Mariko 13 - Mawu a Mulluku

Dda okumulliwa wa enyumba ya Mulluku

¹ Yesu akhumalleeye mu enyumba ya Mulluku, mmodda a oohudderaaye aallota wi, “Ahuddihi, ngoonani, malluku ni enyumba ddoophwanelliwanndda!”

² Yesu ahaakhulla wi, “Ethiyo munnoona enyumba dduullupallinndda? Ddawoona, kinimuulleellani wi, vaava khavikhalla nlluku naari nimodda va nikhwaaye nihinaamorihiwe.”

Ddookatamiha ni ddoohoosa

³ Yesu aakeraatthi va mwaango wa Olivi, moowehana ni enyumba ya Mulluku. Vano Petro, Yakobo, Yohane ni Andreya yaawa wa olliye mwa weekhiiwa.

⁴ Yaamukoha wi, “Nilleelleni, ddenndda ddineereye niini? Echizindikiro yawi enthaweeyo yookwakhwana enaakhalle yawiidde?”

⁵ Yesu ahaamba waalleella wi, “Chenjerani wi muthu ahiwoottottheni.

⁶ Vawi athu anchichi eneerophiya mu nnddina naka ni ollota wi, ‘Mi tti Mesiya,’* nave eneerowoottottha athu anchichi.

⁷ Nyuwaano mwiiwa dda ekhoto ni epilli ya ekhoto, muhinahoowa m'murimani mwanyu vawi tti ddoophwanella wi ddeereye koma emallihello khenaphiye.

⁸ Mutundu ni mutundu mmodda oneerekowana navettho omwene ni omwene omodda oneerekowana. Navettho oneerokhalla echivomerezi virive veko owaaka ettalla. Ddeko ddittheddenenndda ddinaakhalle wonanko ddoovoreya ddawaamba mwaana aayariwaka.

⁹ “Sika nyuwaano chenjerani. Muneeromakiwa ni okuselliwa m'mathatoni a millatu nave muneerewuukuthiwa mu enyumba ddamavekello.* Muneerewiimella vamiitthoni va oolamulella ni mamwene kaambiiwa nyuwaano tti oohudderaaka wi mwakhalle amboni a othenga waphaama wa yaayo.

¹⁰ Ehinaphiye mamallihello, othenga waphaama onapaalleya wi ollalleyiwe wa athu attheene.

¹¹ Yuukusellani omillatuni, muhikhupanyeke wi munaaye mwallote tini apaalle munaallote mwawiidde vawi enthawi yeeyo Mulluku eneerewuulleellani yawi mullote. Vawi mawu munaalloteenywaayo khekhalla aanyu koma enaavenyere wa Munepa Waweella.

¹² Athu eneerewaakusa yaavelleelle asinniwa wowiiphiwa nave attiitthi eneereweera emoddamoddave yeeyo wa aniiwa. Nave anamwani eneerewaawukila makhollwiiwa wi ewiiphe.

¹³ Athu attheene eneerowiitani kaambiiwa nyuwaano tti oohudderaaka. Koma oyo anaavillelle ophiya o mamallihello, aneerovulluwa.

Yoonanara yawoononga

¹⁴ “Vano muneerewoona ‘Yoonanara Yawoononga’ yiimenlle mu nipuro noohiphwanella wi yimellevo (Oyo aneerenga mawaalla iiwesese ottaphullella wiwa.) Vano ayo eri o Yudeya ethawelle omiyaangoni.

¹⁵ Oyo ari vaatte ahiselliwe ni ovollowa mpa wi akuse ddeko ddaye.

¹⁶ Oyo ari m'matani ahihokollweelle owaniwa wi akuse yawiikhuneella.

¹⁷ Enthawi yeeyo ootulli enaakhalle atthiyana ayo enaakhalle ni erukullu vamodda ni awaamwiha anamwani.

¹⁸ Vekellani wa Mulluku wi ddeko ddenndda ddiheereye mu eyitta.

¹⁹ Kaambiiwa, ddoohoosa ddinaawe mallapo yaayo, ddinaakhalle ddawi khaddineereyeke ovenyera mvo Mulluku aphatusalleeye ellapo ophiyera ollello nave khaddiwa ddeereyattho ddoophwanaphwana ni ddenndda.

²⁰ Nave Apwiya yahaayevihalleke mallapwaayo, khaavo naari muthu mmodda aavulluwe. Koma ekaamba ya athwiiwa ootthoolliwa, eneerewaayeviha mallapwaayo.

²¹ “Vano muthu allota wa nyuwaano wi, ‘Mesiya ari wuno,’ apaalle wi, ‘Ari nko,’ muhikhulupilile.

²² Vawi amesiya awoottha ni anamallotella awoottha eneerewooneya. Eneereweera ezizindikiro dduullupalli ni ddoottikhiniha wi wakhalla wooworeya yaahollose naari athu ootthoolliwa a Mulluku.

²³ Chenjerani, kohuulleellani erive ello enthawi ehinaphiye.

Owa wa Mwaana a Muthu

²⁴ “Enthawi yeeyo ddamalla ddoohoosa ddennddo, nndduwa nineerothiima nave mweeri khowala.

²⁵ Etheneeri ddineeromora ovenyera oddullu nave masiva a muddullu eneerotikhiwa.

²⁶ Vano mi, Mwaana a Muthu, kineerewooneya kiwaaka vamiraponi ni masiva muullupalli ni ntitimiho.

²⁷ Nave kineerewarumiha angelwaaka omapuroni mattheene masese a ellapo yavatthi. Nave angelwaalla eneerewaatthukumaniha ootthoolliwaaka ovenyera o mamallihello a ellapo yavatthi ophiya o mamallihellwaaye mamodda.

Ehuddiho ya muteekho wanamukuyu

²⁸ “Muteekho wanamukuyu wuuhuddiheni ello. Enthambi ddaye ddaamba ophuwa makukhu, munnadduwella wi ellimwe yohaatamella.

²⁹ Emoddamoddave yeeyo nyuwaano mwawa moona ddenndda dduwellani wi enthawi yoohaatamella, okhozekella wohaambeya.

³⁰ Ddawoona, kinimuulleellani wi, ddeko ddenndda ddineereweereya athu a mbadoolla amodda ehinakhwe.

³¹ Oddullu ni ellapo yavatthi ddineeromalla koma mawaaka khemalla.

Khaavo anadduwella dda nllapo ni enthawi

³² “Khaavo anadduwella nllapo ni enthawi ya owa wa miyaano, Mwaana a Muthu naari angelo naari mwaneenaka koma Attiitthaakave sika enadduwella.

³³ Chenjerani, tiyerani kaambiiwa khamunadduwella enthawi enaakwakhwane niini.

³⁴ Ddinaphwanaphwana ni muthu atimullalle va olendwaaye ahiya enyumbaaye. Aavaha olamulello allupa muttekwaaye wi arive muthu awehereke mutteko waayewaaye nave amulleella oowehera a va mullako wi awehereke phaama.

³⁵ Sika weherakani kaambiiwa khamunadduwella mwaneena a enyumba anaawe niini apaalle misikuwa apaalle variyari va mahiiyu apaalle oyaaka ni osa apaalle nndduwa nikhumalle.

³⁶ Awa moorurumusa, ahuuphwanyeni mukonaka.

³⁷ Nave yeeyo kinalloteemi wa nyuwaano, kinallotattho wa athu attheene wi weherakani!”