Mariko 2 - Mawu a Mulluku

Yesu anamuchiriha muthu oorakalla

¹ Viviralle mallapo ooyeva Yesu aahokollweella o Kaperenao nave epilli yahiiweya wi oophiya owaniwa.

² Vano athu anchichi yaatthukumana mpa sika vookeraatthi vaarama naari vamullakoni vaatte va enyumbeeyo vaaddalla. Yesu aanallalleya othenga waphaama wa athwaayo.

³ Vano athu amodda yaawa wa Yesu ni muthu oorakalla atukhulliwe ni allopwana asese.

⁴ Ekaamba ya mulloko wa athu yatthukumannaayo kheyaaworille omuphiyerana muthooyo. Sika yaaphovolla vaddullu va enyumbeeyo owehanana ni vaari Yesu emukitthiheravo akonaatthille vamachirani.

⁵ Yesu vawoonani echikhulupililwiiwa, aallota wa oorakallooyo wi, “Mukhwaaka, machimwaawo aakhululukiwa.”

⁶ Ahuddihi a malamulo* yakeraatthille vaavwaayo, yahiikoha weekhiiwa m'murimani mwiwa wi,

⁷ “Kaambiiwa tini analloteeye mwawi ddiidda? Anamullotella epewe Mulluku! Mullukuve sika anawora okhululukella machimo!”

⁸ Enthawi yeeyo Yesu aadduwella maganizwiiwa, sika ahaakoha wi, “Kaambiiwa tini muniikoheenyu ddennddo m'murimani mwanyu?

⁹ Yookhweya ttiivi, omulleella muthu oorakalla wi, ‘Machimwaawo aakhululukiwa,’ apaalle ollota wi, ‘Venya, kusa machiraawo, weete’?

¹⁰ Kineerowoonihani vano wi mi, Mwaana a Muthu, kookhalla ni olamulello va ellapo yavatthi wookhululukella machimo.” Sika aallota wa muthu oorakallooyo wi,

¹¹ “Kinallota wa weyaano wi, venya, kusa machiraawo, oroweke owaninyu!”

¹² Attheenaayo yoonaka, muthooyo aavenya nave enthawi yeeyo aakusa machiraaye, akhuma vaatte. Athu attheene yaattikhina emutitimiha Mulluku, ellotaka wi, “Ddeko ddenndda khaninaddooneke waambeella khalle!”

Yesu anamwiithana Levi

¹³ Yesu aahokollweellattho mukhwipi mwa enyanja ya Galileya.* Athu anchichi yaamutthukumanella nave aanaahuddiha.

¹⁴ Eetilleeye oya vahoollo, aamoona Levi, mwaana a Alifeyu, akeraatthille mu enyumba yookhomihella misonkho. Aamulleella wi, “Kithware.” Nave Levi aavenya anamuthwara.

¹⁵ Yesu achaka mpa mwa Levi, ookhomiha misonkho anchichi ni amodda oochimwa ayo yamuthwara Yesu yaaphiya navettho yaacha ni Yesu ni oohudderaaye.

¹⁶ Ahuddihi a malamulo a mulloko wa Afarisi* yahoona wi Yesu aanacha ni athu amodda oochimwa ni ookhomiha misonkho, sika yahaakoha oohudderaaye wi, “Kaambiiwa tini anacheeye ni athu yaalla?”

¹⁷ Koma Yesu aawiiwa nave ahaakhulla wi, “Athu oohivoriiwa khenaya wa mullupa murete koma yaayove enavoriiwa. Miyaano ngiwiille wi kiwiithane athu oolungama koma athu oochimwa.”

Nikoho na dda ohalla ocha

¹⁸ Oohuddera a Yohane Oobatiza ni Afarisi yaanahalla ocha.* Athu amodda yaawa wa Yesu emukoha wi, “Kaambiiwa tini oohuddera a Yohane Oobatiza ni oohuddera a Afarisi enahalliiwa ocha koma oohudderaanyu khenahalla ocha?”

¹⁹ Yesu ahaakhulla wi, “Ethiyo ttuuworeya wi awiithaniwa o machellello a okwati ehalleke ocha ootthellooyo ari vaavo? Wohiworeya iyaayi! Ootthellooyo ari vaavo khonapaalleya ohalla ocha.

²⁰ Koma eneerophiya enthawi yawi ootthellooyo aneerokusiwa va yaayo nave eneerohalla ocha.

²¹ “Khaavo muthu anakusa echigamba ya ekuwo esha asowella va yoowara yakhalle. Vawi echigamba esheeyo eneerokwinyeya ni waahulla yoowareeyo wunchichi ohiyana ni khalle.

²² Navettho khaavo muthu anamuhella vinyo musha mu mathumba anttapara akhalle vawi mathumba yaayo eneerophulleya, vinyooyo aneerotathiyamo nave mathumbaayo eneerewoonongeya. Koma vinyo mushooyo anahelliwa m'mathumbani asha.”

Nikoho na dda nllapo na Sabata

²³ Nllapo nimodda na Sabata Yesu ni oohudderaaye yaheeta variyari va emata ddimodda dda tirigu. Oohudderaaye yeetaka yahaamba okhoddolla makalla a tirigu.

²⁴ Nave Afarisi amodda yaamukoha Yesu wi, “Kaambiiwa tini oohudderaanyu eneeriiwa ddoohaakhullelliwa ni malamulwaahu voopharani mutteko va nllapo na Sabata vookhoddollani makalla a tirigu?”

²⁵ Yesu ahaakhulla wi, “Khamweerengille nnddo Davide enreeye enthawi yeelle olliyooyo ni akhwaaye yahiriwa ni yoocha nave yavolliwiiwa ettalla?

²⁶ Abiyatara aariiye mullupa mukutho muullupalli Davide aavollowa mu enyumba ya Mulluku, amuchamo buledi oovelleelliwa wa Mulluku naari malamulo kheyaakhullelle wi olliyooyo amuche. Allupa mukuthove sika enaakhullelliwa omuchamo buledi yoolla. Nave ahaavahattho akhwaaye ayo aariiyena.”

²⁷ Nave Yesu aamallihella ni ollota wi, “Nllapo na Sabata nakeraatthihiwe wi nikhalle nowaapindulella athu, ohiri wi athu yaphatusiwalle ekaamba yoopindulella nllapo na Sabata.

²⁸ Nave mi, Mwaana a Muthu, sika kiri mwaneena a nllapo na Sabata.”