Mariko 9 - Mawu a Mulluku

¹ Aavirellella ollota wi, “Ddawoona, kinimuulleellani wi, aakhallavo amodda vaava khekhwa ophiyera yoone omwene wa Mulluku owiille ni masiviiwa.”

Otthattuwa wa Yesu

² Vano viviralle mallapo matthanu ni nimodda, Yesu ahaakusa Petro, Yakobo ni Yohane awellana vaddullu va mwaango woorekama, wenko yaariwo weekhiiwa. Nave Yesu aatthattuwa vamiitthoni viwa.

³ Nave ddoowara ddaye ddaatthattuwa ddaweella mbee vawi ddaanawala nave khaavo muthu a va ellapo yavatthi anaawore oddeelliha ddoowara mwawi ddiidda.

⁴ Vano oohudderaalle yaawoona athu yakhwille khalle, Mose ni Eliya, ellotaka ni Yesu.

⁵ Vano Petro aallota wa Yesu wi, “Ahuddihi, ddookhalla phaama wi hiyaano niri vaava, nuutthipellelleni misasa miraru vaava; mmodda wa nyuwaano, mmodda wa Mose nave mmodda wa Eliya.”

⁶ Koma Petro khaadduwenlle eyo alloteeye vawi olliye ni akhwaayaayo yahoova wunchichi.

⁷ Nave allotaka ddiiddo, waawa murapo waakhuneella ni muuthuuchiiwa nave mawu oovenyera m'muraponimmo yaallota wi, “Olla sika Mwanaka ookondiwa, kinnahakallallana, mwiiwellelleni.”

⁸ Vano enthawi yeeyo ewehillewehille kheyaamoonillettho muthu mmodda koma Yesuve sika aari ni alliwaayo.

⁹ Yakitthalliiwa m'mwaangonimmo, Yesu ahaalamula wi, “Ehimulleelle muthu yoonilliiwannddo, ophiyera mi, Mwaana a Muthu, kivenyille wa ookhwa.”

¹⁰ Yahiiwellella olamula wayenko koma yaakohana weekhiiwa wi, “Ovenya wa ookhwa anaaka Yesunngu onattaphullella tini?”

¹¹ Vano yaamukoha Yesu wi, “Kaambiiwa tini ahuddihi a malamulo* enallotiiwa wi namallotella Eliya anaakhalle ahokollowille nyuwaano muhinawe?”

¹² Nave aawaakhulla wi, “Ddawoona, Eliya sika anaawe moowaambeellella wi apotokose ddeko ddittheddene. Nave kaambiiwa tini mawu a Mulluku enallotiiwa dda mi, Mwaana a Muthu wi kineerohoosiwa wunchichi naari okhootiwa?

¹³ Koma kinimuulleellani wi, Eliya oowa khalle nave athu yaheerana moopaalla mwiwa, moollikana ni nnddo ddallotiwe mu mawu a Mulluku dda olliye.”

Yesu anamuchiriha musombwe ookhalla ni munepa woonanara

¹⁴ Yesu ni oohuddera ararwaayo yawiilliiwa ekhalla ni oohuddera amoddaayo, yaawoona athu anchichi ewaaphenlle ni ahuddihi amodda a malamulo evaanyihanaka ni oohudderaayo.

¹⁵ Vano athu attheenaayo yamoonilliiwa Yesu yaattikhina nave enthawi yeeyo yaamuthamakella emuvaha mooni.

¹⁶ Yesu ahaakoha oohudderaaye wi, “Munavaanyihana dda tini ni athwaayo?”

¹⁷ Muthu mmodda oovenyera m'mullokoni wa athwaayo ahaakhulla wi, “Ahuddihi, koowaana mwanaka wa nyuwaano kaambiiwa ookhalla ni munepa woonanara nave khanawora ollota.

¹⁸ Erive enthawi munepa woonanarooyo wamuvollowa, onnamukuhella vatthi nave annakhuma niphoru owanoni waye, anakhuuriha miino nave mwiillaaye muttheene onumma. Kahaakoha oohudderaanyu wi ekhumihe munepooyo koma kheyaawonre.”

¹⁹ Yesu ahaakhulla wi, “Nyu athu a mbado woohikhulupililoolla! Kinaakhalle ni nyuwaano ophiyera niini? Kinuuvillelleni ophiyera niini? Wannani musombooyo wa miyaano!”

²⁰ Sika yaawaana olliyooyo wa Yesu. Munepa woonanarooyo wamoonilliiwa Yesu, enthawi yeeyo waamutikha mwaanooyo moollipa vawi ahiikuha anuupuruwa niphoru nikhumaka owanoni.

²¹ Yesu ahaakoha attiitthinnya wi, “Ddenndda ddaambeelle niini?” Ahaakhulla wi, “Waambeella ari mwaana.

²² Wiilliwiilli munepa woonanaroolla onapaalla wi omwiiphe vomuvokhellani vamunlloni ni m'maaddini. Koma mwaaworaka weeravo ello, munimorelle ethakaraka voonikaviherani!”

²³ Yesu aallota wi, “Kaaworaka? Ddittheddene ddinaworeya ni oyo ari ni echikhulupililo.”

