Mariko 5 - Mawu a Mulluku

Yesu anamuchiriha muthu ookhalla ni minepa ddoonanara

¹ Yesu ni oohudderaaye yaaphiya o echigawo ya athu a o Gadara vakhopella va enyanja ya Galileya.*

² Enthawi yeeyo Yesu akhumalleeye mukallawanimmo, aakumana ni muthu oovenyera omakhunguni nko wavitthiwa athu ookhwa. Muthoolla aakhalla ni munepa woonanara.

³ Nave wookhalla waye waari variyari va makhungwaayo. Khaarivottho muthu oowora ommaka naari ni onyolo.

⁴ Vawi wiilliwiilli manyallwaaye ni mattaaye ddakhalla ddoomakiwa ni onyolo koma enthawi ddittheddene olliye aanaphadda onyolooyo. Nave khaarivo muthu aari ni masiva oomugonjihana.

⁵ Otthaana ni mahiiyu akhallella weetave m'makhungunimmo ni m'mwaangoni, akhuwaka ni wiiphoriiha yeekhaaye ni malluku.

⁶ Ari voorekama vang'ono, amoona Yesu. Vano aathamaka nave aakokhora vamiitthoni vaye.

⁷ Nave aakhuwa wi, “Yesu, Mwaana a Mulluku Muullupalli! Nuullikalleni tini nyuwaano? Ekaamba ya Mulluku, kinimuuvekani, muhikillake miyaano!”

⁸ Aallotille ddenndda kaambiiwa Yesu aari allotille wi, “Munepa woonanara, khumamo mwa muthoolla!”

⁹ Vano Yesu aamukoha wi, “Nnddina nawo ttaani?” Muthooyo ahaakhulla wi, “Nnddina naka tti Mulloko kaambiiwa nirivo anchichi!”

¹⁰ Nave minepa ddoonanarannddo ddaamuvekave Yesu wi ahiddikhumihelle otte wa echigawo.

¹¹ Vakhuviru ni vaavo vaakhalla mulloko muullupalli wa ekumba ddichihiwaka.

¹² Vano minepa ddoonanarannddo ddaamuveka Yesu wi, “Munirumihe wa ekumbannddo wi navollowemo.”

¹³ Ahaakhullella wi ddavollowe sika ddaakhuma navettho ddaavollowa mu ekumbammo. Vano mulloko wa ekumba muttheene waari 2,000 waathamaka ni okitthella munyanjammo nave waamorellamo opwina m'maaddinimmo.

¹⁴ Oochiha ekumbannddo yaathawa eya yavuwiha epilli o etawoni ni omapuroni mattheene a m'mizi. Athu yaakhuma wi yoone yeereyeeyo.

¹⁵ Yaphiyalliiwa wa Yesu, yaamoona muthu oyo aari ni minepa ddoonanara ddinchichi akeraatthille vaavo. Aari awanre phaama, ari ni maganizo aphaama. Nave attheenaayo yahoova.

¹⁶ Yoonille ddittheddenaayo yahaalleella athu ddeereye wa muthu ookhalla ni minepa ddoonanarooyo ni dda ekumbannddo.

¹⁷ Sika yahaamba omuveka Yesu wi avenyewo o echigawo yeeyo.

¹⁸ Yesu awenlleeye mukallawanimmo, muthu aari ni minepa ddoonanaroolle aamuveka wi, “Mukaakhullelle wi kuuthwareni!”

¹⁹ Koma Yesu khaamwaakhullelle nave aamulleella wi, “Rowa owaninyu o nibanja nawo, waalleelle nnddo Apwiya eweerelleewe ni dda echifundo eriiwana va weyaano.”

²⁰ Sika muthoolle aavenya aya o Dekapolisi* nave ahaamba waalleella ddeko ddittheddene nnddo Yesu amweerelleeye. Athu attheene yiiwallaayo yaattikhina.

Yesu anamuchiriha mwaana aamutthiyana a Yairo ni mutthiyana mmodda

²¹ Yesu aallapuwattho oya vakhopella va enyanja. Athu anchichi yaatthukumana moomwaapheella olliyooyo aariiye mukhwipi mwa enyanja.

