Masalimo 115 - Mawu a Mulluku

Mulluku mmodda awoona

¹ Wa hiyaano iyaayi, Apwiya, wa hiyaano iyaayi, koma nnddina nanyuve nititimihiwe, ekaamba ya echikondi yoohisintheya ni oororomelleya.

² Kaambiiwa tini mitundu ddimodda ddinaallotekiiwa wi “Mullukwiiwa ari wuuwi?”

³ Mullukwaahu ari oddullu, anneera erive ello anapaalleeye.

⁴ Mafanwiiwa tti asiliva ni agolide, mitteko dda matta a athu.

⁵ Aakhalla ni eyano koma khenallota, aakhalla ni miittho koma khenoona.

⁶ Aakhalla ni maaru koma kheniiwa, aakhalla ni ephuna koma kheniimurya.

⁷ Aakhalla ni matta koma yattannya ello kheyiivo eniiwiiwa, aakhalla ni meto koma kheneeta, khenakhumiha mawu naari vang'ono okohi wiwa.

⁸ Athu ayo enapanga mafanwaayo ephwanaphwanena, emoddamoddave yeeyo ayo enaaroromella.

⁹ We Israele, aroromelle Apwiya, Apwiya sika awuukaviheraawo ni awuutetezaawo.

¹⁰ We nibanja na Aroni aroromelle Apwiya, Apwiya sika awuukaviheraawo ni awuutetezaawo.

¹¹ Nyu ayo munawoova Apwiya, aroromelleni, Apwiya sika awuukaviherani ni awuutetezanani.

¹² Apwiya aanuupuwella nave eneeronidalisa, eneerewaadalisa athu a Israele, eneerodalisa nibanja na Aroni.

¹³ Eneerewaadalisa ayo enawoova, ang'onong'ono ni uullupalliine.

¹⁴ Apwiya yuuruuwiheni nyuwaano ni edduullu ddanyu.

¹⁵ Yuudaliseni Apwiya, ayo yaphatusalle oddullu ni ellapo yavatthi.

¹⁶ Oddullu tti wa Apwiya, koma ellapo yavatthi aayivaha wa athu.

¹⁷ Ookhwa khenaatitimiha Apwiya ookitthella o ellapo yoomaalleya khenaariiha.

¹⁸ Koma hiyaano nineerewaatitimiha Apwiya, waambeella ollello wa enthawi yoohimalla. Aleluya.