Mariko 6 - Mawu a Mulluku

Yesu anakhootiwa o Nazareti

¹ Yesu aavenya wenko aya o etawoni yoowaniwa nave oohudderaaye yaamuthwara.

² Niphiyalle nllapo na Sabata ahaamba ohuddiha mu enyumba yamavekello. Athu anchichi ayo yamwiiwella yaattikhina, ekoha wi, “Ahuddenre wuuwi ddeko ddittheddenenndda nave ezeru avahiweeyenndda tti dda mutundu tini? Nave aneera ddoottikhinihanndda mwawiidde?

³ Khe mwaana a ookhoma mataboolle? Amennya khe Mariya? Nave asinne khe Yakobo, Yosefe, Simoni ni Yudasi? Arokoraye khenakhalla vaavamva?” Sika yaamunyaambusa.

⁴ Yesu aallota wi, “Namallotella khanavahiwa olemu owaniwa naari ni abalaaye apaalle ni nibanja naye. Koma anavahiwa olemu waweeta.”

⁵ Khaaworille weerawo erive yoottikhiniha wenko opatula wi ahiiyaatthi mattaaye va athu amodda oovoriiwa ooyeva ni waachiriha.

⁶ Aattikhina kaambiiwa athu a wenko kheyaari ni echikhulupililo. Vano aheeteeta m'mizi ddawaatamella anahuddiha.

Yesu anaarumiha oohuddera khumi ni eelli

⁷ Aawiithana oohudderaaye khumi ni eelli vamodda, aamba waarumiha eellieelli. Ahaavahattho olamulello wookhumiha minepa ddoonanara.

⁸ Ahaalamulella wi, “Muhikuse ello voolendonoolla koma mukuse ekopove yaweetana. Muhikuse yoocha, nthumba na voolendoni naari makobiri munthumbani mwanyu.

⁹ Muware esapato koma muhikhalle ni malaya meelli.”

¹⁰ Ahaalleellattho wi, “Orive weko munaakhelliweenyuwo, mukhalleke mu enyumba yeeyo ophiyera muvenyillewo.

¹¹ Mwaphiya onipuroni nko muhinaakhelliweenyuwo apaalle muhiniiwellelliweenyuwo, venyaniwoni, muttatthe nthupi omanyalloni wanyu. Yoolla okhalle omboni wawi mohaakhoota ekaamba ya nnddo yenriiwa!”

¹² Sika yaaya yallalleyaka wi athu erukunuwe mirima.

¹³ Yaanakhumiha minepa ddoonanara ddinchichi, enaazoza ni makhura athu oovoriiwa anchichi nave enaachiriha.

Dda okhwa wa Yohane Oobatiza

¹⁴ Vano Herode* ahiiwa ddittheddenenndda kaambiiwa epilli ya Yesu yaavuwa virive veko. Athu amodda yaanallota wi, “Yohane Oobatiza oovenya wa ookhwa! Ekaamba ya yeella annawora weera ddoottikhiniha.”

¹⁵ Koma amodda yaallota wi, “Tti namallotella Eliya.” Nave amodda yaallota wi, “Tti namallotella, annaphwanaphwana ni anamallotella akhalle.”

¹⁶ Herode iiwalleeye ddenndda, aallota wi, “Tti Yohane Oobatiza! Kaamuphadda murwaaye koma ookhallattho mukumi!”

¹⁷ Vawi khalle, Herode aalamula wi Yohane amakiwe nave yammaka emuhiya mundende. Aheera ddenndda kaambiiwa aamutthella Herodiyasi naari aari mwaara a mwanamunne Filipo.*

¹⁸ Vawi Yohane aanamulleella Herode wi, “Khaddinaakhullelliwa ni malamulwaahu vawi weyaano woomutthella mwaara a mwanamunno olliyooyo ahinakhwe.”

¹⁹ Sika Herodiyasi aamwiita Yohane nave aapaalla omwiipha koma khaari ni mpata woweerella ddenndda.

²⁰ Vawi Herode nayeene aanamoova Yohane nave aamusunga wi ahiiphiwe kaambiiwa aanadduwella wi Yohane tti muthu oolungama ni aweella murima. Herode aamwiiwellellaka Yohane allotaka, aanahalleelliwa wuullupalli komattho enthawi yeeyo aanahakallalla.

²¹ Koma va nllapo nawuupuwella oyariwa wa Herode, Herodiyasi aaphwanya mpata. Va nllapo nenno Herodooyo aawiithana attekweene a niboma naye, attekweene akhoto ni athu oovuwa o Galileya wi ekhallena vamachellelloni vaye.

²² Mwaana aamutthiyana a Herodiyasi, aavollowa m'machellellonimmo iina nave ddaamuhakallalliha Herode ni alletwaaye. Vano mwenooyo aamukoha mwaanooyo wi, “Onapaalla kiwinnye tini? Kineerowinnya erive ello onapaalleewe.”

²³ Nave aamusimikizella wi, “Kinimallupella wi erive ello onaakivekeewe kineerewuuvaha! Naari wuukawella omwenaakoolla variyari!”

²⁴ Vano mwaanooyo aakhuma vaatte wi aakohe amennya wi, “Kaaveke wi kinapaalla tini?” Yahaakhulla wi, “Muru wa Yohane Oobatiza.”

²⁵ Mwaanooyo ahaakuva ohokollweella wa mwenooyo amulleella wi, “Kinapaalla wi nyuwaano mukivahe enthawi yeella muru wa Yohane Oobatiza ori mumbaleni!”

²⁶ Vano mwenooyo aamoriwa ethakaraka koma khaapanlle omuwatteelliha mwaanooyo kaambiiwa aallupella vamiitthoni va alletwaaye.

