Masalimo 104 - Mawu a Mulluku

Omutitimiha Mulluku

¹ We murimaaka, atitimihe Apwiya! Nyu Apwiya Mullukwaaka, nyu tti muullupalli wunchichi, munnawara olemu ni omwene,

² munniihuruwella ni owala wonanko mukanjo. Moottaphurusa eddullu wonanko ekuwo yamusasa,

³ moomaka enyumbaanyu vamaaddini amuddullu. Mirapo ddoothamaka ddiri wonanko nigareta nanyu, munneeta vamuuphelloni a ephevo.

⁴ Munnayitthattusa ephevo amithengaanyu, mallumi amunllo oorumeyellaanyu.

⁵ Mookeraatthiha ellapo yavatthi vamatthipellellwiiwa wi ehitikheye naari vang'ono.

⁶ Mooyihuruwella ni enyanja yoowallamella wonanko ni yoowara, maaddi yaawella ophiyera vaddullu va miyaango.

⁷ Mwaahumullullalle maaddaayo yaathawa, yiiwalle othuruma wa ogugudeya wanyu yaapallalleya.

⁸ Miyaango ddaawella, matapo yaakittha, ophiyera onipuroni nko mwaakhozenlleenyu.

⁹ Maaddaayo mwahaalembella maliriiwa wi ehikhwaranyevo, wi ehihuruwellettho ellapo yavatthi.

¹⁰ Munnaakhumiha aneetuutu muntaponi, mihinje ddinneeta variyari va miyaango,

¹¹ ddinnavaha enama ddittheddene ddamuhakani maaddi oowirya, embizi ddinniiphamo nthona.

¹² Epallame ddinniithaalla vakhuviru ni muhinje, ddinniipa mu enthambi.

¹³ Nyuwaano munnahellella miyaango ni maaddi oovenyera o ezipinda ddanyu ddooddullu, ellapo yavatthi yooddalla ni madaliswaanyu.

¹⁴ Munnamelliha manasi wi eng'ombe ddicheke ddoomella wi muthu allimeke ni ophwanya yoocha muthayani

¹⁵ ni vinyo wi ahakallalliheke murimaaye, makhura awiihella wi mwiilli woolloweke, buledi wi amuvaheke masiva.

¹⁶ Miteekho dda Apwiya ddinnahellelliwa wunchichi, mikunguza dda o Lebanoni nnddo yaddanlliiwa.

¹⁷ Epallame ddinnamaka emphuru mwemmo, nasekwa annamaka enyumbaaye m'mikunguzani.

¹⁸ M'miyaangoni ddoorekema munnakhalla anaahe, m'mallukuni munnathawella epilla.

¹⁹ Mwaaphatusa mweeri wi ohiyaniheke enthawi, nndduwa ninnadduwella enthawi yoovollowella.

²⁰ Munnaphatusa epiphi ekhalla mahiiyu, enama ddamuhakani ddinnakhuma.

²¹ Mikango ddinnathuruma ddaawaashaka yoocha, oveka yoochiiwa wa Mulluku.

²² Nndduwa naakhumaka, ddinnahokollowa ddakonaatthi m'makhunguni mwiwa.

²³ Muthu annaya omuttekoni waye, annaphara mutteko ophiyera misikuwa.

²⁴ Nyu Apwiya, mitteko ddanyu tti ddinchichi, mwaaddipanga ddittheddene mweezeru, ellapo yavatthi yooddalla ni ddoophatusiwa ddanyu.

²⁵ Wookhalla enyanja yuullupalli ni yooramballalla, yooddalla ni ddawaapadda ddooheerengeya, ddookumi dduullupalli ni dding'onong'ono ddene.

²⁶ Esitima ddam'maaddini ddinneetamo Leviyatani* mwamuphatusalleenyu annattheellamo.

²⁷ Ddoophatusiwa ddittheddene ddinnatiyerella wi muddivahe yoocha va enthawiiwa.

²⁸ Mwaddivaha ddinnayaakhella, mwattaphurusa nnatta nanyu ddinnavona.

²⁹ Mwaddiipitthihella ekhovaanyu, ddinnoova ni otathilla murima. Mwaddivenyihella mpweya, ddinnakhwa, ohokollweella onthupini.

³⁰ Mwarumiha munepa ddinnaphatusiwa, munnahokollosella mooneyello a ellapo yavatthi.

³¹ Ntitimiho na Apwiya nikhalle wa enthawi yoohimalla, Apwiya ehakallallena mitteko ddiwa.

³² Ellapo yavatthi ennatthukumella alliwa yayiweha miyaango ddinnathuwa mwiisi yaddittannya.

³³ Kineerowiipella Apwiya okumaaka muttheene, kineerewiipa machipo owaatitimiha Apwiya, enthawi ettheene kakhalla mukumi.

³⁴ Mavekellwaaka yaaddivelle Apwiya vawi kinnahakallalla mwa alliwa.

³⁵ Oochimwa yoonongeye va ellapo yavatthi, athu oonanara ehikhallevottho. Atitimihe Apwiya, we murimaaka, atitimihe Apwiya!