Mariko 16 - Mawu a Mulluku

Yesu anavenyihiwa wa ookhwa

¹ Niviralle nllapo na Sabata, Mariya Magadalena ni Mariya, amennya a Yakobo navettho Salome yaakulla makhura a nthuko naphaama wi yazoze mutembo wa Yesu.

² Osaka wene waari Nllapo Namulungu. Ohinase, nndduwa nikhumalle wene yaaya omahame.

³ Eri muttilla yaakohana wi, “Ttaani anaaniphikiriselle nlluku niri vamullakoni va nihamenne?”

⁴ Nllukunna naari nuullupalli wunchichi koma ephiyalle yahoona wi nllukunne noophikirisiwawo khalle.

⁵ Sika yaavollowa mu mahamemmo, emoona musombwe akeraatthille o nnattanatta, awanre mukanjo waweella nave yahoova.

⁶ Nave aallota wi, “Muhoove vawi kinnadduwella wi munamwaasha Yesu a o Nazareti oyo aatthomeyiwe vamutandani. Yooyo khaamo mmu vawi aavenyihiwa wa ookhwa. Ngoonani, vanipuroni yamuvitthalliiwavo.

⁷ Vano khaweni mwaalleelle oohudderaaye vamodda ni Petro wi, ‘Ari muhoollo mwanyu oya o Galileya. Muneeromoona wenko moollikana ni mmo allotilleeye ni nyuwaano.’ ”

⁸ Sika yaakhuma, ethamaka ovenyera omahamenko, etthukumellaka navettho yoovaka. Kheyamulleelle muthu ddeereyillennddo kaambiiwa yaamoova. [

Omalliha waamodda wakhalle wa Othenga Waphaama woolembiwa ni Mariko 16.9-20 Yesu anooneya wa Mariya Magadalena

⁹ Yesu avenyilleeye wa ookhwa oyaaka ni osa va Nllapo Namulungu, aambille wooneya wa Mariya Magadalena, oyo amukhumihalleeye khalle minepa ddoonanara mitthanu ni miilli. Atthiyana yaaya wa Petro ni akhwaaye yaalleella erive ello yalleelliwiiwa.

¹⁰ Mariyooyo aaya aalleella ayo yamuthwara Yesu, ayo yakhulla moona woopa ekutho ni winlla. Ddimallille nndda Yesu mwaneenaaye aarumiha othengaaye waweella ni woohimalla wa ovullusiwa woohimalla mu ellapo ettheene oweella mwa oohudderaaye.]

¹¹ Koma yiiwalliiwa wi Yesu aari mukumi ni wi aamoona, kheyaamukhulupililalle Mariyooyo.

Yesu anooneya wa oohuddera eelli

¹² Ddimallille ddenndda Yesu ahooneyattho ni mooneyello oohiyana wa oohudderaaye eelli ayo yeeta ovenyera o Yerusalemu.

¹³ Yaahokollowa eya yaalleella akhwiiwa koma kheyaawakhulupililalle.

Yesu anooneya wa khumi ni mmodda

¹⁴ Vatulli viwa ahooneya wa oohuddera khumi ni mmoddaayo mvo yachiiwa. Ahaahumullulla ekaamba yoohikhulupilila ni wumma murima wiwa voohaakhulupililani ayo yamonne avenyille wa ookhwa.

¹⁵ Nave allota wi, “Khaweni o ellapo yavatthi ettheene, mwallalleye othenga waphaama wa athu attheene.

¹⁶ Oyo anaakhulupilile nave abatiziwa aneerovullusiwa koma oyo ahinaakhulupilila aneerollakiwa.

¹⁷ Ookhulupililaayo eneerokodduwanyeya kaambiiwa eneerekeweera ddoottikhiniha. Eneerokokhumiha minepa ddoonanara vooromollani nnddina naka nave eneerekollota ellotello ddoohidduwanyeya.*

¹⁸ Yaphara enowa apaalle owirya ddawiipha khevoreyiwana nave eneerekewiiyaatthi mattiiwa va athu oovoriiwa wi echirihiwe.”

Yesu anawellihiwa oya oddullu

¹⁹ Apwiya Yesu yamanlliiwa ollotanko, yaawellihiwa oya oddullu yakeraatthi o nnattanatta na Mulluku.

²⁰ Oohuddera yaavenya enallalleya virive veko. Nave Apwiya yaapharana mutteko vamodda nave yaanasimikizella ddoollalleya ddiwa wi tti ddawoona vaweerani ddoottikhiniha.] [