Mariko 14 - Mawu a Mulluku

Opangana ddoomwiipha Yesu

¹ Vahanlle mallapo meelli wi niphiye nllapo na Paska ni Ehakallallo ya Buledi Oohikhalla ni Yisiti. Allupa mukutho uullupalli ni ahuddihi a malamulo* yahaashaasha ekaamba yoom'makella ni omwiiphella Yesu moowiipittheya.

² Yaallota wi, “Niheere ella enthawi ya machellello wi vihikhalle mapokoso.”

Yesu anazoziwa makhura o Betaniya

³ Yesu aari o Betaniya mpa mwa Simoni muthu amakatoolle. Yesu achaka, mutthiyana mmodda aawa wa olliyooyo ni makhura a nthuko naphaama oowallamella mutengo ooromolliwa nado mu yookusella. Nave aapwesa etthoka ya yookuselleeyo aamiminella vamuruni va Yesu.

⁴ Vano athu amodda yaasha murima ekohana wi, “Anoonongella tini makhuraalle?

⁵ Makhura yaalla yeerokullihiwa voowallamella mutengo ni waavaha athu oohoowa makobiraayo.” Nave yaamuhumullulla mutthiyanooyo.

⁶ Koma Yesu aallota wi, “Muhiyeni mutthiyanoolla! Munamuhoosella tini? Vawi ookeerella ello yaphaama.

⁷ Vawi munnakhalla ni athu oohoowa mallapo mattheene nave enthawi munapaalleenyu, muneerowora oweerella ddaphaama. Koma khamukhalla ni miyaano mallapo mattheene.

⁸ Yoolla oheera yoophwanella wi eere vookimiminellani makhura vamwiillini vaka okikhozera dda ovitthiwa waka.

⁹ Ddawoona, kinimuulleellani wi orive weko mu ellapo yavatthi ettheene onaallalleyiwelle othenga waphaamoolla, athu eneerollota yeella enreeye wi emuupuwelleke.”

Yudasi anaakhullella omuvelleella Yesu

¹⁰ Vano Yudasi Isikariyoti, mmodda a oohuddera khumi ni eelli, aavenya aya wa allupa mukutho uullupalli wi amuvelleelle Yesu wa alliwaayo.

¹¹ Yiiwalliiwa ddallotilleeye yaahakallalla, emulonjeza wi eneeromuvaha makobiri. Sika Yudasi ahaashaasha mpata woomuvelleellella Yesu.

Yesu ni oohudderaaye enacha yoocha ya Paska

¹² Va nllapo nawaamba na Ehakallallo ya Buledi Oohikhalla ni Yisiti, noomwiipha mwaanaankhosa wi emuche va Paska, oohuddera yaamukoha Yesu wi, “Munapaalla nuukhozereni wuuwi nipuro nawi mwachellevo yoocha ya Paska?”

¹³ Vano ahaaruma oohudderaaye eelli, aalleella wi, “Vollowani m'muzindanimmo nave muneerokumana ni mullopwana atukhunlle muno wa maaddi nave mwamuthware.

¹⁴ Nave avollowa mpa, mwallote ni mwaneena a enyumbeeyo wi, ‘Ahuddihi enakoha wi, eri wuuwi echipindaaka mwawi miyaano ni oohudderaaka nachellemo yoocha ya Paska?’

¹⁵ Vano aneerewuutthoonyiherani echipinda yavaddullu yuullupalli, yowaanddellelliwa phaama ddene. Wenko mwakhozerewo yoocha ya Paskaahu.”

¹⁶ Oohudderaayo yaatimulla, eya m'muzindanimmo, ephwanya ddittheddene ddiri moollikana ni ollota wa Yesu nave yaakhozellawo yoocha ya Paskooyo.

¹⁷ Nave voophiyani misikuwa, Yesu aawa ni oohudderaaye khumi ni eelli mu echipindeeyo.

¹⁸ Vano achaka, Yesu aallota wi, “Ddawoona, kinimuulleellani wi mmodda a nyuwaano oyo anacha ni miyaano aneerokivelleella wa adanaaka.”

¹⁹ Oohudderaayo yahaapheella muru yaamba okoha mmoddammodda wi, “Apaalle tti miyaano?”

²⁰ Yesu ahaakhulla wi, “Tti mmodda a nyuwaano khumi ni eelli, yooyo amurenre buledi mu embale nimodda ni miyaano.

²¹ Mi, Mwaana a Muthu, kineerokhwa moollikana ni ddoolembiwa mu mawu a Mulluku koma ootulli tti muthu oyo anaakivelleelle miyaano! Waaweerokhalla phaama wa muthu yooyo ahiyariweke!”

