Masalimo 10 - Mawu a Mulluku

Ovekella echiweruzo yoolungama

¹ Nyu Apwiya kaambiiwa tini mwiimenlleenyu voorekamella, muniipittheenyu naahoosiwaka?

² Oonanara ennaahoosa oohoowa mwawiitukhulla, yaange munthavini yareyilliiwa weekhiiwa.

³ Muthu oonanara anniitukhulla ni ddoopaalla ddaye, oottutthuwa ennaatembelela ni waakhoota Apwiya.

⁴ Ekaamba ya wiitukhulla waye, muthu oonanara khanapwatha dda Mulluku, m'murimani mwaye anaganiza wi Mulluku khaawo.

⁵ Muthu oonanara ddeko ddaye ddinnamweetella phaama erive enthawi. Khaniiwesesa echiweruzo ya Mulluku, annaanyemulla adanaaye.

⁶ M'murimani mwaye anallota wi, “Ngiwa kitikheya, ngiwa koona yookatamiha.”

⁷ Eyanwaaye ennatembelela, ennalleka nave ennoopopiha, muwano mwaye munnakhuma ddoohoosa ni ddoonanara.

⁸ Anniipittha m'mawaani, annawiipha oohilakwa mwawiipittheya, annaathwara manyallo oorama nikavihero.

⁹ Annawiipitthella wonanko mukango, anniipittha wi aaphare oohoowa wi aapurullelle munthavini mwaye.

¹⁰ Annaalluphella, annaanyingallella oopaneya, annaakuha ni masivaaye mattheene.

¹¹ Oonanara m'murimani mwaye anallota wi, “Mulluku khanapwathawo, ookhuneella owiitthoni, khakoona.”

¹² Apwiya, venyani! Mulluku, onihani masivaanyu, muhinaatiwalla oohoosiwa.

¹³ Kaambiiwa tini oonanara anamukhooteeye Mulluku, analloteeye m'murimani mwaye wi, “Khawa akillaka”?

¹⁴ Komathi nyuwaano munnamoona, munnadduwella ddookatamiha ni ddoohoosa nave munneeravo ello. Oopaalla okaviheriwa enniivelleella wa nyuwaano, alliwattho akhwaadduni munnaakavihera.

¹⁵ Onongani masiva a oonanara ni oochimwa, mullakeni va ddoonanara eerilleeyennddo, ophiyera wi ahaakullellettho.

¹⁶ Apwiya sika mwene wa enthawi yoohimalla. Mu ellapo ya Mulluku, oohimullapella eneerotthollowa.

¹⁷ Apwiya, munniiwa nnddo oohoosiwa enavekiiwa, munnaallipiha mwiilli, munnawaapella maaru.

¹⁸ Sika munnaateteza oohoosiwa ni akhwaadduni, wi athu a va ellapo yavatthi ehiwoopopihettho.