²⁷ Enthawi yeeyo aamurumiha akhoto amulamulella wi aweena muru wa Yohane. Akhotooyo aaya ondendenko aphadda muru wa Yohane.

²⁸ Nave awiillena murooyo ori mumbaleni amwinnya mwaanooyo, nayeene awinnya amennya.

²⁹ Oohuddera a Yohane yiiwalliiwa ddenndda, yaawa ekusa mutembwaaye nave yaawuvittha.

Yesu anachiha mulloko wa athu muullupalli

³⁰ Amurummwa yaawa ekumana ni Yesu nave yaamulleella ddittheddene yeerilliiwa ni yahuddihalliiwa.

³¹ Waakhalla athu anchichi oowa wa Yesu ni oohudderaaye vawi kheyaaphwanyille enthawi yawi eche. Vano aallota wa oohudderaaye wi, “Hankoni nivenye mva niye ohakani, onipuroni na weekhiihu wi mwiithuuwe vang'ono.”

³² Vano yaatimulla vakallawani oya ohakani, onipuroni na weekhiiwa.

³³ Koma athu anchichi yaawoona nave yaadduwella nko yayiiwa. Vano yaawa ovenyera m'matawoni mutthemwene ethamakella vahoollo yeetaka vatthi mukhwipi mwa enyanja ephiya onipuroninko Yesu ni oohudderaaye ehinaphiye.

³⁴ Yesu akhumalleeye mukallawanimmo, aawoona mulloko wa athu muullupalloolle nave ahaamorella ethakaraka kaambiiwa yaari wonanko enkhosa ddoohikhalla ni mbusa. Sika ahaamba waahuddiha ddeko ddinchichi.

³⁵ Misikuwa yaayo oohudderaaye yaawa ellota wi, “Nndduwa noovollowa nave mva tti vahakani va weekhiihu.

³⁶ Sika mwaalleelle athu eye m'mizi ddawaatamella wi yakulle ddoocha ddiwa.”

³⁷ Koma Yesu ahaakhulla wi, “Nyu mwaavahe yoocha.” Vano yaamukoha wi, “Munapaalla wi namukulle buledi a makobiri 200 wi naachihelle athu attheenaalla?”

³⁸ Yesu ahaakoha wi, “Muri ni mitthi dda buledi mikavi? Khaweni moone.” Yoonilliiwa, yaamulleella wi, “Mitthi dda buledi mitthanu ni ehomba piilli.”

³⁹ Vano Yesu ahaalamula oohudderaaye wi yaakeraatthihe athwaayo m'millokoni vamanasini makitthi.

⁴⁰ Sika athwaayo yaakeraatthi vatthi, m'millokoni dda athu 100 ni milloko dda athu 50.

⁴¹ Vano Yesu aakusa mitthi dda buledi mitthanu ni ehomba piillinndde, aweha oddullu, avekella omuthokoza Mulluku nave amumeyameya buledooyo. Vano aawinnya oohudderaaye wi emuvelleelle wa athu. Aameyameyattho ehomba piillinndde aakawella attheenaayo.

⁴² Attheenaayo yaacha, evona.

⁴³ Nave oohudderaayo yaatotella ddoohalla dda buledi ni ehomba ddooddalla mitaanga khumi ni miilli.

⁴⁴ Allopwana ayo yaachille yaari 5,000.

Yesu aneeta vamaaddini

⁴⁵ Enthawi yeeyo Yesu ahaalamulella oohudderaaye wi ewelle mukallawani nave ehoolle oya o etawoni ya Betisaida, okhopella wa enyanja, vaavottho ahaalleella athwaalle wi eroweke.

⁴⁶ Aallaanyille athwaayo, aawella m'mwaangoni wi avekelle.

⁴⁷ Wasikuwalliiwa, ekallaweelle yaari variyari va enyanja nave Yesu aari yeekha omutundani.

⁴⁸ Ahoona wi oohudderaaye enahoowa ni ephevo kaambiiwa ephevweeyo yaawa mwawoopanana. Ohinase enthawi eri variyari va 3 koloko ni 6 koloko, Yesu aawa wa oohudderaalle eetaka va enyanja. Nave ahanlle vang'ono waakhwaranya.

⁴⁹ Koma yamoonilliiwa eetaka va enyanja, yaaganiza wi tti mutthowa nave yaakhuwa.

⁵⁰ Attheenaayo yaamoona olliyooyo nave yahoova wunchichi. Koma enthawi yeeyo Yesu aallota wa alliwaayo wi, “Llipani murima! Tti miyaano, muhoove!”

⁵¹ Vano aawella mukallawanimmo nave ephevweeyo yaamaalla. Oohudderaayo yaattikhina wunchichi,

⁵² kaambiiwa yaari ehiniiwesese ottaphullella wa ochiha athu 5,000 vawi yaari awumma mirima.

Yesu anaachiriha athu oovoriiwa o Genesareti

⁵³ Yesu ni oohudderaaye yaallapuwa enyanja ephiya o echigawo ya Genesareti nave emakellella ekallawiiwa mukhwipi mwa enyanja.

⁵⁴ Yakhumalliiwa mukallawanimmo, enthawi yeeyo athu awenkwaayo yaamudduwella Yesu.

⁵⁵ Athwaayo yaathamaka mu echigawo mutthemwene yaamba owaana oovoriiwiiwa m'machirani omapuroni nko yiiwalliiwa wi Yesu aari wenko.

⁵⁶ Virive veko vayiille Yesu, m'mizi ni m'matawoni, athu yahaakusa oovoriiwiiwa eyaana omusika ni omuveka wi oovoriiwaayo awaakhullelle ottannya naari mukhwipi mwa yawiikhuneellaaye. Nave attheene yattannyillaayo yaachirihiwa.