Mariko 12 - Mawu a Mulluku

Niphwanaphwaniho na oollima emata yampesa

¹ Vano Yesu ahaamba ollota m'maphwanaphwanihoni wi, “Waakhalla muthu mmodda aallimalle emataaye ya ezipaso ddampesa. Aamaka mpanda moowaapheella emateeyo, aasema nlliti moovotellamo ezipaso ddampesa, aamaka nttattha nookeraatthivo yaaweheraka emateeyo. Vano aapolleyiha emateeyo wa athu oollima nave olliye avenyavo aya o ellapo emodda.

² Yakwakhwanilliiwa enthawi yootthukumaniha ezipaso ddampesooyo, aamuruma mullupa muttekwaaye wa oollimaayo wi aakhelle ezipaso dda m'matanimmo.

³ Oollimaayo yaamuphara mullupa muttekooyo, emuukutha, emuhokollosa ehimuvahille ello.

⁴ Vano aamurumihattho mullupa mutteko mmodda koma oollimaayo yaamuukutha m'muruni ni omweerella ddoowulliha muru.

⁵ Nave aamurumihattho mullupa mutteko mmodda. Koma yaamwiipha nave yaaweerella amodda emoddamoddave yeella, amodda owuukutha ni amodda owiipha.

⁶ Aakhalla ni mwaana ookondiwa aamullopwana mmodda. Voomallihellani, aamurumiha mwanayooyo wa oollimaayo allota wi, ‘Eneeromuvaha olemu mwanaka.’

⁷ Koma oollimaayo yaalleellana wi, ‘Olla sika mwanaye aamullopwana anaahallena eyuumeella, hankoni nimwiiphe wi eyuumeella ekhalle yaahu.’

⁸ Sika yaamuphara emwiipha evokhella mutembwaaye otte wa emateeyo.”

⁹ Yesu ahaakoha wi, “Vano anaaweere tini mwaneena a ematoolla? Aneeroowa wi awiiphe oollimaayo nave apolleyihe emateeyo wa athu amodda.

¹⁰ Khamweerengille mawu a Mulluku awi, ‘Nlluku nno nakhootiwe ni oomaka enyumba, nenna naakhalla nlluku noopaalleya.

¹¹ Nndda ddaheeriwa ni Apwiya nave eri yoottikhiniha oyoona!’ ”

¹² Attekweene a Ayuda* yaapaalla wi emmake Yesu kaambiiwa yaadduwella wi ahaalleella niphwanaphwaniho nowaavaanyiha. Koma yawoova athwaayo, sika yaamuhiya evenyavo.

Nikoho na okhoma musonkho

¹³ Afarisi* amodda ni athu a mulloko wa Herode* yaarumiwa wa Yesu wi yamuphwanyelle mullatu voomukohani ddoomuwaka muwano.

¹⁴ Yaphiyalliiwa yaallota wi, “Ahuddihi, ninnadduwella wi muri oollota ddawoona. Munnahuddiha ddawoona dda opaalla wa Mulluku wa athu nave muhikhupanyeke dda wi athu enuuganizerekeni tini kaambiiwa khamunawehattho ekhove. Sika munilleelle hiyaano. Tti ddawaakhullelliwa ni malamulwaahu okhoma musonkho wa Kaisara* apaalle khe ddiiddo?”

¹⁵ Koma Yesu voodduwellani maganizwiiwa oolleka aallota wi, “Munakeesella tini? Wannani nikobiri nookhomella musonkho wi koone!”

¹⁶ Yaawaana nikobiri nimodda nave Yesu ahaakoha wi, “Ekhoveella ni nnddinanna tti ddawani?” Yahaakhulla wi, “Dda Kaisara.”

¹⁷ Vano Yesu aallota wi, “Ddawoona, sika velleellani wa Kaisara nnddo ddiri dda Kaisara nave velleellani wa Mulluku nnddo ddiri dda Mulluku.” Vano Yesu ahaattikhiniha.

Nikoho na ovenya wa ookhwa

¹⁸ Asaduki* amodda, ayo ehinakhulupilila wi ookhwa ttuuvenya, yaawa wa Yesu ellota wi,

¹⁹ “Ahuddihi, Mose aalemba wi muthu akhwa amuhiya mwaariye ahinna anamwani, mwanamunne amutthelle mutthiyanooyo wi amuyarelle anamwani ookhooyo.

²⁰ Vano waakhalla muthu ni asinne atthanu ni mmodda, aatthella akhwa ahinna anamwani.

²¹ Nave mwanamunne aamutthella mutthiyanooyo, nayeene aakhwa ahaahiyalle anamwani. Yaheereya emoddamoddave yeeyo wa mwanamunne aneeraru.

²² Emoddamoddave yeeyo yaheereya wa asinne attheene. Voomallihellani, mutthiyanoollettho aakhwa.

²³ Vano va nllapo na ovenya wa ookhwa mutthiyanooyo anaakhalle mwaara awani va allopwana atthanu ni eellaayo vawi attheene yaamutthella?”

