Masalimo 118 - Mawu a Mulluku

Nivekello noothokoza ekaamba ya opambana

¹ Athokozeni Apwiya kaambiiwa tti aphaama, echikondiiwa yoohisintheya tti ya enthawi yoohimalla.

² Aisraele ellote wi, “Echikondiiwa yoohisintheya tti ya enthawi yoohimalla.”

³ Nibanja na Aroni nillote wi, “Echikondiiwa yoohisintheya tti ya enthawi yoohimalla.”

⁴ Athu oowoova Apwiya ellote wi, “Echikondiiwa yoohisintheya tti ya enthawi yoohimalla.”

⁵ Kaariimi moopaneya kaavekella wa Apwiya, alliwa yaakittaphulla.

⁶ Apwiya yakhalla o embalaaka, ngoova. Muthu ttuukeerella tini?

⁷ Apwiya eri o embalaaka wi ekikavihere, kineerewaaweha adanaaka kaapambanille.

⁸ Othawella wa Apwiya tti waphaama okhwaranya omuroromella muthu.

⁹ Othawella wa Apwiya tti waphaama, okhwaranya ororomella enduna.

¹⁰ Adani anchichi yaakaapheella, koma kaawoononga ni masiva a Apwiya.

¹¹ Yaakaapheella, ddawoona, yaakaapheella embali ddittheddene, koma kahaagonjiha ni masiva a Apwiya.

¹² Yaakaapheella wonanko enwi, koma yaathiima mwawaakuva wonanko munllo wamiiwa, kaawoononga ni masiva a Apwiya.

¹³ Yaakikakha wunchichi wawi kahanlle vang'ono wiikuha, koma Apwiya yaakikavihera.

¹⁴ Apwiya tti masivaaka ni ekophollo ddaka, alliwa tti oovullusaaka.

¹⁵ Iwani machipo oohakallalla m'misasani dda athu oolungama awi, “Nnattanatta na Apwiya ninnagonjiha mwamasiva,

¹⁶ Nnattanatta na Apwiya noopambana, nnattanatta na Apwiya ninnagonjiha mwamasiva.”

¹⁷ Ngikhwa, kineerokhalla ni okumi, kineerollalleya mitteko dda Apwiya.

¹⁸ Apwiya yaakillaka mwawoopiha, koma kheyaawaakhullelle wi kikhwe.

¹⁹ Kihullelleni millako dda echilungamo wi kivollowemo kaathokoze Apwiya.

²⁰ Nndda sika millako dda Apwiya, oolungamave sika enaavollowemo.

²¹ Kinnuuthokozani vawi mookaakhulla, mootthattuwa oovullusaaka.

²² Nlluku nno nakhootiwe ni oomaka enyumba nenna naakhalla nlluku noopaalleya.

²³ Apwiya sika yeerille ddenndda, ddenndda tti ddoottikhiniha vamiitthoni vahu.

²⁴ Ollello tti nllapo nno Apwiya yanipangilliiwa, hankoni nithapelle, nihakallalle va nllapo nenna.

²⁵ Nyu Apwiya, ninimuuvekani, nivulluseni. Apwiya ninimuuvekani wi ddeko ddineetelle phaama.

²⁶ Oodalisiwa tti oyo anawa mu nnddina na Apwiya. Ninnudalisani ovenyera mu enyumba ya Apwiya.

²⁷ Apwiya sika Mulluku, oonivaha owala. Ambani olendo wa ehakallallo, mukusalle enthambi m'mattani mwanyu ophiyera muphiyalle o nikuwa na mukutho.

²⁸ Nyuwaano tti Mullukwaaka, kineerewuuthokozani, nyuwaano tti Mullukwaaka, kineerewuutitimihani.

²⁹ Athokozeni Apwiya vawi tti aphaama, echikondiiwa yoohisintheya tti ya enthawi yoohimalla.