Masalimo 107 - Mawu a Mulluku

Nibukhu naneetthanu Masalimo 107—150 Otitimiha ophaama wa Apwiya

¹ Athokozeni Apwiya kaambiiwa tti aphaama, vawi echikondiiwa yoohisintheya tti ya enthawi yoohimalla.

² Ellote ddiiddo awoopolliwa a Apwiya, ayo yaavullusalliiwa o ddookatamiha.

³ Yahaatthukumaniha ovenyera o ellapo ddittheddene, ovenyera wookhuma nndduwa ni woovollowa nndduwa ovenyera ompoto ni omwera.

⁴ Amodda yaahollowa muchipululuni, woohiyiphwanya ettilla yooya o muzinda wi yakhallemo.

⁵ Yaavolliwa ettalla ni nthona, okumiiwa waangomowa muwari mwiwa.

⁶ Vano athwaalle yahinllella wa Apwiya, yaariiwa mu ddookatamihannddo, Apwiya yahaavullusa.

⁷ Yahaahoollella o ettilla yawookowa ophiyera yaaphiya o muzinda wi yakhallemo.

⁸ Yaathokoze Apwiya ekaamba ya echikondiiwa yoohisintheya ekaamba ya ddoottikhiniha ddiwa wa athu attheene.

⁹ Apwiya ennamuwiryiha muthu oovolliwa nthona, ennamuchiha ddeko ddaphaama oovolliwa ettalla.

¹⁰ Amodda yaakhalla mu epiphi ni m'muuthuuchini wa okhwa, yaari a mundende oohoosiwa ni onyolo.

¹¹ Vawi yaawukila mawu a Mulluku, Yaavevulla malangizo a Amasiva Mattheene.

¹² Alliwa yaanyingallelliwa ni mitteko ddootopiha, sika yaanakwakwatuwa woohikhallavo naari mmodda awaakavihera.

¹³ Vano athwaalle yahinllella wa Apwiya yaariiwa mu ddookatamihannddo, Apwiya yahaavullusa o ddennddo.

¹⁴ Apwiya yahaakhumiha athwaayo mu epiphi ni omuuthuuchini wa okhwa, yaaphadda onyolwiiwa.

¹⁵ Yaathokoze Apwiya ekaamba ya echikondiiwa yoohisintheya, ekaamba ya ddoottikhiniha ddiwa wa athu attheene.

¹⁶ Vallethi yahinttaka machiwi amikoko, ephadda veelli mikoko ddoollipa.

¹⁷ Amodda yaavoriiwa ekaamba ya ettilla ddiwa ddoonanara, ehoosiwa ekaamba ya machimwiiwa.

¹⁸ Erive yoocha yaanaweetiha murima, yahanlle vang'ono okhwa.

¹⁹ Vano athwaalle yahinlla wa Apwiya yaariiwa mu ddookatamihannddo, Apwiya yahaavullusa o ddennddo.

²⁰ Apwiya yaarumiha mawiiwa yaachiriha athwaayo, yahaavullusa wi ehoonongeye.

²¹ Yaathokoze Apwiya ekaamba ya echikondiiwa yoohisintheya, ekaamba ya ddoottikhiniha ddiwa wa athu attheene

²² Evelleelle mikutho ddoothokozella ni ollalleya mitteko dda Apwiya, vawiipani machipo oohakallalla.

²³ Amodda yaheeta va enyanja musitimani, enakulliha malonda va enyanja dduullupalli.

²⁴ Yahoona mitteko dda Apwiya, ddoottikhiniha ddiwa va maaddi oowallamella.

²⁵ Apwiya yalamulalliiwa, yaamwaambiha namondwe oyo aambihalle mafunde va enyanja.

²⁶ Esitima ddawellilliiwa muddullu ddikitthella woowallamella, athwaayo yaatathilla mirima ddiwa va ddookatamihannddo.

²⁷ Yaakhalla ni neeruuru, enahehereya wonanko athu oolezela ophiyera eruswiiwa kheyaari ni mutteko.

²⁸ Vano athwaalle yahinlla wa Apwiya yaariiwa mu ddookatamihannddo, Apwiya yahaavullusa o ddennddo.

²⁹ Apwiya yaakhurumusa ephevo ya namondwe, mafunde a enyanja yaamaalla.

³⁰ Sika athwaayo yaahakallalla kaambiiwa ddaakhurumuwa, Apwiya yahaaphiyiha nko yaganizelliiwawo.

³¹ Yaathokoze Apwiya ekaamba ya echikondiiwa yoohisintheya, ekaamba ya ddoottikhiniha ddiwa wa athu attheene.

³² Yaatitimihe vamutthukumanoni wa athu, yaathokoze vanthatoni na attekweene.

³³ Yaatthattusa mihinje ddikhalla echipululu, aneetuutu ekhalla ethaya yawumma.

³⁴ Yaayitthattusa ethaya yaphaama ekhalla yooguga ekaamba ya onanara wa athu ookhalla mwemmo.

³⁵ Komattho yaayitthattusa echipululu ekhalla ya mathiya amaaddi, Ethaya yawumma ekhalla ya aneetuutu.

³⁶ Nave wenko Apwiya yahaakeraatthiha athu eettalla, vano athwaayo yaamaka muzinda wi ekhallekemo.

³⁷ Yaamidda mmiddo m'matani, yaalla mipesa, yaahata ddeko ddinchichi.

³⁸ Ekaamba ya madaliso a Apwiya, athwaayo yahaata wunchichi, eziweto ddiwa kheddaayeville.

³⁹ Echiwerengero ya athwiiwa yayevilliiwa, yakitthihiwiiwa ni ddoohoosa, ddookatamiha ni ethakaraka,

⁴⁰ vaavo Apwiya yahaavevulla awaanyingallella, yaahollosa mu echipululu.

⁴¹ Koma athu ohoowa yahaakhumiha mu ddookatamiha ddiwa, yahaatiha mabanjiiwa wonanko milloko dda enkhosa.

⁴² Athu oolungama ennoona ddennddo enahakallalla, koma oonanara attheene ennamaalla.

⁴³ Oyo ari ni ezeru iiwesese ddenndda, athu eganizelle dda echikondi yoohisintheya ya Apwiya.