ekaambiiwa kinaathwareemi ni murimaaka muttheene.

¹³⁰ Otthopoollella mawaanyu onakhalla wonanko owala, onnavaha ezeru wa athu oohikhalla ni ezeru.

¹³¹ Kinnavumella muddullu kaatthamille kaambiiwa kinnapaalla malamulwaanyu.

¹³² Kiwehereni nave mukeerelle echifundo moollikana ni mmo munaweerelleenyu athu awuukondani.

¹³³ Seerani meetellwaaka moollikana ni mawaanywaalle, muhinaakhullella wi nirive nichimo nikilamulelleke.

¹³⁴ Kivulluseni wa athu ookihoosa wi kithwareke malamulwaanyu.

¹³⁵ Walihani ekhovaanyu va mi oorumeyellaanyu, mukihuddihe malamulwaanyu.

¹³⁶ Miitthwaaka ennetellella miitthori wonanko muhinje, kaambiiwa athu khenathwara malamulwaanyu.

Echilungamo ya malamulo a Apwiya

¹³⁷ Nyu Apwiya, muri oolungama, echiweruzwaanyu tti yoolungama.

¹³⁸ Malamulo munivahilleenyu, tti oolungama nave oororomelleya.

¹³⁹ Osha murima waka onnakhara wonanko munllo m'murimani mwaka, kaambiiwa adanaaka ennatiwalla mawaanyu.

¹⁴⁰ Mawaanyu tti oosimikizeya, mi oorumeyellaanyu kinnaakonda.

¹⁴¹ Mi tti mung'onong'ono nave oovevuwa komave nginatiwalla malamulwaanyu.

¹⁴² Echilungamwaanyu tti ya enthawi yoohimalla, malamulwaanyu tti awoona.

¹⁴³ Ddookatamiha ni ddoovoreya ddookimorella, koma malamulwaanyu ennakihakallalliha.

¹⁴⁴ Malamulwaanyu tti oolungama wa enthawi yoohimalla, kivaheni ddawiiwesesa wi kikhalle ni okumi.

Nivekello na ovullusa

¹⁴⁵ Kinninllella wa nyuwaano ni murimaaka muttheene, nyu Apwiya kaakhulleni wi kithwareke malamulwaanyu.

¹⁴⁶ Kinnawinllellani, kivulluseni wi kithwareke malamulwaanyu.

¹⁴⁷ Kinnavenya mutthupi ohininlle, wi kiveke nikavihero. Kinnaroromella mawaanyu.

¹⁴⁸ Nginakona mahiiyu mattheene, oganizera dda mawaanyu.

¹⁴⁹ Iwani mawaaka ekaamba ya echikondaanyu yoohisintheya. Nyu Apwiya, sungani okumaaka ekaamba ya echilungamwaanyu.

¹⁵⁰ Athu eekuku ookihoosa ennaatamella, aarekamellana malamulwaanyu.

¹⁵¹ Koma nyu Apwiya muri vakhuviru, malamulwaanyu mattheene tti awoona.

¹⁵² Kaadduwella mawaanyu ovenyera khalle wi mwahaakeraatthiha wa enthawi yoohimalla.

Nivekello na ovullusiwa

¹⁵³ Wehani ohoosiwa waka, kaakihereni vawi nginatiwalla malamulwaanyu.

¹⁵⁴ Mukikavihere va mullatwaaka, mukoopolle mukivahe okumi moollikana ni mawaanyu.

¹⁵⁵ Ovullusiwa ori wuuteete ni athu oonanara, vawi khenaashaasha malamulwaanyu.

¹⁵⁶ Nyu Apwiya echifundwaanyu tti yuullupalli, kivaheni okumi moollikana ni echiweruzwaanyu.

¹⁵⁷ Athu ookihoosa navettho adanaaka tti anchichi, koma ngihiyanana malamulwaanyu.

¹⁵⁸ Ddinnakinanara kaawaawehaka athu oohiroromelleya vawi khenathwara malamulwaanyu.

¹⁵⁹ Ngoonani mmo kinakondelleemi malamulwaanyu, kivaheni okumi moollikana ni echikondaanyu yoohisintheya.

¹⁶⁰ Mawaanyu tti awoonesesa, malamulwaanyu mattheene oolungama tti a enthawi yoohimalla.

Wiivelleella o malamulo a Apwiya

¹⁶¹ Oolamulella ennakihoosa vihiri ekaamba koma murimaaka onnoova mawaanyu.

¹⁶² Kinnahakallalla ni mawaanyu wonanko muthu aakhille ddinchichi.

¹⁶³ Kinniitana ni onanariwana woottha koma kinnakonda malamulwaanyu.

¹⁶⁴ Kinnuutitimihani otthanu ni wiilli vanllaponi ekaamba ya malamulwaanyu oolungama.

¹⁶⁵ Ookonda malamulwaanyu aakhalla ni murendelle wawaata, khenna yawaakwakwatuwiha.

¹⁶⁶ Nyu Apwiya, kinnatiyerella evulluswaanyu, kinnakwakhwaniha malamulwaanyu.

¹⁶⁷ Kinnathwara malamulwaanyu vawi kinnaakonda ni murimaaka muttheene.

¹⁶⁸ Kinnathwara malamulwaanyu ni malangizwaanyu vawi makhallellwaaka mattheene munnawoona.

Nivekello na okaviheriwa

¹⁶⁹ Apwiya winlla waka wiiweye wa nyuwaano, mukivahe wiiwesesa moollikana ni mawaanyu.

¹⁷⁰ Oveka waka wiiweye wa nyuwaano, mukivulluse moollikana ni mawaanyu.

¹⁷¹ Vayanoni vaka vineerewuutitimihani kaambiiwa munnakihuddiha malamulwaanyu.

¹⁷² Nllumi naka niipe dda mawaanyu, vawi malamulwaanyu mattheene tti oolungama.

¹⁷³ Nnatta nanyu nikikavihere vawi kootthoolla malamulwaanyu.

¹⁷⁴ Nyu Apwiya, kinnapaalla ovullusa wanyu, malamulwaanyu ennakihakallalliha.

¹⁷⁵ Kivaheni okumi wi kuutitimihekeni, kikaviheriwe ni malangizwaanyu.

¹⁷⁶ Koohollowa wonanko enkhosa yoorimeella, kaashaasheni mi oorumeyellaanyu vawi nginatiwalla malamulwaanyu.