Mariko 4 - Mawu a Mulluku

Niphwanaphwaniho na mullupa oomidda

¹ Yesu ahaamba ohuddihattho vakhuviru ni enyanja ya Galileya.* Athu anchichi yaatthukumana moomwaapheella sika aawella mu ekallawa eyo yaari m'maaddini. Aakeraatthi mwemmo nave mulloko wa athooyo wiimenlle mukhwipi mwa enyanja.

² Nave aanaahuddiha ddeko ddinchichi mwawi maphwanaphwaniha. Aanallota wi,

³ “Ngiiwani! Enthawi emodda waakhalla muthu ayiille woomidda mmiddo.

⁴ Amiddeeye mmiddooyo, mmodda wamorenlle muttilla nave epallame ddaawa ddiwuchamo.

⁵ Mmoddooyo wamorenlle vamallukuni mvo vaari ethaya yooyeva. Mmiddooyo waamella mwawaakuva kaambiiwa ethayeeyo kheyaari yinchichi.

⁶ Koma nndduwa nakhumalliiwa ddoomella dding'onong'ononnddo ddaanyaalla ni wumma kaambiiwa misisi ddiwa khaddaayiille vatthi mookwakhwana.

⁷ Mmiddo mmodda wamorenlle variyari va miiwa, miiwannddo ddahunnuwa ddikhwaranya ddoomella dding'onong'ononnddo nave ddaaddikhuneella, sika ddoomellannddo khaddawimmalle.

⁸ Mmiddo mmodda wamorenlle va ethaya yaphaama nave ddoomellannddo ddahunnuwa ni wimma ezipaso, ddimodda 100, ddimodda 60, ddimodda 30.”

⁹ Vano Yesu aamallihella ni ollota wi, “Ngiiwani vano mwaarina maaru awiiwana!”

Yoolinga ya maphwanaphwaniho

¹⁰ Vano Yesu aariiye yeekha, amodda ayo yamwiiwalle yaawa wa olliye ni oohuddera khumi ni eelli, emukoha dda yoolinga ya maphwanaphwanihwaayo.

¹¹ Nave ahaakhulla wi, “Wa nyuwaano woovahiwa odduwella ddookhuweya dda omwene wa Mulluku koma amodda ayo ehiri a mullokwaahu, erive ello enahuddihiwa wa alliwaayo m'maphwanaphwanihoni.

¹² Nndda ddiri ddiidda wi, ‘Ennaweha, koma khenoonesesa, nave enniiwa, koma kheniiwesesa. Vawi yeerilleke ddiiddo yaaweerorukunuwella wa Mulluku nave aaweerewaakhululukella.’ ”

Ottaphullella wa niphwanaphwaniho na mullupa oomidda

¹³ Yesu ahaakoha wi, “Khamuniiwesesa niphwanaphwanihonna? Vano munaawiiwesese mwawiidde maphwanaphwaniho mamodda?

¹⁴ Mullupa oomiddoolle, annamidda mawu a Mulluku.

¹⁵ Athu amodda tti wonanko mmiddo oyo wamorenlle muttilla. Yiiwa mawu a Mulluku, enthawi yeeyo Satana annawa awaakha mawu ayo yaamiddiwe wa alliwaayo.

¹⁶ Athu amodda tti wonanko mmiddo oyo wamorenlle va ethaya ya vamallukuni. Yiiwa mawu a Mulluku, enthawi yeeyo ennawaakhella moohakallalla.

¹⁷ Koma enakhalla wonanko ddoomella ddoohikhalla ni misisi nnddo ddihinallekella onyaalla. Vawi ddookatamiha ni ddoohoosa ddawa ekaamba yawi enakhulupilila mawaayo, ennahiya enthawi yeeyo.

¹⁸ Athu amodda tti wonanko mmiddo oyo wamorenlle variyari va miiwa. Alla sika ayo yiiwalle mawu a Mulluku,

¹⁹ vawi ennaviheeriwa ni dda va ellapo ni okonda eyuuma ni minkhella dda ddoohiyanahiyana. Othengooyo onnakhuneelliwa sika khonakhalla ni ezipaso.

²⁰ Nave athu amodda tti wonanko mmiddo oyo wamorenlle va ethaya yaphaama. Enniiwa mawu a Mulluku, enawaakhullella nave ennimma ezipaso, ddimodda 100, ddimodda 60 ni ddimodda 30.”

