Masalimo 116 - Mawu a Mulluku

Muthu oovulluwa wuukhwaani anaatitimiha Apwiya

¹ Kinnaakonda Apwiya ekaamba yawi enniiwa mawaaka kaavekellaka.

² Vawi alliwa ennakireya naaru, kineerekewaaveka okumaaka muttheene.

³ Misampha dda okhwa ddaakaapheella, ddawoopiha dda ellapo ya ookhwa ddaakimorella, kahoona ddookatamiha, kaamoriwa ethakaraka.

⁴ Vano kahiithana nnddina na Apwiya wi, “Apwiya kinnuuvekani, Akiherani okumaaka.”

⁵ Apwiya tti ooreera murima ni oolungama, Mullukwaahu tti eechifundo.

⁶ Apwiya ennaateteza athu awiiyeviha, kamorelleemi mu ddookatamiha, alliwa yaakivullusa.

⁷ We murimaaka, hokollweella onipuroni nawo nawiithuuwellawo, kaambiiwa Apwiya aaweerella ddaphaama.

⁸ Vawi nyu Apwiya, mookivullusa wuukhwaani, mooheeriha miitthori ddaka wi ddihimore, mookiteteza wi kihikwakwatuwe.

⁹ Kinneeta vamiitthoni va Apwiya, mu ellapo ya athu ookumi.

¹⁰ Kaakhulupililave naari kalloteemi wi, “Koohoowa mwawoopiha.”

¹¹ Kooveemi, kaallota wi, “Athu tti oohiroromelleya.”

¹² Kinaawaahokolloselle tini Apwiya, va ddaphaama ddittheddene nnddo ekeerelliiwa?

¹³ Kineeromutukhullella muddullu kapu a ovullusa wiwa, kineerovekella vooromollani nnddina na Apwiya.

¹⁴ Kineereweera nnddo kallupenlleemi wa Apwiya vamiitthoni va athwiiwa attheene.

¹⁵ Okhwa wa athu oororomelleya a Apwiya, tti woowallamella mutengo vamiitthoni viwa.

¹⁶ Nyu Apwiya, miyaano tti oorumeyellaanyu, oorumeyella, mwaana a mullupa muttekwaanyu aamutthiyana. Nyuwaano mookittaphulla onyolwaaka,

¹⁷ kineerovelleella mukutho woothokoza, kineerovekella vooromollani nnddina nanyu.

¹⁸ Kineereweera nnddo kallupenlleemi wa Apwiya vamiitthoni va athwiiwa attheene,

¹⁹ m'mathatoni a enyumba ya Apwiya, mu muzinda wa Yerusalemu. Aleluya!