Mariko 7 - Mawu a Mulluku

Ehuddiho ya makhollo a Ayuda

¹ Afarisi* amodda ni ahuddihi a malamulo* amodda oovenyera o Yerusalemu yaatthukumana moomwaapheella Yesu.

² Yahoona wi amodda a oohudderaaye yaanacha yoocha ni m'mattani moohinawa phaama moollikana ni ehuddiho ya Afarisi.

³ Vawi Afarisi ni Ayuda attheene kheyacha ehinawille phaama m'mattani kaambiiwa yathwara ehuddiho ya makhollwiiwa.*

⁴ Naari yaavenyeraka omusika kheyaacha ehinahape. Nave yaanathwarattho ehuddiho ddimodda ddinchichi dda makhollwiiwa wonanko ohuwa makapu oowiryella, epalli ni ddeko ddimodda ddawaapeyellamo ddoocha.

⁵ Sika Afarisi ni ahuddihi a malamulo yaamukoha Yesu wi, “Kaambiiwa tini oohudderaanyu ehinathwariiwa ehuddiho ya makhollwaahu vawi enacha ni m'mattani moohinawa?”

⁶ Yesu awaakhulla wi, “Awoottha nyu! Yesaya aallotella ddawoona dda nyuwaano eerilleeye, ‘Mulluku aallota wi, athwaalla enakititimiha miyaano ni vayanonive, koma mirima ddiwa ddoorekamellana ni miyaano.

⁷ Khaddinna mutteko wi ekillapelleke, kaambiiwa enahuddiha malamulo a athu wonanko tti malamulwaaka.’

⁸ “Moohiya malamulo a Mulluku koma munathwara ehuddiho ya athu.”

⁹ Nave Yesu aallota wi, “Mookhalla ni ettilla ddaphaama wa weekhiinyu ddookhootella malamulo a Mulluku wi muthwareke ehuddiho ddanyu.

¹⁰ Vawi Mose aalamula wi, ‘Waavaheke olemu attiittho ni amaayo nave muthu anaatembelela attiitthinnya naari amennya, ddawoona iiphiweke.’

¹¹ Koma munahuddiha wi mmodda annaakhullelliwa waalleella attiitthinnya apaalle amennya wi, ‘Tti Korobani’ (Ottaphullella wi, nikavihero kaawinnyemini koovelleella wa Mulluku.)

¹² Sika khamunamwaakhullella wi avirellelleke waakavihera attiitthinnya apaalle amennya.

¹³ Mwawi ddiidda munnavevulla mawu a Mulluku vawi muniiwellella ehuddihwaanyu. Nave munneera ddeko ddinchichi ddoophwanaphwana ni ddenndda.”

Ddeko ddinamuripiha muthu

¹⁴ Vano Yesu awiithana athwaalle nave allota wa yaayo wi, “Attheenenyu kiiwelleni nave mwiiwesese!

¹⁵ Khe ello enavollowa mwa muthu ovenyera otte enamuripiha vamiitthoni va Mulluku koma eyo enakhuma mwa muthu sika enamuripiha.”

¹⁷ Aahiyalleeye athwaalle aavollowa mpa, oohudderaaye yaamukoha wi atthopoolle phaama alloteeyennddo.

¹⁸ Yesu aallota wi, “Nanyeenettho khamuniiwesesave? Ethiyo khamuniiwesesa wi khe ello enavollowa mwa muthu ovenyera otte enamuripiha vamiitthoni va Mulluku?

¹⁹ Kaambiiwa khenavollowa m'murimani koma enavollowa m'mwiillini nave ennakhuma etathilliwa?” Voollotani ddenndda, Yesu aakamulla wi ddoochiwa ddittheddene ddichiweke.

²⁰ Vano ahaakhullattho wi, “Tti yeeyo enakhuma m'murimani enuuripiha vamiitthoni va Mulluku.

²¹ Vawi m'murimani mwa muthu munnavenyera maganizo oonanara, oraruwa wiiya, wiipha,

²² echigololo, nrima, ddittheddene ddoonanara, olleka, makhallello oonanara, ehache, ollotella amodda epewe wiitukhulla ni okarangeya;

²³ ddeko ddittheddene ddoonanara ddinavenyera m'murimani mwa muthu ni omuripiha vamiitthoni va Mulluku.”

Echikhulupililo ya mutthiyana

²⁴ Yesu aavenyawo wenko aya o echigawo vakhuviru ni muzinda wa Tiro. Aavollowa mpa nave khaapanlle wi arive muthu adduwelle wi aari wenko koma khaaworille wiipittha.

²⁵ Nave enthawi yeeyo mutthiyana oyo mwanaye aamutthiyana aari ni munepa woonanara, ahiiwa dda Yesu nave aawa akokhora vakhuviru ni olliye.

²⁶ Mutthiyanooyo aari Mugriki* mmodda ooyariwa o echigawo ya Fenisiya o Siriya. Aamuveka Yesu wi akhumihe munepa woonanara mwa mwanayooyo.

²⁷ Yesu ahaakhulla wi, “Ahiyeni anamwani yaambeelle ovona. Khe yaphaama okusa yoocha ya anamwani waavokhella anapwa.”

²⁸ Koma mutthiyanooyo ahaakhulla wi, “Ddawoona Apwiya naari anapwa ayo eri vatthi va tebulo ennatota ddoohalla ddoomorihiwa ni anamwani.”

²⁹ Vano Yesu aallota wa mutthiyanooyo wi, “Kaambiiwa wohaakhulla phaama, hokollweella owaninyu. Munepa woonanarooyo wookhuma khalle mwa mwanawo aamutthiyanooyo.”

³⁰ Sika mutthiyanooyo aarowa owaniwanko amuphwanya mwanayooyo akonaatthille vabedini nave munepa woonanaroolle okhumalle mwa mwaana aamutthiyanooyo.

Yesu anamuchiriha muthu oohiiwa ni oohillota

³¹ Yesu aavenyawo o echigawo ya Tiro wi aye o enyanja ya Galileya.* Aavirella o muzinda wa Sidoni ni o echigawo ya Dekapolisi.*

³² Athu amodda yaamukusella muthu oohiiwa ni oohillota nave yaamuveka Yesu wi iiyaatthi mattaaye va olliyooyo wi amuchirihe.

³³ Vano Yesu aamukusa ayaana vayeekha, voorekama ni mulloko waathwaayo. Nave Yesu aavollochiha eyaalla ddaye m'maaruni mwa muthooyo, attapha mare nave aahella vanllumini na muthooyo.

³⁴ Nave Yesu aaweha oddullu, avuma wuullupalli, allota wa muthooyo wi, “Efatha!” (Ottaphullella wi, ttaphuwa.)

³⁵ Enthawi yeeyo muthooyo ahaamba wiiwa nave yoomaka nllumeelle yaattaphuwa nave aanallota phaama ddene.

³⁶ Nave Yesu ahaalamula athu wi ehimulleelle arive muthu koma yaavirellella ovuwihanko naari aavaanyihaka wi ehaalleelleke athu.

³⁷ Athu attheene yaattikhina wunchichi ellota wi, “Oheera ddeko ddittheddene mwa phaama naari oohiiwa annawiiwiha ni oohillota annaallotiha!”