Masalimo 103 - Mawu a Mulluku

Echikondi ya Mulluku

Salimo na Davide.

¹ We murimaaka, atitimihe Apwiya, okumaaka muttheene riiha nnddina niwa naweella.

² We murimaaka, atitimihe Apwiya, ohitiwalle ddaphaama ddiwa ddittheddene.

³ Tti alliwa enakhululukella machimwaawo mattheene, enachiriha ereta ddawo ddittheddene.

⁴ Tti alliwa enavullusa okumaawo o mahame, enuuwariha echikondiiwa yoohisintheya ni echifundwiiwa wonanko enduwira yoomwene.

⁵ Tti alliwa enuuvoniha ni ddaphaama enthawi ettheene ya okumaawo, sika onnakhalla ni masiva anaanweene wonanko mpungu.

⁶ Apwiya ennaweeruza mweechilungamo ennaweerella echiweruzo attheene oonyingallelliwa.

⁷ Yaamudduweliha Mose ettilla ddiwa, yaawooniha Aisraele mitteko ddiwa.

⁸ Apwiya tti eechifundo ni ooreera murima, oohisha murima mwawaakuva, ooddalla ni echikondi yoohisintheya.

⁹ Khenavirellella ovittha mullatu enthawi ettheene, khenasha murima wa enthawi yoohimalla.

¹⁰ Khenanillaka moollikana ni machimwaahu, khenanihokollosella moollikana ni ddoonanara ddahu.

¹¹ Mmo oddullu orekamellaniiwa ni ellapo yavatthi, tti mmo yunnuwelle echikondiiwa yoohisintheya wa oowoova.

¹² Mmo murekamellane wookhuma nndduwa ni woovollowa nndduwa, Tti mmo Apwiya enarekamellihiiwa machimwaahu.

¹³ Mmo nikhollo nineerelliiwa echifundo wa anaaye, tti mmo Apwiya eneerelliiwa wa oowoova,

¹⁴ Vawi ennadduwella mmo naphatuselliweehu ennuupuwella wi hiyaano tti nthupi.

¹⁵ Koma muthu, mallapwaaye tti wonanko manasi, annattaphuruwa wonanko malluwa oohakani.

¹⁶ Vawi ephevo yoopa, malluwaayo khenakhallavo, nipuro niwa khaninaadduwellattho.

¹⁷ Koma echikondi yoohisintheya ya Apwiya tti yawaambeella enthawi yoohimalla wa enthawi yoohimalla, wa ayo enawoova, ennaddeerella ddoolungama edduullu ddiwa ddittheddene,

¹⁸ ayo enasunga echipangano ya Apwiya, ayo enuupuwella weera malamulwiiwa.

¹⁹ Apwiya aakeraatthiha mpandwiiwa woomwene oddullu, omweniiwa onnalamulella erive ello

²⁰ Nyu angelwiiwa, amasiva oollipa, muniiwa mawiiwa, muneera nnddo enalamuliiwa, atitimiheni Apwiya!

²¹ Nyu akhotwiiwa attheene ooddullu, oorumeyelliiwa aweera nnddo enapaalliiwa, atitimiheni Apwiya!

²² Nyu ddoophatusiwa ddiwa ddittheddene, mu ezigawo ddittheddene dda omweniiwa, atitimiheni Apwiya! Naweenettho murimaaka, atitimihe Apwiya!