Enyali yookhuneelliwa ni muno

²¹ Yesu aallota wi, “Khaavo muthu anakhariha enyali, ayikhuneella ni muno apaalle ayihiya vatthi va bedi. Koma anayihiya va yoohiyavo enyali.

²² Erive yawiipittheya eneerewuupullulliwa navettho erive yookhuweya eneerodduwanyeya.

²³ Ngiiwani vano mwaari ni maaru awiiwana!”

²⁴ Aallotattho wi, “Oyo ari ni maaru iiwesese! Mulluku aneerophariha mutteko mulingo wa nyuwaano woophwanaphwana ni oyo munaphariheenyu mutteko wa athu amodda naarittho aneerewuuvahani moovirellella.

²⁵ Vawi muthu arina ello aneerewaanjereriwa. Koma muthu oyo ahinna ello aneerewaakhiwa naari eng'onong'ono ariiyena.”

Niphwanaphwaniho na mmiddo wawunnuwa

²⁶ Yesu aallota wi, “Omwene wa Mulluku tti wonanko muthu anamidda mmiddo m'matani mwaye.

²⁷ Olliyooyo anakhulla okona erive mahiiyu, anavenya orive ohinase koma mmiddooyo onnamella wunnuwaka. Nave khanadduwella ddineereya mwawiidde.

²⁸ Ethaya sika eneeriha mmiddo wi wimme, vawaamba mmiddooyo onnamella nave ottaphulla, voomallihella onniimma tirigu.

²⁹ Tirigooyo imma, enthawi yeeyo muthooyo annakusa echikwakwa anamutullana tirigooyo kaambiiwa enthawi yoohata yookwakhwana.”

Niphwanaphwaniho na mmiddo wooyevesesa

³⁰ Yesu ahaakoha wi, “Omwene wa Mulluku niphwanaphwanihe ni tini? Ninaapharihe mutteko niphwanaphwaniho niivi wi nitthopoolle?

³¹ Omwene wa Mulluku tti wonanko mmiddo wa muteekho wa masitadi. Vano waamiddiwaka muthayani onakhalla ori wooyevesesa ohiyana ni orive mmiddo mu ellapo yavatthi.

³² Koma wamiddiwa onnannuwa onakhalla muullupalli ohiyana ni ddoomella ddittheddene. Enthambi dduullupalli ddinnaphuwa sika epallame ddinnamaka emphuru m'muuthuuchini mwiwa.”

³³ Yesu aanallalleya othengaaye wa athu m'maphwanaphwanihoni manchichi wonanko yaalla. Aanaahuddiha mwawi ddiidda moollikana ni wiiwesesa wiwa.

³⁴ Khaallota erive ello wa alliwaayo moohiphariha mutteko niphwanaphwaniho. Koma akhalla yeekhaaye ni oohudderaaye aanaatthopoollella ddittheddene.

Yesu anamaalliha ephevo yuullupalli

³⁵ Misikuwa a nllapo nenno Yesu aallota wa oohudderaaye wi, “Hankoni nillapuwe niye vakhopella va enyanja.”

³⁶ Vano yaahiya mulloko waathooyo nave oohuddera yaawella mukallawanimmo yamphwanyilliiwa Yesu akeraatthille khalle nave yahaamba ollapuwa ni olliyooyo. Ekallawa ddimodda ddaari vaavottho.

³⁷ Moorurumusa ephevo yuullupalli yawoopiha yahoopa nave ekallaweelle yaatikheya. Sika maaddi yahaamba ovollowa mukallawanimmo nave yahanlle vang'ono oddallamo.

³⁸ Yesu aari otulli wa ekallaweeyo nave aamakona murwaaye ori va yoohameella muru. Oohudderaalle yaamuvenyiha ellota wi, “Ahuddihi, khamunakhupanya wi nihanlle vakhuviru okhwa?”

³⁹ Vano aavenya asimwella ephevweeyo nave aallota wa maaddaayo wi, “Okhurumuwe! Omaalle!” Vano ephevweeyo yaamaalla nave vaakhalla okhurumuwa wuullupalli.

⁴⁰ Nave Yesu aallota wa oohudderaaye wi, “Kaambiiwa tini munooveenyu? Khamunnave echikhulupililo?”

⁴¹ Nave alliwaayo yahoova wunchichi ekohana wi, “Muthu yoolla tti awiidde? Naari ephevo ni maaddi ddinnamwiiwellella!”