²⁴ Yesu ahaakhulla wi, “Munnalakwa kaambiiwa khamunadduwella mawu a Mulluku naari masiva a Mulluku.

²⁵ Vawi voovenyani ookhwa khavikhalla naari otthelliwa koma attheene enaakhalle wonanko angelo ooddullu.

²⁶ Vano dda ovenya wa ookhwa, khamweerengille mu nibukhu na Mose dda makukhu yakhara munllo mvo Mulluku allotilleeye ni Mose wi, ‘Miyaano kiri Mulluku a makhollwaanyu, Mulluku a Abrahamu, Mulluku a Isaki ni Mulluku a Yakobo.’

²⁷ Olliyooyo khahiyo Mulluku a athu ookhwa koma tti a athu ookumi. Munnalakwa wunchichi.”

Dda lamulo nuullupalli

²⁸ Muhuddihi a malamulo* aari iiwellellaka ovaanyihananko. Ahoona wi Yesu aawaakhulla phaama Asaduki, sika aamukoha wi, “Lamulo nuullupalli ohiyana ni mattheene tti niivi?”

²⁹ Yesu ahaakhulla wi, “Lamulo nuullupalli tti nna, ‘Iwella Israele, kheyiivo apwiya amodda koma Apwiya Mullukwaahu.

³⁰ Nave waakondeke Apwiya Mullukwaawo ni murimaawo muttheene ni okumaawo muttheene ni maganizwaawo mattheene navettho ni masivaawo mattheene.’

³¹ Naneepiilli nuullupalli moophwanaphwana tti nna, ‘Waakondeke akhwaawo wonanko mmo oniikondelleewe weekha.’ Kheyiivo malamulo muullupalli ookhwaranya meellaalla.”

³² Muhuddihi a malamulo aallota wa Yesu wi, “Mohaakhulla phaama, Ahuddihi! Moollota ddawoona wi ori Mulluku mmodda.

³³ Nave onapaalleya wi omukondeke Mulluku ni murimaawo muttheene ni maganizwaawo mattheene ni masivaawo mattheene navettho omukondeke mukhwaawo wonanko mmo oniikondelleewe weekha. Malamulo meellaalla tti oopaalleya ohiyana ni oheraatthi mukutho wooshellelliha wa Mulluku.”

³⁴ Nave Yesu vawoonani wi ahaakhulla mweezeru, vano aallota wi, “Khorakamellane ni omwene wa Mulluku.” Ddiviralle ddenndda khavaarittho muthu allipalle murima omukoha Yesu makoho mamodda.

Nikoho na Mesiya

³⁵ Yesu ahuddiheeye mu enyumba ya Mulluku, aakoha wi, “Ahuddihi a malamulo enallota mwawiidde dda Mesiya* wi tti Edduullu ya Davide?

³⁶ Munepa Waweella aamuhoollella Davide wi allote wi, ‘Apwiya yaallota wa apwiyaaka wi, “Khalla o nnattanatta naka ophiyera kaagonjihalle adanaawo.” ’

³⁷ Sika Davide aamuromolla olliye wi Apwiya, Mesiya vano anaakhalle edduullu ya Davide mwawiidde?” Mulloko wa athu muullupalli watthukumannooyo waahakallalla voomwiiwani Yesu.

Yesu anaachenjeza dda ahuddihi a malamulo

³⁸ Yesu aahuddiheeye aallota wi, “Chenjerani ni ahuddihi a malamulo vawi ennakonda weeteeta ewanre mikanjo ddiwa ni ovahiwa mooni moolemu mu misika.

³⁹ Ennakondattho otthoolla mipando ddoolemu mu enyumba ddamavekello* ni mapuro oolemu vamachellelloni.

⁴⁰ Ennaachella anaamukhwelle ni waakusella katundwiiwa naari enyumba ddiwa ddene, vawaamarani athu muyeepe owiitthoni ni mavekello oorekama. Ollakiwa wiwa oneerokhalla wuullupalli waakhwaranya athu amodda!”

Yoovelleella ya naamukhwelle

⁴¹ Yesu akeraatthilleeye moowehanana ni moosungellamo ddoovelleella mu enyumba ya Mulluku, aawoona athu emorihellaka makobiriiwa moosungellamo. Athu anchichi eeyuuma yaamorihellamo makobiri awaata.

⁴² Nave naamukhwelle oohoowa aawa amorihellamo asimakobiri meelli, ookwakhwana nikobiri nimodda.

⁴³ Yesu awiithana oohudderaaye vamodda allota wi, “Ddawoona, kinimuulleellani wi, naamukhwelle oohoowooyo sika amorihellemo ddinchichi ohiyana ni attheenaayo.

⁴⁴ Vawi amoddaayo yaavelleella moollikana ni nnddo yavahullalliiwa va eyuumiiwa koma olliyoolla ni ohoowa wayenngu, oovelleella ddittheddene aariiyena wi achelleke.”