Mugonelo wa Apwiya

²² Yesu ni oohudderaaye yachiiwa, Yesu aamukusa buledi avekella omuthokoza Mulluku. Vano aamumeyameya buledooyo aavaha oohudderaaye allota wi, “Kusani chani, olla sika mwiillaaka.”

²³ Nave aamukusa kapu, avekella omuthokoza Mulluku nave ahaavaha alliwaayo. Nave attheenaayo yaawiryamo mmoddammodda.

²⁴ Yesu aallota wi, “Nna tti nikhame naka noollipiha echipangano ya Mulluku, nookhumihiwa ekaamba ya athu anchichi.

²⁵ “Ddawoona, kinimuulleellani wi ngiwa kimuwiryattho vinyo ophiyera nllapo nenno kineereemi kimuwiryettho vinyo musha mu omwene wa Mulluku.”

²⁶ Yahiipa nchipo nave yaakhuma eya o mwaango wa Olivi.

Yesu anavallallella ollota wi Petro aneeromuruna

²⁷ Vano Yesu aallota wi, “Nyu attheene muneerothawa okihiya meekhaaka vawi woolembiwa wi, ‘Mukakathe mbusa nave enkhosa dda mulloko ddineeropallalleya.’

²⁸ Koma kavenyihiwa wa ookhwa kineerohoolla oya o Galileya.”

²⁹ Petro aallota wi, “Naari amodda yuuhiyeni, miyaano nguuhiyani.”

³⁰ Yesu aallota wa Petro wi, “Kinimuulleella ddawoona wi, mahiiyu yaalla mutthupi ohininlle wiilli, onaakhalle okikhootille oraru.”

³¹ Petro ahaakhulla moollipihella wi, “Naari ori woophwanella miyaano okhwa ni nyuwaano, nguukhootani.” Nave oohuddera attheenaayo yaallota ello emoddamoddave yeella.

Yesu anavekella mu Getsemani

³² Vano Yesu ni oohudderaaye yawiilliiwa o nipuro nooromolliwa Getsemani, aallota wa oohudderaaye wi, “Khallani vaava, kinayeemi wi kavekelle.”

³³ Aamukusa Petro, Yakobo ni Yohane. Ahaamba okhupanya ni ohoowa m'murimani.

³⁴ Nave aallota wi, “M'murimani mwaka mooddalla ethakaraka ddinchichi ddookhwana. Hallani vaava nave muhikoneke.”

³⁵ Nave aaya vahoollo vang'ono akokhora oweha vatthi nave avekella wi, “Attiitthaaka, waworeya, enthawi ya ddookatamiheella ekikhwaranye!

³⁶ Nave avekellattho wi, Abba, Attiitthaaka ddeko ddittheddene ddinaworeya ni nyuwaano. Mukivenyiherevo kapu a ddookatamihoolla. Ohiri opaalla waka koma opaalla wanyu weereye.”

³⁷ Vano aahokollweella wa oohuddera ararwaalle, aaphwanya yiikimakona. Aallota wa Petro wi, “Simoni onimakona? Khawaaworille okhalla oohikona naari wa enthawi yooyeva?

³⁸ Muhikoneke, muvekelleke wi muhivollowe mooweesiwa. Murimaanyu onnapaalla weera ddaphaama koma mwiillaanyu tti woofooka.”

³⁹ Wiillittho Yesu aaya avekella emoddamoddave yeeyo.

⁴⁰ Awiilleeye ahaaphwanya oohudderaalle ekonakattho vawi yaatopa. Nave kheyaari ni yoomwaakhulla.

⁴¹ Awiilleeye waneeraru, aallota waalliwa wi, “Munimakona ni wiithuuwa? Ddookwakhwanella! Enthawi yookwakhwana yawi mi, Mwaana a Muthu, kivelleelliwe wa athu oochimwa.

⁴² Venyani, hankoni niroweke. Ngoonani, ookivelleella ari vaava.”

Omakiwa wa Yesu

⁴³ Yesu allotaka ddiiddo, Yudasi, mmodda a khumi ni eelli a oohudderaalle, aaphiya ni mulloko muullupalli wa athu ekusalle masupada ni ekoonda erumiwe ni allupa mukutho uullupalli, ahuddihi a malamulo ni attekweene a Ayuda.*

⁴⁴ Vano oomuvelleellooyo ahaavaha echizindikiro wi, “Oyo kinaamukhupaarelleemi tti yooyo, mummake, mumukuse nave mumuwehereke phaama.”

⁴⁵ Enthawi yeeyo Yudasi aphiyalleeye, aaya wa Yesu allota wi, “Ahuddihi!” Eerille ddiiddo aamukhupaarella.

⁴⁶ Sika yaamphara emmaka moollipiha.

⁴⁷ Nave mmodda a yaayo iimenlle vakhuviru aahullulla nsupada amuphadda naaru kaporo a mullupa mukutho muullupalli.

