Mariko 15 - Mawu a Mulluku

Pilato anamukoha Yesu

¹ Osaka wene ohinase allupa mukutho uullupalli, attekweene a Ayuda,* ahuddihi a malamulo* ni attekweene a millatu attheene yaakumana wi yiiwanane yaweera. Yaammaka Yesu ni onyolo, emukusa, emuvelleella wa Pilato, oolamulella a o Roma.

² Pilato aamukoha Yesu wi, “We tti Mwene a Ayuda?” Yesu ahaakhulla wi, “Mullotillethi nyookha.”

³ Allupa mukutho uullupalli yaamullotella Yesu wi oochimwa ddinchichi,

⁴ Sika Pilato aamukohattho wi, “Khonapaalla waakhulla? Ngiiwa ddittheddene enuullotelliiwanndda!”

⁵ Koma Yesu khaawakhullallettho ello nave Pilato aattikhina.

Mullatu onakamulliwa wi Yesu iiphiwe

⁶ Va erive Ehakallallo ya Paska, Pilato aaddollweella waattaphullella muthu oomakiwa mmodda oyo athu yamupaalliiwa.

⁷ Nave enthawi yeeyo aakhallavo muthu nnddina naye Baraba oyo amakiwe ni athu amodda kaambiiwa yaamwiipha muthu enthawi yawukiliiwa niboma.

⁸ Vano mulloko wa athu waawa waamba omukoha Pilato wi amuttaphulle oomakiwa mmodda wonanko mmo addollweellelleeye.

⁹ Pilato ahaakoha wi, “Munapaalla kuuttaphullelleni Mwene a Ayuda?”

¹⁰ Aadduwella wi allupa mukutho uullupallaayo yaamuvelleelle Yesu wa olliye ekaamba ya ehache.

¹¹ Koma allupa mukutho uullupallaayo yaahaattusha waawatihera athu attheenaayo wi emveke Pilato aattaphullelle Baraba.

¹² Nave Pilato ahaakohattho wi, “Vano munapaalla keerena tini oyo munamuromolleenyu Mwene a Ayuda?”

¹³ Nave yaakhuwa wi, “Mumutthomeye vamutandani!”

¹⁴ Nave Pilato ahaakoha wi, “Eerille tini yoonanara?” Koma yaakhuwa moollipiha wi, “Mumutthomeye vamutandani yooyo!”

¹⁵ Pilato voopaallani waahakallalliha athwaayo, ahaattaphullella Baraba. Sika amuvelleella Yesu wi awashulliwe ni otthomeyiwa vamutandani.

Akhoto enamullotella epewe Yesu

¹⁶ Vano akhoto yaamukusa Yesu eyaana o enyumba ya oolamulella eyo yaari nthato namillatu na Aroma, emutthukumanihella akhoto attheene.

¹⁷ Vano yaamuwariha Yesu mukanjo wooreera woofiira, elluwa echipewa ya miiwa emuwariha m'muruni mwaye.

¹⁸ Yahaamba omvaha mooni wi, “Mooselliwa, Mwene a Ayuda!”

¹⁹ Yaanamuukutha ni ekopo vamuru vaye, emuttapheraka mare, yaanamukokhorella mweepewe.

²⁰ Vano yamallihalliiwa omullotella epewe, yaamurulla mukanjoolle emuwariha ddoowara ddayenndde. Nave yaamuhoolliha oyaana wi yamutthomeye olliye vamutandani.

Yesu anatthomeyiwa vamutandani

²¹ Akhotwaayo yamukusalliiwa Yesu yaakumana ni muthu oovira nnddina naye Simoni, avenyeraka o mizi ayaaka o etawoninko. (Simoni aari a o Kurene, attiitthiiwa a Alekizandro ni Rufu.) Akhotwaayo yaamuwatihera wi areye mutanda wa Yesu.

²² Nave yaaphiyana Yesu vanipuroni nooromolliwa Gologota (Ottaphullella wi, Nipuro na Nikharakadda.)

²³ Yaamuvaha vinyo oottakanyihera ni wamwa wi amuwirye koma khaamuwiryalle.

²⁴ Vano yaamutthomeya vamutandani ni okawana ddoowara ddaye weekhiiwa yoombesille wi yoone ttaani anaakuse eevi.

