Masalimo 109 - Mawu a Mulluku

Okhupanya wa muthu a mu ddookatamiha

Wa ooholleella wiipa. Salimo na Davide.

¹ Nyu Mulluku, ootitimiheyaaka, muheere ellapo tuu!

² Athu oonanara ni awoottha, ennallota ddookiwukila, ennallota ddookootthera.

³ Virive veko ennakillotella mawu ookiita, ennakillika vihiri ekaamba.

⁴ Munipuroni mwa echikondaaka, naari kaavekellellaka, alliwa ennakivaanyiha.

⁵ Sika ennakihokollosella ddoonanara munipuroni mwa ddaphaama. Ennakoonihella wiitana muniporoni mwa echikondi.

⁶ Mutthoolleni muthu oonanara wi amuvaanyihe ookiwukilooyo, mmodda mwa adanaaye amuhumullulle.

⁷ Voomweeruzani aphwanyeye ni mullatu, mavekellwaaye ekhalle wonanko machimo.

⁸ Mallapwaaye ekhalle aweerengeya, mmodda akuse muttekwaaye.

⁹ Anaaye ekhalle akhwaadduni, awariye ekhalle anaamukhwelle.

¹⁰ Anaaye ekhalle aweeteeta ni oovekaveka, yiikarihiwe m'matepeni enakhalliiwamo.

¹¹ Ookongoliha makobiri aphare ddittheddene ariiyena, alleto yaakhe nnddo aphwanyilleeye ni mitteko ddaye.

¹² Ahikhallevo naari mmodda anaamoonihelle oreera murima, anaaweerelle echifundo akhwaaddunaaye.

¹³ Edduullu ddaye dditthollowe, nnddina niwa nihiiweyettho mu mbado waneepiilli.

¹⁴ Apwiya ehitiwalle ddoonanara dda makhollwaaye, machimo a amennya ehivuhellelleye.

¹⁵ Apwiya ehikhululuke machimwiiwa wa enthawi yoohimalla, Koma athwaayo etiwalleye va ellapo yavatthi.

¹⁶ Vawi muthooyo khaawuupuwelle weera echifundo, koma ahaahoosa ni owiipha oohoowa, oopaneya ni ookatamihiwa m'murimani.

¹⁷ Aanakonda otembelela, sika matembelelo emmorelle. Khaaddivelliwe waadalisa athu amodda, sika madaliso ekhalle woorekemella ni olliye.

¹⁸ Waatembelela akhwaaye waari wonanko yoowaraaye, sika matembelelo emunaanihe wonanko maaddi, ekhalle wonanko makhura oovollowa m'makhuvani mwaye.

¹⁹ Matembelelwaaye ekhalle wonanko mukanjo wawiikhuneellana, wonanko laamba oomumakella nllapo ni nllapo.

²⁰ Ddenndda ddikhalle mallivello oovenyera wa Apwiya waamorella ookootthera, ddaamorelle ayo enallota ddoonanariha okumaaka.

²¹ Koma nyu Apwiya, Mullukwaaka, mukiseere ekaamba ya nnddina nanyu, mukivulluse vawi echikondaanyu yoohisintheya tti yaphaama.

²² Vawi miyaano kiri oohoowa, oopaneya ni ookatamihiwa m'murimani

²³ Kineerorimeella wonanko muuthuuchi wa misikuwa, koottatthiwa wonanko muddope.

²⁴ Makutthaaka aavelleveddeya ekaamba ya ohalla ocha,* mwiillaaka wohoonda ekaamba yoorama makhura.

²⁵ Ookootthera ennakinyemulla, yakoona ennatikha miru ddiwa.

²⁶ Kikavihereni Apwiya Mullukwaaka, kivulluseni moollikana ni echikondaanyu yoohisintheya.

²⁷ Adanaaka edduwelle wi nenno tti nnatta nanyu, wi tti nyuwaano, Apwiya, mweerille ddenndda.

²⁸ Alliwa etembelele koma nyuwaano mukidalise, ookillika mwaawullihe muru koma mi oorumeyellaanyu kihakallalle.

²⁹ Ookivaanyihana evevuwe, owulliwa muru wiwa waahuruwelle wonanko yoowara.

³⁰ Kineerewaathokoza Apwiya wunchichi ni vayanoni vaka, kineerewaatitimiha variyari va mutthukumano wa athu.

³¹ Apwiya enniimella onnattanatta na muthu oopaneya, omuvullusa wa athu ookamulla wi wiiphiwe.