Masalimo 108 - Mawu a Mulluku

Nivekello na nikavihero voollipanani ni adani

Nchipo. Salimo na Davide.

¹ Nyu Mulluku, murimaaka wookeraattheyesesa, kineerewiipa nchipo nawuutitimihani. We murimaaka venya!

² Nyu zeze ni gitala, inllani! Kineerovenyiha nndduwa ni nchipo naka.

³ Nyu Apwiya, kineerewuuthokozani variyari va mitundu dda athu. Kineerewiipa machipo awuutitimihani variyari va athu a mu ellapo ettheene.

⁴ Echikondaanyu yoohisintheya tti yuullupalli okhwaranya eddullu, ororomelleya wanyu onnaphiya omiraponi.

⁵ Nyu Mulluku, onihani ottekweenaanyu muddullummo. Vuwihani ntitimiho nanyu va ellapo yavatthi ettheene.

⁶ Ookondiwaanyu yaakiheriwe avulluseni ni nnattanatta nanyu, munaakhulle hiyaano.

⁷ Mulluku ari onipuroni naye naweella, oolonjeza wi, “Kineerewuukawellani ellapo ya Shekemu moohakallalla, kineerewuuphadderani malire mu ntapo na Sukoti.

⁸ Giliyadi tti aaka, Manase tti aaka. Efuremu tti echipewaaka yookiteteza Yuda tti ekopwaaka yoomwene.

⁹ Mowabu tti embalaaka yoonawellamo, Edomu tti voonyingallavo esapato ddaka, kineerokhuwa moohakallalla kimugonjihalle Filistiya.”

¹⁰ Ttaani anaakiphiyihe o muzinda wampanda? Ttaani anaakihoollelle o Edomu?

¹¹ Khemuhiyo nyu Mulluku oyo munitathillalle? Tti nyu Mulluku muhiyalle waavelleella akhotwaahu.

¹² Nikavihereni ollipana ni adanaahu vawi nikavihero na muthu tti noohikhalla ni mutteko.

¹³ Mulluku akhalla ni hiyaano, nineerowana ekhoto moollipa murima vawi tti olliye anaawaanyingallelle adanaahu.