Masalimo 105 - Mawu a Mulluku

Apwiya ni athwiiwa

¹ Athokozeni Apwiya, ithanani nnddina niwa, vuwihani mitteko ddiwa variyari va mitundu dda athu.

² Wiipelleni machipo awaatitimiha, tthopoollani ddoottikhiniha ddiwa ddittheddene.

³ Kotellani nnddina niwa naweella, mirima dda oowaashaasha Apwiya ddihakallalle.

⁴ Muwaashaasheke Apwiya ni masiviiwa, okohella ekhoviiwa wa enthawi yoohimalla.

⁵ Muupuwelleke mitteko ddoottikhiniha ni ezizindikiro ddiwa, mmo yaweeruzelliiwa athu,

⁶ nyu edduullu dda oorumeyelliiwa Abrahamu, anamwani a ootthoolliwiiwa, Yakobo.

⁷ Alliwa tti Apwiya Mullukwaahu, ennalamulella ellapo yavatthi ettheene.

⁸ Ennuupuwella echipanganwiiwa enthawi ettheene, mawiiwa yaalamulelliiwa wa mibado ddinchichi,

⁹ echipangano yakeraatthihalliiwa ni Abrahamu, lonjezo yallupenlliiwa wa Isaki,

¹⁰ nno yanisimikizalliiwa wa Yakobo wi ekhalle echipangano yoohimalla wa Israele wa enthawi yoohimalla.

¹¹ Yaallota wi, “Kineerewuuvaha ellapo ya Kanani wi ekhalle yoohallanaawo.”

¹² Yaariiwa athu aweerengeya, athu ooyeva, alleto mu ellapweeyo,

¹³ eneeteeta ovenyera o mutundu mmodda ophiyera mutundu mmodda, ovenyera omwene omodda ophiyera omwene omodda,

¹⁴ Apwiya kheyaawakhullelle wi naari mmodda aanyingallelle, yahaahumullulla mamwene ekaamba ya alliwa.

¹⁵ Yaallota wi, “Muhaattannye oozoziwaaka,* muhiweerelle yoonanara anamallotellaaka.”

¹⁶ Apwiya yawiihalliiwa ettalla mu ellapo yahoononga yoocha ettheene.

¹⁷ Yaamuhoolliha muthu, Yosefe, oyo akullihiwe wonanko kaporo.

¹⁸ Manyallwaaye yaavoreyiwa anamang'ona, nikohi naye naawarihiwa onyolo

¹⁹ ophiyera nndde Yosefe allotilleeye ddeereyille. Mawu a Apwiya yaasimikiza wi olliye khaalakwille.

²⁰ Mwene aamuruma muthu amuttaphulla, aweeruza mitundu dda athu aamuhullella.

²¹ Aamutthattusa apwiya a mu enyumbaaye, oolamulella eyuumaaye ettheene

²² wi alangizeke enduna ddaye moollikana ni mmo apaallelleeye ni waahuddiha ezeru attekweene.

²³ Vano Israele aaphiya o Iguputo, Yakobo aakhalla mulleto mu echigawo ya Hamu.

²⁴ Apwiya yahaakhullella wi athwiiwa yaate, yaatthattusa amasiva waakhwaranya adaniiwa.

²⁵ Yahummiha mirima ddiwa wi yiitane ni athwiiwa ni oweerella moolleka oorumeyelliiwa.

²⁶ Apwiya yaamuruma Mose oorumeyelliiwa ni Aroni oyo yamutthonlliiwa.

²⁷ Alliwa yaheera ezizindikiro mu nnddina na Apwiya, ddoottikhiniha mu echigawo ya Hamu.

²⁸ Apwiya yaarumiha epiphi yawoopiha wunchichi koma Aiguputo yaawukila mawiiwa.

²⁹ Yaatthattusa maaddiiwa ekhalla nikhame, yahiipha ehomba ddiwa.

³⁰ Ellapwiiwa yaaddalla ni anaphullu naari ezipinda dda enyumba yamwene.

³¹ Yaallota nave waakhuma engwillihi ddinchichi, ethupo ddaavollowa mu ellapwiiwa ettheene.

³² Yahaavaha marallalla munipuroni mwa murimu, ettari eyo yasherima mu ellapwiiwa.

³³ Yahoononga miteekho ddiwa ddampesa ni ddanamukuyu, yahinttaka miteekho ddittheddene dda mu ellapwiiweeyo.

³⁴ Yaallota nave waaphiya nazombe, middope ddooheerengeya,

³⁵ nnddo ddoonongille ddoomella ddittheddene dda mu ellapwiiwa, ddaacha ezipaso ddittheddene dda m'matani mwiwa.

³⁶ Alliwa yaawiipha anamwani attheene aallopwana awaamba mu ellapwiiwa, anamwani awaamba esombwiiwa.

³⁷ Vano yahaakhumiha Aisraele emukusalle siliva ni golide, variyari va mallokwiiwa khaavo oyo akukhumuwalle.

³⁸ Aiguputo yaahakallalla alliwa yarowilliiwa kaambiiwa woopiha wiwa wahaamorella.

³⁹ Apwiya yaahiya murapo wi waahuruwelleke, munllo wi waamolleelleke mahiiyu.

⁴⁰ Alliwa yaaveka yoocha, Apwiya yahaarumihella ayuurwe, yahaavaha buledi oovenyera oddullu.

⁴¹ Yaahulla nlluku maaddi ekhuma, yaheeta muchipululuni wonanko muhinje.

⁴² Vawi yaahuupuwella lonjezo niwa naweella, wa Abrahamu oorumeyelliiwa.

⁴³ Vano yahaakhumiha athwiiwa moohakallalla, ootthoolliwiiwa yaakhuma yiipaka moothapella.

⁴⁴ Yahaavaha ellapo dda mitundu ddimodda dda athu, yaaweeriha wi yaakhe ezipaso dda mitteko dda athu amodda

⁴⁵ wi athwiiwa esungeke malangizo, ethwareke malamulwiiwa mattheene. Aleluya!