Masalimo 111 - Mawu a Mulluku

Waatitimiha Apwiya

¹ Aleluya! Kineerewaathokoza Apwiya ni murimaaka muttheene, va mutthukumano wa athu oolungama.

² Mitteko dda Apwiya tti dduullupalli, attheene oohakallallana ennaddiganizera.

³ Mitteko ddiwa tti ddoolemu ni ddoomwene, echilungamwaaye tti wa enthawi yoohimalla.

⁴ Ennanuupusa ddoottikhiniha ddiwa, Apwiya tti ooreera murima ni eechifundo.

⁵ Ennavaha yoocha athu oowoova, ennuupuwella echipanganwiiwa enthawi ettheene.

⁶ Ennawoonihella athwiiwa masiva a mitteko ddiwa, vawaavahani yoohallana ya athu a mitundu ddimodda.

⁷ Mitteko dda mattiiwa tti ddawoona ni ddoolungama, Malamulwiiwa mattheene tti oororomelleya.

⁸ Tti ookeraattheya wa enthawi yoohimalla, yahaavelleella ni murima wawoona ni woolungama.

⁹ Yahaavullusa athwiiwa, yaakeraatthiha echipanganwiiwa wi ekhalle ya enthawi yoohimalla. Nnddina niwa tti naweella ni nawoopiha.

¹⁰ Owoova Apwiya tti waamba wa ezeru, oothwara malamulwiiwa annakhalla ni odduwella. Apwiya tti ootitimiheya wa enthawi yoohimalla.