²² Vano Yairo, mmodda a attekweene a mu enyumba yamavekello, aaphiya. Amoonilleeye Yesu, aamukokhorella vakhuviru ni olliye.

²³ Aamuvekesesa wi, “Mwanaka aamutthiyana ari vakhuviru okhwa. Pepaani, muwe mwiiyaatthi mattaanyu va olliyooyo wi achirihiwe nave akhalle mukumi!”

²⁴ Vano Yesu aatimulla athaanana ni Yairo. Nave athu anchichi yaamuthwara Yesu nave mulloko waathooyo waampanikiza.

²⁵ Nave vaavo vaakhalla mutthiyana oohoowa ni ereta yoohikhumamo oonille mweeri wa miyakha khumi ni miilli.

²⁶ Aavoriiwa wunchichi, avahiweeye murete ni allupa murete anchichi, aallivella ddeko ddittheddene aariiyena koma khaachirihiwe nave ereta yaavirellella wunnuwa.

²⁷ Mutthiyanooyo ahiiwa dda Yesu, sika aawa m'mullokonimmo otulli waye attannya yawiikhuneella ya Yesu.

²⁸ Vawi aallota m'murimani mwaye wi, “Naari kakhulla moona ottannya yawiikhuneellaaye, kineerochirihiwa.”

²⁹ Aattannyilleeye yawiikhuneelleelle enthawi yeeyo ereteeyo yaamaalla. Nave ahoona yeekhaaye m'mwiillini mwaye wi oochirihiwa.

³⁰ Enthawi yeeyo Yesu ahoona m'mwiillini mwaye wi mamodda a masivaaye oochiriha aakhumamo. Sika ari m'mullokoni waathwaayo aarukunuwa akoha wi, “Attannyille yawiikhuneellaaka ttaani?”

³¹ Oohudderaaye yahaakhulla wi, “Munnoona wi athu anchichi enimuupanikizani nyuwaano. Munakoherati wi, ‘Akittannyille ttaani?’ ”

³² Nave Yesu aawehaweha wi amoone oyo aamuttannyille.

³³ Vano mutthiyanooyo voodduwellani emweereyelleeyo, aawa moowoova atthukumellaka, akokhora vamiitthoni vaye. Nave aamulleella ddawoona ddittheddene.

³⁴ Yesu aallota wa mutthiyanooyo wi, “Mutthiyana we, echikhulupilwaawo yohuuchiriha. Rowa ni murendelle, woochirihiwa.”

³⁵ Waari Yesu allotaka ddenndda, yaaphiya oorumiwa oovenyera o enyumba ya Yairo, emulleella Yairooyo wi, “Mwanawo aamutthiyanoolle ookhwa kaambiiwa tini onavirellelleewe waakatamiha ahuddihaalla?”

³⁶ Koma Yesu khaapwathille ddoollotiwannddo nave aallota wa Yairooyo wi, “Ohoove koma weeremoona okhulupilila.”

³⁷ Vano Yesu aavenyavo ni Petro, Yakobo ni Yohane, mwanamunne a Yakobo koma khaawaakhullenlle athu amodda wi athaananena.

³⁸ Yaphiyalliiwa o enyumba ya Yairo, Yesu ahoona mulloko wa athu winllaka ni woopa ekutho mookhuwa.

³⁹ Avollowilleeye aakoha wi, “Kaambiiwa tini muninlleenyu ni woopa ekutho? Mwaanoolla khakhwille koma animakona!”

⁴⁰ Yaamuttheya mweepewe, sika ahaakhumiha. Ahaakusa attiitthinnya a mwaanooyo, amennya ni oohudderaaye araru, evollowa mmo mwaari mwaanooyo.

⁴¹ Aamuphara nnatta naye allota wi, “Talitha, kumi!” (Ottaphullella wi, namwalli we, kinallota wa weyaano wi ovenye.)

⁴² Enthawi yeeyo aavenya, aamba weeteeta. (Aari ni miyakha khumi ni miilli.) Ddeereye ddenndda, yaattikhina wunchichi.

⁴³ Vano Yesu ahaalamulella moollipiha wi ehimulleelle arive muthu ddeereyillennddo. Ahaalleellattho wi emuvahe mwaanooyo yoocha.