Mariko 3 - Mawu a Mulluku

Muthu a nnatta noorakalla

¹ Yesu aavollowattho mu enyumba yamavekello nave aamuphwanyamo muthu a nnatta noorakalla.

² Nave athu amodda yaamweetellella Yesu wi yoone eeki amuchirihe muthooyo va nllapo na Sabata wi emwiipe mullatu.

³ Yesu aallota wa muthooyo wi, “Ngawa wuno wi arive muthu awooneke.”

⁴ Nave ahaakoha athwaayo wi, “Malamulwaahu enanaakhullella weera tini va nllapo na Sabata? Weera ddaphaama apaalle weera ddoonanara? Omvullusa muthu apaalle omwiipha?” Koma kheyaamwaakhunlle.

⁵ Yesu ahaaweha moonanariwa komattho ahaamoriwella ethakaraka kaambiiwa yaari athu awumma murima. Vano aallota wa muthu a nnatta noorakalloolle wi, “Okolla nnatta nawo.” Ahookolla nave naachirihiwa.

⁶ Vano Afarisi* yaakhumamo mu enyumba yamavekellweeyo wi yakumane ni athu a mulloko wa Herode* wi yiiwanane ddoomwiipha Yesu.

Mutthukumano wa athu vakhuviru ni enyanja

⁷ Yesu ni oohudderaaye yaaya o enyanja ya Galileya* nave mulloko muullupalli wa athu woovenyera o Galileya, woovenyera o Yudeya waamuthwara.

⁸ Athu anchichi yaawa ovenyera o Yudeya, o Yerusalemu, o echigawo ya Idumeya, o echigawo ya wookhuma nndduwa wa Yordani ni ovenyera omapuroni awaapheella mizinda dda Tiro ni Sidoni. Athwaayo yaawa wa Yesu kaambiiwa yaaniiwa dda ddeko ddittheddene eereeye.

⁹ Ekaamba ya mulloko wa athwaayo Yesu ahaalleella oohudderaaye wi ekhalle ni ekallawa vakhuviru, vatthi viri mullokooyo ompanikizaka.

¹⁰ Vawi aanaachiriha athu anchichi sika athu oovoriiwa yaanakakhana wi ni alliwattho emuttannye.

¹¹ Nave minepa ddoonanara ddamoona Yesooyo, ddaanamorella vatthi ddikhuwaka wi, “We sika Mwaana a Mulluku!”

¹² Koma aaddilamula moollipa wi ddihimulleelle arive muthu dda olliyooyo.

Yesu anaatthoolla amurummwa khumi ni eelli

¹³ Vano Yesu aawella m'mwaangoni addiithanella athu ayo aapanlleeye. Nave yaawa wa olliyooyo.

¹⁴ Nave ahaatthoolla khumi ni eelli, ayo aaromonlleeye wi amurummwa wi ekhalle ni olliye nave erumihiwe woollalleya.

¹⁵ Nave ahaavaha olamulello wookhumiha minepa ddoonanara.

¹⁶ Athu khumi ni eelli yatthoolliwaayo yaari Simoni (oyo Yesu aamuvahilleeye nnddina nawi Petro),

¹⁷ Yakobo ni mwanamunne Yohane, anamwani a Zebedayo (ayo Yesu aavahilleeye nnddina nawi Aboanereje ottaphullella wi, amasiva wonanko ogugudeya wa murimu),

¹⁸ Andreya, Filipo,* Bartolomeyu, Mateyu, Tomasi, Yakobo, mwaana a Alifeyu, Tadeo, Simoni a mulloko wa endale wa Azelote*

¹⁹ ni Yudasi Isikariyoti oyo amuvelleelle Yesu wi iiphiwe.

Yesu ni Belezebulu

²⁰ Yesu ayiilleeye owaniwa, athu anchichi yaatthukumanattho wawi Yesu ni oohudderaaye kheyaaworille ocha.

²¹ Abalaaye yiiwalliiwa ddenndda yaawa wi emukuse kaambiiwa yaganiza wi tti mullupaanepa.

²² Ahuddihi amodda a malamulo oovenyera o Yerusalemu yaallota wi, “Ookhalla ni Belezebulu!* Tti Belezebulu, muullupalli a minepa ddoonanara, anamuvaha olliye masiva ookhumiha minepa ddoonanara.”

²³ Vano Yesu aawiithana alliwa allota moophwanaphwaniha wi, “Satana, oyo ari Belezebulu, anaawore wiikhumiha yeekhaaye mwawiidde?

²⁴ Orive omwene wakawaneya va weekhiiwa ni owana, khollekella omalla.

²⁵ Navettho nibanja nakawaneya va weekhiiwa ni owana, khanillekella omalla.

²⁶ Vano omwene wa Satana wakawaneya va weekhiiwa ni owana, khollekella koma oneeromalla.

²⁷ “Nave khaavo muthu anawora ovollowa mu enyumba ya muthu amasiva ni wiiyamo ddeko ddaye ahaambille ommaka muthu amasivooyo. Eera ddiiddo anniiya dda mpammo.

²⁸ “Ddawoona, kinimuulleellani wi erive machimwiiwa ni ollota epewe wiwa ddineerokhululukelliwa.

²⁹ Koma oyo anallotella epewe Munepa Waweella khakhululukelliwa enthawi yeella naari muhoollo vawi oochimwa woohimalla.”

³⁰ Yesu allotille ddenndda kaambiiwa athwaayo yaanallota wi, “Ookhalla ni munepa woonanara.”

Amennya ni asinne a Yesu

³¹ Vano amennya a Yesu ni asinne yaaphiya va enyumba eyo Yesu aariiye. Yahiimella vaatte, emurumiha muthu mmodda wi amwiithane.

³² Athu anchichi yaakeraatthi moomwaapheella Yesu nave aallota wi, “Amennyu ni asinninyu ni arokorinyu eri vaattemva, emmawaashaashani.”

³³ Koma Yesu aawaakhulla wi, “Amoowaaka ttaani? Asinnaka ttaani?”

³⁴ Ahaaweha athu yakeraatthille moomwaapheellaayo allota wi, “Nyu sika muri amoowaaka ni asinnaka!

³⁵ Oyo aneera ddoopaalla dda Mulluku sika mwanamunnaka, murokoraka ni amoowaaka.”