⁴⁸ Nave Yesu aallota wi, “Muphiyalle ni masupada ni ekoonda wi mukimake wonanko miyaano tti echigawenga?

⁴⁹ Nllapo ni nllapo kakhalla ni nyuwaano mu enyumba ya Mulluku ohuddiha koma khamwaakimakille. Koma nndda ddineereya wi mawu a Mulluku ekwakhwanihiwe.”

⁵⁰ Vano oohudderaaye attheene yaamuhiya ethawa.

⁵¹ Musombwe mmodda oyo awanre ekuwove aanamuthwara Yesu, mullokooyo waapaalla omphara olliyooyo,

⁵² koma aahiya ekuwaaye mutulli athawa oohiwara.

Yesu vanthatoni na attekweene a millatu a Ayuda

⁵³ Nave Yesu yaamukusella wa mullupa mukutho muullupalli, nko yaatthukumanne allupa mukutho attheene, attekweene a Ayuda ni ahuddihi a malamulo.

⁵⁴ Nave Petro aamuthwara moomurekamella, ophiyera vanthatoni na mullupa mukutho muullupalli. Aavollowamo akeraatthi ni akhoto oowehera enootha munllo.

⁵⁵ Nave allupa mukutho uullupalli ni attekweene a millatu attheene yahaashaasha omboni woomuvaanyihera Yesu wi emwiiphe koma kheyaaphwanyille.

⁵⁶ Vawi athu anchichi yaavelleella omboni wawoottha dda Yesu nave ombonooyo khawaallikanne.

⁵⁷ Vano amodda yahiimella ellota omboni wawoottha woomuvaanyiha Yesu wi,

⁵⁸ “Hi naamwiiwa allotaka wi, ‘Miyaano kineerokumulla enyumba ya Mullukweella yoomakiwa ni athu nave vavira mallapo mararu kineeromaka emodda yoohimakiwa ni athu.’ ”

⁵⁹ Komattho naari alliwaayo omboniiwa khawaallikanne.

⁶⁰ Vano mullupa mukutho muullupalli ahiimella vahoollo va attheenaayo amukoha Yesu wi, “Khonaakhulla nnddo athwaalla enallotiiwa dda wuuvaanyiha weyaano?”

⁶¹ Nave Yesu khaakhullalle koma aari moona wi llakallaka. Mullupa mukutho muullupalli aamukohattho wi, “We tti Mesiya,* Mwaana a Mulluku Ootitimihiwa?”

⁶² Yesu ahaakhulla wi, “Tti meene nave muneerokoona mi, Mwaana a Muthu, kikeraatthille onnattanatta na Mulluku Amasiva Mattheene kiwaaka vamiraponi ddooddullu!”

⁶³ Mullupa mukutho muullupalli ahaahulla mukanjwaaye, allota wi, “Ninaapaallellatittho amboni amodda?

⁶⁴ Momwiiwa amullotellaka epewe Mulluku. Nyuwaano maganizwaanyu tti awiidde?” Nave attheene yahiiwanana wi anaphwanella iiphiwe.

⁶⁵ Nave amodda yahaamba omuttaphera mare Yesu, emukhuneella owiitthoni waye emuukutha, ellota wi, “Llotella awuukuthalle ttaani?” Nave oowehera yaamukusa emuukuthattho.

Petro anamuruna Yesu

⁶⁶ Petro aari muwari mwa nthato namillatu. Vano aawa namwalli mmodda, mullupa mutteko a mullupa mukutho muullupalli.

⁶⁷ Nave amoonilleeye Petro oothaka munllo, aamuweha, allota wi, “Wettho waari nimodda ni Yesu oovenyera o Nazareti.”

⁶⁸ Koma aaruna, aamwaakhulla wi, “Nginadduwella nave nginiiwesesa onalloteewe.” Nave aakhuma aya okhwipi. Enthawi yeeyo mutthupi wahinlla.

⁶⁹ Mullupa a muttekoolle aamoonattho ari vaavo aamba ollota wa athu yiimenlle vakhuvirwaayo wi, “Olla tti mmodda a yaalla!”

⁷⁰ Koma Petro aarunattho. Viviralle enthawi yooyeva awiimellanaayo yaallotattho ni Petro wi, “Ohirune, weyaano tti mmodda a yaalla vawi weyaanottho onavenyera o Galileya.”

⁷¹ Vano Petro ahaamba wiitembelela yeekhaaye ni ollupella wi, “Nginamudduwella muthu yoolle.”

⁷² Enthawi yeeyo mutthupi wahinlla wiilli nave Petro ahuupuwella Yesu allotilleeye wi, “Mutthupi ohininlle wiilli, onaakhalle okikhootille oraru.” Vano Petro ahaamba winlla.