²⁵ Enthawi yaari 9 koloko ohinase mvo yamutthomeyilliiwa vamutandani.

²⁶ Nave yoolembiwa yoomuvaanyihera yaari yawi, “Mwene a Ayuda.”

²⁷ Vano yaatthomeya vamutandani ezigawenga piilli vamodda ni Yesu, mmodda o nnattanatta ni mmoddooyo o nnatta noonyottho.

²⁹ Athu oovira yaanatikha miru ddiwa enamullotella epewe. Yaanallota wi, “Ha! Weyaano oowora okumulla enyumba ya Mulluku oyimakattho mallapo mararu,

³⁰ wiivulluse weekha nave okitthevo vamutandanimvo!”

³¹ Emoddamoddave yeeyottho allupa mukutho uullupalli ni ahuddihi a malamulo yaamullotella epewe. Yaallota muthu ni mukhwaaye wi, “Aanaavullusa amodda koma khanawora wiivullusa yeekha.

³² Nimoone Mesiya,* Mwene a Israele, kitthavo vamutandanimvo wi noone nave nikhulupilile!” Nave ayo yatthomeyiwena vamodda yaamullotellattho epewe emoddamoddave yeeyo.

Okhwa wa Yesu

³³ Waambeella 12 koloko otthaana ophiyera 3 koloko waakhalla epiphi mu ellapo ettheene.

³⁴ Va enthawi ya 3 koloko Yesu aakhuwa moollipiha wi, “Eloi, Eloi, lama sabakitani?” (Ottaphullella wi, Mullukwaaka, Mullukwaaka, mukihiyere tini miyaano?)

³⁵ Athu amodda yiimenlle vaavo yaamwiiwa nave yaallota wi, “Ngiiwani, muthu yoolla anamwiithana namallotella Eliya.”

³⁶ Vano mmodda a yaayo aathamaka ni esiponje atthaveya mu vinyo oonyuunya, iiyaatthi otthoka wa ekopo amutukhullella owanoni waye wi awirye. Nave aallota wi, “Ngatiyerani, noone eeki namallotella Eliya awe wi amukitthihevo vamutandanimvo!”

³⁷ Yesu aakhuwattho moollipiha nave aakhwa.

³⁸ Nave ekatani yoohiyaniha mapuro meelli a mu enyumba ya Mulluku yahaahuwa okawaneya variyari ovenyera vaddullu ophiyera vatthi.

³⁹ Nave akhoto muullupalli a o Roma iimenlle vahoollo vamutandani ahoona mmo Yesu akhwelleeye, allota wi, “Ddawoona, muthoolla aari Mwaana a Mulluku!”

⁴⁰ Voorekamella vang'ono vaakhalla atthiyana amodda yoonella. Mwa atthiyanaayo mwaakhalla Mariya Magadalena, Mariya amennya a Yakobo mung'onong'ono ni Yosefe; Salome aarittho vaavo.

⁴¹ Yesu aariiye o Galileya atthiyana yaayo yaanamuthwara enamurumeyella. Nave atthiyana amodda anchichi yaawattho ni olliye o Yerusalemu.

Ovitthiwa wa Yesu mu mahame

⁴² Waari nndduwa nivollowille va Nllapo Nookhozekella (nna naari, nllapo na vatulli va nllapo na Sabata).

⁴³ Vano Yosefe o Arimateya mmodda oodduwanyeya, a attekweene a millatu a Ayuda,* aaya moollipa murima wa Pilato wi amuveke mutembo wa Yesu. Yosefe nayeenettho aanatiyerella owa wa omwene wa Mulluku.

⁴⁴ Pilato aattikhina vawiiwani wi Yesu aari akhwille khalle. Aamwiithana akhoto muullupalli amuveka wi oone aarimi akhwille.

⁴⁵ Akhoto muullupallooyo asimikizalleeye wi ookhwa, Pilato aamulleella Yosefe wi akusevo mutembooyo.

⁴⁶ Yosefe aakulla ekuwo, akitthiha mutembooyo, ahuruwella ni ekuweeyo, amuvittha mu mahame oosemiwa vanllukuni. Aaphikirisellawo nlluku nuullupalli omullakoni wa mahamaayo.

⁴⁷ Mariya Magadalena ni Mariya, amennya a Yosefe, yaawehesesa wi yoone mvo avitthiweeye.