²⁴ Enthawi yeeyo attiitthinnyaayo yaakhuwa wi, “Kinnakhulupilila koma mukikavihere wi kihikayikeke.”

²⁵ Yesu oonilleeye wi mulloko wa athooyo onimawa mwawaakuva vamodda momwaatamella, vano aasimwella munepa woonanarooyo wi, “We munepa woohiiwa ni woohillota, kinimuulamula wi khumamo mwa musomboolla ohivollowemottho!”

²⁶ Munepa woonanarooyo waakhuwa, omukuhella vatthi angomowa nave okhuma. Musombooyo ahooneya wonanko ookhwa sika athu anchichi yaanallota wi, “Ookhwa!”

²⁷ Vano Yesu aamuphara musombooyo nnatta amukavihera ovenya nave ahiimella.

²⁸ Yesu avollowilleeye mpa, oohudderaaye yaamukoha va weekhiiwa wi, “Kaambiiwa tini hiyaano khanaawonre okhumiha munepa woonanara?”

²⁹ Yesu ahaakhulla wi, “Kheyiivo emodda enawora okhumiha munepa wa mutundu yoolla koma ovekellave sika onawora.”

Yesu anallota waneepiilli dda okhwa waye

³⁰ Yesu ni oohudderaaye yaavenya onipuroninko nave yaavirella o Galileya. Nave Yesu khaapanlle wi arive muthu adduwelle aariiyewo,

³¹ kaambiiwa aahuddiha oohudderaaye wi, “Mi, Mwaana a Muthu, kineerovelleelliwa wa ayo enaakiiphe. Koma vavira mallapo mararu kineerovenya wa ookhwa.”

³² Kheyaawiiwesesille ehuddihweeyo koma yahoova omukoha dda yeeyo.

Muullupalli ttaani

³³ Yaaphiya o Kaperenao, evollowille mpa Yesu ahaakoha oohudderaaye wi, “Mwavaanyihana dda tini muttilla mulle?”

³⁴ Kheyaakhunlle ello kaambiiwa muttilla mulle yaamavaanyihana ddawi muullupalli ttaani?

³⁵ Yesu aakeraatthi vatthi, ahaatthukumaniha oohudderaaye khumi ni eelli, allota wi, “Oyo anapaalla okhalla muullupalli akhalle mung'onong'ono mwa attheenenyu nave akhalle oorumeyella a attheene.”

³⁶ Vano aamukusa mwaana amwiimesa variyari va attheenaayo. Amukhupaarella, allota wi,

³⁷ “Nave muthu anamwaakhella mwaana mmodda awi ddiidda ekaamba ya miyaano, anakaakhella miyaano. Nave oyo anakaakhella miyaano, khanakaakhella miyaano koma oyo akirumalle.”

Muthu oyo ahinanivaanyiha anniiwanana ni hiyaano

³⁸ Yohane aamulleella Yesu wi, “Ahuddihi, naamoona muthu akhumihaka minepa ddoonanara vooromollani nnddina nanyu. Nave naheesa omuhiiha kaambiiwa khaari mmodda a mullokwaahu.”

³⁹ Koma Yesu ahaalleella wi, “Muhimuhiiheke kaambiiwa khaavo muthu aneera yoottikhiniha vooromollani nnddina naka nave vihiviralle enthawi yoorekama, anawora ollota ddoonanara dda miyaano.”

⁴⁰ Vawi muthu ahinanivaanyiha anniiwanana ni hiyaano.

⁴¹ Ddawoona, kinimuulleellani wi muthu oyo anuuvaheni maaddi oowirya nyuwaano ekaamba ya nnddina naka aneerothuviwa.

Weesiwa o machimo

⁴² Koma muthu oyo aneeriha wi mmodda a ang'onong'onwaalla ahiye okikhulupilila miyaano, waaweerokhalla waphaama wi nlluku na nsillo namakellelliweke munikohini mwaye nave avokhiwe mu enyanja.

⁴³ Sika nnatta nawo nuuchimwiha, oniphadde! Tti waphaama wa weyaano wi wavollowe mu okumi woohimalla ori oophaddeya nnatta ohiyana ni okhalla ni matta meelli oyaana o gehena, omunlloni woohithiima.

⁴⁵ Nave nnyallo nawo nuuchimwiha, oniphadde! Tti waphaama wa weyaano wi wavollowe mu okumi woohimalla ori oophaddeya nnyallo ohiyana ni okhalla ni manyallo meelli nave ovokhiwa mu gehena.

⁴⁷ Nave niittho nawo nuuchimwiha, onikhorokottemo! Tti waphaama wa weyaano wi wavollowe mu omwene wa Mulluku ni niittho nimodda ohiyana ni okhalla ni miittho meelli ovokhiwe mu gehena.

⁴⁸ Wenko mapwihi ayo enacha mitembo khenakhwa nave munllo khonathiimihiwa.

⁴⁹ “Attheene eneereweellihiwa ni munllo wonanko mmo mwiinyu oneellihelliiwa ddeko.”

⁵⁰ “Mwiinyu tti waphaama koma watthulluwa khoweerihiwattho wi oddiveke. Mukhallena mwiinyu mwa weekhiinyu nave mukhalleke mwamurendelle muthu ni mukhwaaye.”