Mariko 11 - Mawu a Mulluku

Ovollowa wa Yesu mu Yerusalemu

¹ Yesu ni oohudderaaye yaatamelliiwa o Yerusalemu, vakhuviru ni matawoni a Betefage ni Betaniya, va mwaango wa Olivi. Yesu ahaarumiha oohudderaaye eelli wi ehoolle.

² Ahaalleella wi, “Khaweni m'muzi muhoollo mwanyu. Enthawi yeeyo mwaphiya muneeromuphwanya mwaana a bulu oomakellelliwa, oyo ahinawelliweke nikhalle nene. Mwamuttaphulle muweena wa miyaano.

³ Muthu uukohani wi, ‘Kaambiiwa tini muneereenyu yeeyo,’ mumulleelle wi, ‘Apwiya ennampaalla nave eneeromuhokollosa weewuno veneva.’ ”

⁴ Sika yaayaawo, yamphwanya mwaana a bulooyo amakellelliwe vakhuviru ni va mullako va enyumba yowaatamella m'musewuni nave yaamuttaphulla,

⁵ Athu amodda yiimenlle vakhuviru yahaakoha wi, “Munamuttaphullella tini bulooyo?”

⁶ Yahaakhulla moollikana ni ddalleelliwiiwa ni Yesu nave athwaayo yaawaakhullella wi erowekena.

⁷ Yaawaana wa Yesu mwaana a bulooyo, yaanddellella ddawiikhuneella ddiwa va yooyo. Vano Yesu aawella akeraatthi.

⁸ Athu anchichi yahaanddellella ddawiikhuneella ddiwa m'musewuni, amodda yahinttaka enthambi dda miteekho yaanddellella m'musewuni.

⁹ Athu yeeta vahoollo va Yesu ni vatulli vaye yaakhuwa wi, “Ntitimiho nikhalle wa Mulluku! Oodalisiwa oyo anawa mu nnddina na Apwiya!

¹⁰ Odalisiwe omwene wa Davide nikhollo nahu, oyo onawooyo! Ntitimiho nikhalle wa Mulluku!”

¹¹ Yesu aavollowa mu Yerusalemu, aya mu enyumba ya Mulluku nave aawehaweha ddeko ddittheddene mwemmo. Nave kaambiiwa waari misikuwa, aakhuma aya o Betaniya ni oohudderaaye khumi ni eellaayo.

Yesu anatembelela muteekho wanamukuyu

¹² Osaka wene Yesu ni oohudderaaye yavenyeriiwa o Betaniya, Yesu aavolliwa ettalla.

¹³ Ari voorekama ahoona muteekho wanamukuyu ori ni makukhu, sika aaya wi oone eeki amuphwanyemo namukuyu. Koma aphiyalleeye, aphwanyille makukhuve vawi kheyaari enthawi yawi namukuyooyo aawerowiima.

¹⁴ Yesu aallota wa muteekho wanamukuyooyo wi, “Khakhallavottho muthu anaawe amuche namukuyu oovenyera mwa weyaano!” Nave oohudderaaye yaamwiiwa.

Yesu anawiikariha athu mu enyumba ya Mulluku

¹⁵ Yesu ni oohudderaaye yaphiyalliiwa o Yerusalemu, Yesu aavollowa mu enyumba ya Mulluku aamba owiikariha athu ookulliha ni ookulla malonda a ddeko ddooheraatthella mukutho mwemmo. Aarukunusa matebulo a athu awaakakhaniha makobiri navettho mipando dda ookulliha ekhunda.

¹⁶ Nave khaakhullenlle wi muthu atukhulle ddeko ddookulliha wi aweellena vanthatoni na enyumba ya Mullukweeyo.

¹⁷ Nave aahuddiha allota wi, “Mulluku aallota mu mawaaye wi, ‘Enyumbaaka ekhalle enyumba yoovekellamo athu a mitundu ddittheddene.’ Koma nyuwaano mooyitthattusa nipuro nawiipitthamo allupaawiiya!”

¹⁸ Allupa mukutho uullupalli ni ahuddihi a malamulo* yiiwalliiwa yeella, yahaamba waashaasha ettilla yawi emwiiphelle Yesu. Yaanamoova kaambiiwa athu attheenaayo yaattikhina wunchichi ni ehuddihwaaye.

¹⁹ Wasikuwalliiwa, Yesu ni oohudderaaye yaakhumamo m'muzindanimmo.

Ehuddiho ya muteekho wawumma wanamukuyu

²⁰ Osaka wene ohinase Yesu ni oohudderaaye yeetiiwa m'musewuni, yahoona muteekho wanamukuyoolle. Waari wummalle muttheene ni misisi ddene.

²¹ Petro ahuupuwella ddeereyenndde nave aallota wa Yesu wi, “Ahuddihi, ngoonani muteekho wanamukuyu mwawutembeleleenyuulle wohumma!”

²² Yesu ahaakhulla wi, “Mukhalle ni echikhulupililo mwa Mulluku.

²³ Ddawoona, kinimuulleellani wi muthu ahiikayikellaka yeekha m'murimani mwaye koma anakhulupilila wi eyo allotilleeye eneereweereya nave allota wa mwaangoolla wi, ‘Venya wiivokhelle weekha mu enyanja,’ eneereweereya.

²⁴ Ekaamba ya yeella kinimuulleellani wi munavekeenyu munivekello, khulupililani wi mohaakhella nave eneerovahiwa wa nyuwaano.

²⁵ Mwaawiimellaka ni ovekella, mwaakhululukelleke athu attheene ayo yuulakwenlleni. Vano Attiitthaanyu ooddullu eneerewuukhululukellani machimwaanyu.”

Nikoho na olamulello wa Yesu

²⁷ Yesu ni oohudderaaye yaaphiyattho o Yerusalemu. Nave vaari Yesu eeteeye mu enyumba ya Mulluku, allupa mukutho uullupalli, ahuddihi a malamulo ni attekweene a Ayuda* yaamuweella.

²⁸ Nave yaamukoha wi, “Muneera ddenndda ni olamulello woovenyera wuuwi? Uuvahilleni olamulello woweera ddenndda ttaani?”

²⁹ Yesu ahaakhulla wi, “Mittho kineerewuukohani nikoho nimodda, mwakaakhulla, kineerewuulleellani wi kineera ddeko ddenndda ni olamulello wa aani.

³⁰ Mukilleelle, Yohane aakusalle wuuwi olamulello woobatiza, waavenyenre wa Mulluku apaalle wa athu?”

³¹ Yaakambirana weekhiiwa wi, “Nillote wi tini? Namwaakhulla wi, ‘Wa Mulluku,’ aneerollota wi, ‘Khamwaamukhulupililalle Yohane kaambiiwa tini?’

³² Koma eneereye tini nallota wi, ‘Ovenyera wa athu?’ ” Vawi yaanoova eyo eneere athu kaambiiwa attheene yaamwaakhullella Yohane wi aari namallotella.

³³ Sika yaamwaakhulla Yesu wi, “Khaninadduwella.” Nave Yesu aallota wi, “Naari miyaanottho nguulleellani wi ddenndda kineera ni olamulello wa aani.”