Masalimo 102 - Mawu a Mulluku

Nchipo nooveka ovullusiwa

Nivekello na muthu ookhupanyella wa Apwiya.

¹ Nyu Apwiya, iwani nivekello naka, winlla waka ophiye wa nyuwaano.

² Muhikiipitthihelle ekhovaanyu va nllapo na ddookatamiha ddaka. Kaapelleni maaru wi mwiiwe, mukaakhulle mwawaakuva kaawiithanakani.

³ Mallapwaaka enavira wonanko mwiisi, mwiillaaka onakhara wonanko munllo.

⁴ Murimaaka wootulliwa wonanko manasi nave woonyaalla wawi kinnatiwalla ocha yoochaaka.

⁵ Ekaamba ya wiipullella waka wookhuwa, muhehaaka woowanddeellella o makhuvaaka.

⁶ Kiri wonanko ephangwi muchipululuni, wonanko eddiiddi muntepeni.

⁷ Kinnakonaatthi koma woohikona, kiri wonanko epallame yookhalla weekhiiwa vaddullu va enyumba.

⁸ Nllapo nittheene adanaaka ennakeerella epewe, attheene ookivevulla ennaromolla nnddina naka vootembelelani.

⁹ Miyaano kinnacha ntuura wonanko yoocha, yoowiryaaka ennattakanyihereya ni miitthori

¹⁰ ekaamba ya owallaanyu ni osha murima wanyu vawi nyuwaano mookitukhulla mukitathilla.

¹¹ Mallapwaaka tti wonanko muuthuuchi wa misikuwa, koonyaalla wonanko manasi.

¹² Koma nyu Apwiya, munnalamulella wa enthawi yoohimalla, athu a mibado ddittheddene eneerowuupuwellani.

¹³ Muneerovenya ni omumorella ethakaraka Ziyoni vawi enthawi yoomweerella echifundo yoophiya.

¹⁴ Oorumeyellaanyu ennahakallallana mallukwaaye, ennamorella ethakaraka nthupi naye.

¹⁵ Mitundu dda athu ddineerekewoova nnddina na Apwiya, mamwene mattheene a va ellapo yavatthi eneerekewoova ntitimiho niwa.

¹⁶ Apwiya eneeromumaka Ziyoni, eneerewooneyella mu ntitimiho niwa.

¹⁷ Eneeropwatha nivekello na athwiiwa ootathilliwa, khevevulla ovekella wiwa.

¹⁸ Ddenndda ddilembiwe ekaamba ya mbado wa muhoollo, wi athu ayo ehinayariwe alliwattho yaatitimihe Apwiya.

¹⁹ Apwiya yaaweha vatthi eri muddullu mu nipuro niwa naweella, eri muddullu, yaaweha va ellapo yavatthi

²⁰ wi yiiwe wiipullella wa athu a mu endende wi yaavulluse ayo yaphwanenlle wiiphiwa.

²¹ Sika athu eneerollalleya nnddina na Apwiya o Ziyoni, eneerewaatitimiha o Yerusalemu.

²² Mitundu dda athu ni mamwene ddineerotthukumana wi ddaallapelle Apwiya.

²³ Apwiya yahinttaka masivaaka kihinannuwe, yaayeviha mallapwaaka.

²⁴ Kaallota wi, “Nyu Mullukwaaka muhikivenyihevo kihinuulluvalle. Miyakha ddanyu tti dda mibado ddittheddene,

²⁵ vawaamba valle mwaaphatusa ellapo yavatthi, ddooddullu tti mitteko dda mattaanyu.

²⁶ Ddenndda ddineeromalla koma nyuwaano muneerokhallavove, ddittheddene ddineerewaahuwa wonanko ddoowara muneerewaakakhaniha wonanko ddoowara ddawaahuwa.

²⁷ Koma nyuwaano khemunasintha miyakha ddanyu kheddinamalla.

²⁸ Anamwani a hiyaano oorumeyellaanyu eneerokhalla mwamurendelle, edduullu ddahu ddineerokeraattheya vamiitthoni vanyu.”