Masalimo 106 - Mawu a Mulluku

Oreera wa Apwiya va athwiiwa

¹ Aleluya! Athokozeni Apwiya vawi tti aphaama, echikondiiwa yoohisintheya tti ya enthawi yoohimalla.

² Ttaani anaawore otthopoolla mitteko ddamasiva dda Apwiya? Ttaani anaawore waatitimiha mookwakhwanella?

³ Oodala tti athu oosunga echiweruzo, aweera echilungamo enthawi ettheene.

⁴ Apwiya, mukuupuwelle mwaawoonihellaka oreera murima athwaanyu, mukikavihere mwaawaavullusaka

⁵ wi koone ddooddiva dda ootthoolliwaanyu, wi kithapellena ehakallallo ya mutundwaanyu, wi kiriiheye vamodda ni yoohallanaanyu.

⁶ Hiyaano noochimwa wonanko makhollwaahu, noheera ddoonanara, noolakwa.

⁷ Makhollwaahu yaariiwa o Iguputo, kheyaapwathille ddoottikhiniha ddanyu. Kheyaawuupuwelle wunnuwa wa echikondaanyu yoohisintheya, koma yaamuwukila Mulluku Amasiva Mattheene o Enyanja Yoofiira.

⁸ Koma ahaavullusa ekaamba ya nnddina naye wi oonihe masivaaye muullupalli.

⁹ Aayihumullulla Enyanja Yoofiira yumma, ahaahoollella mu enyanja yoowallamella, yeeta vawumma wonanko mu echipululu.

¹⁰ Sika ahaavullusa wa awiitananiiwa, aawoopolla o masiva a adaniiwa.

¹¹ Maaddi yahaamirya adaniiwa attheene, khaahaanllevo naari mmodda.

¹² Vano athwaaye yaakhulupilila mawaaye, eniipa machipo oomutitimiha.

¹³ Koma vihinallekelle yaatiwalla mitteko ddaye, kheyaatiyerille malangizwaaye.

¹⁴ Koma yaattutthuwa voothwarani ddoopaalla dda murimiiwa muchipululuni, yaamweesa Mulluku wenko.

¹⁵ Olliye ahaavaha nnddo yavekilliiwa, komattho aarumiha ereta yawoopiha variyari viwa.

¹⁶ Enthawi emodda athwaayo yaamweerella ehache Mose ni Aroni oorumeyella oopatuleya a Apwiya.

¹⁷ Vano ethaya yahaatthama emumirya Datani, evuhella mulloko wa Abiramu.

¹⁸ Munllo waakhara m'mullokoni mwiwa, mallumi amunllo yahaashellelliha oonanara.

¹⁹ Yaamoopa musaana eeng'ombe o Horebu, enallapella nifano naweeka.

²⁰ Yahaakakhaniha ntitimiho na Mulluku ni nifano neeng'ombe yoocha manasi.

²¹ Yaamutiwalla Mulluku awaavullusiiwa, oyo eerille ddeko dduullupalli o Iguputo,

²² mitteko ddoottikhiniha mu echigawo ya Hamu, ddeko ddawoopiha o Enyanja Yoofiira.

²³ Sika ekaambiiwa aalleelleeye wi aweerewoononga, Mose ootthoolliwaaye ahimmenlleke vamiitthoni vaye ni ohiiha osha murima waye wi ahiiwoononge.

²⁴ Sika alliwa yaavevulla ellapo yaphaama voohikhulupililani mawaaye.

²⁵ Yaaniinyullulla m'misasani mwiwa, ehiniiwellella mawu a Apwiya.

²⁶ Sika ekaambiiwa yatukhullelliiwa nnatta niwa muddullu, ellupella wi athwaayo eneerokhwella muchipululuni,

²⁷ eneeroddimwara edduullu ddiwa variyari va mitundu ddimodda ni oddipallallesella mu ellapo ddeelleto.

²⁸ Athwaayo yahaamba omullapella Baala o Peori, enachana mikutho ddoovelleelliwa wa athu ookhwa.

²⁹ Sika yaallika osha murima wa Apwiya ni ddaweera ddiwa nave mullilli waamora variyari viwa.

³⁰ Vano Finehasi aallakille oolakwa, mullilloolle waahiya.

³¹ Sika olliye aheerengelliwa wi tti oolungama o mibado ddittheddene wa enthawi yoohimalla.

³² Athwaayo yaahaashihattho murima Apwiya omaaddini a Meriba, ddeko kheddaamweetenlle phaama Mose ekaamba ya athwaayo.

³³ Alliwa yaamushiha murima wunchichi sika wi Mosooyo aallota ddoohiphwanella ni eyanwaaye.

³⁴ Kheyaawoonongille mitundu ddimodda dda athu wonanko Apwiya yalamulelliiwa.

³⁵ Koma yaattakanyiherana ni mitundu ddimoddannddo ehuddera makhallellwiiwa oonanara.

³⁶ Yaarumeyella mafanwiiwa ayo yatthattuwalle musampha.

³⁷ Yahaavelleella aniiwa aallopwana ni aatthiyana wa minepa ddoonanara wonanko mukutho.

³⁸ Yaamoriha nikhame noohichimwa, nikhame na aniiwa aallopwana ni aatthiyana ayo yaavelleelliiwa mukutho wa mafano a o Kanani, sika yaaripiha ellapweeyo ni nikhame.

³⁹ Yahiiripiha ni mitteko ddiwa, ekhalla hule va ddaweera ddiwa.

⁴⁰ Vano osha murima wa Apwiya wahaakharella athwiiwa, kaambiiwa yaananariwana yoohallaniiwa.

⁴¹ Yahaavelleella wa mitundu ddimodda dda athu, wawi ayo yiitananiiwa tti yaayo yaalamulella.

⁴² Adaniiwa yaanaahoosa, yaagonjihalle, yaaphara mwetwiiwa.

⁴³ Enthawi ddinchichi Apwiya yaanaavullusa koma alliwa yaanavirellella waawukila nave ddoochimwa ddiwa ddaanaavevulla.

⁴⁴ Komave Apwiya yahaakavihera va ddookatamiha ddiwa, yiiwalliiwa winlla wiwa.

⁴⁵ Yahuupuwella echipanganwiiwa ekaamba yawaakonda athwaayo. Yaakhurumusa murima ekaamba ya wunnuwa wa echikondiiwa yoohisintheya.

⁴⁶ Apwiya yahoollowiha mirima dda adaniiwa attheene ayo yaaphanre athwiiwa okaporo.

⁴⁷ Nyu Apwiya Mullukwaahu, nivulluseni, nitthukumaniheni ovenyera variyari va athu a mitundu ddimodda wi nithokoze nnddina nanyu naweella, wi nikotelleke otitimiheya wanyu.

⁴⁸ Oodala tti Apwiya Mulluku a Israele, ovenyera o enthawi yoohimalla wa enthawi yoohimalla. Athu attheene ellote wi, “Amen.” Aleluya!