Mariko 10 - Mawu a Mulluku

Dda omwallana

¹ Yesu aavenyawo onipuroninko, aya o echigawo ya Yudeya ni okhopella wa muhinje wa Yordani. Athu anchichi yaawattho emutthukumanella nave ahaahuddihattho kaambiiwa aaddollweella weera ddiiddo.

² Afarisi* amodda yaawa wa olliyooyo, emukoha moomweesa wi, “Tti wowaakhullelliwa ni malamulwaahu wi muthu amwallane ni mwaariye?”

³ Yesu ahaakhulla ni nikoho wi, “Mose uulamulalleni wi tini?”

⁴ Yahaakhulla wi, “Mose ahaakhullella wi muthu amulembeke kalata oomwallanella nave amuhiyeke mwaariyooyo.”

⁵ Yesu aallota wi, “Mose ahuulembelani malamulo yaalla kaambiiwa nyuwaano tti awumma murima.

⁶ Koma Vawaambawaamba va ophatusa, ‘Mulluku ahaaphatusa athu, mullopwana ni mutthiyana.’

⁷ ‘Nave ekaamba ya yeella mullopwana aneerekewaahiya attiitthinnya ni amennya aya atthella.

⁸ Nave eellaayo eneerokhalla mwiilli mmodda.’ Sika kherittho eelli koma mmodda.

⁹ Vano eyo Mulluku amakilleeye vamodda, muthu ahihiyanihe.”

¹⁰ Yesu ni oohudderaaye yavollowilliiwa mpa, oohudderaayo yaamukoha Yesooyo dda nnddo ahuddihalleeye.

¹¹ Aallota wi, “Mullopwana amuhiya mwaariye amutthella mmodda, animararuwa.

¹² Emoddamoddave yeeyo, mutthiyana amuhiya mamune atthelliwa ni mullopwana mmodda, animararuwa.”

Yesu anaadalisa anamwani

¹³ Athu amodda yaawaana anamwani wa Yesu wi iiyaatthi mattaaye va alliwaayo wi aadalise koma oohuddera yahaahumullulla athwaayo.

¹⁴ Yesu oonilleeye yeella, aasha murima nave aallota wa oohudderaaye wi, “Ahiyeni anamwanaayo ewe wa miyaano, muhaahiihe kaambiiwa omwene wa Mulluku tti wa athu ookhalla wonanko anamwanaalla.

¹⁵ Ddawoona, kinimuulleellani wi, muthu oohaakhullella omwene wa Mulluku wonanko mwaana aneerelleeye khavollowamo.”

¹⁶ Vano ahaakusa anamwanaayo awuupaara m'miwononi mwaye, aadalisa vawiiyaatthini mattaaye va yaayo.

Dda muthu eeyuuma

¹⁷ Yesu avirellelleeye ni olendwaaye, muthu mmodda aamuthamakella, amukokhorella amukoha wi, “Ahuddihi aphaama, keere tini wi kaakhelle okumi woohimalla?”

¹⁸ Yesu aamukoha wi, “Onakeera miyaano muthu aphaama kaambiiwa tini? Khaavo muthu ari aphaama koma Mullukuve.

¹⁹ Onnadduwella malamulo a Mulluku: ‘Ohiiphe, ohiraruwe, ohiiye, ohivelleelle omboni wawoottha, ohaachelleke akhwaawo matthu vamuru, waavaheke olemu attiittho ni amaayo.’ ”

²⁰ Muthooyo aallota wi, “Ahuddihi, waambeella kiri mwaana, kaawiiwellella malamulo mattheenaalla.”

²¹ Yesu aamuwehesesa moomukonda allota wi, “Onayelleella ello emodda. Khawe wakullihe ddeko ddittheddene oriiwena nave makobiraayo waavahe athu oohoowa nave oneerothuviwa oddullu. Weera ddiiddo owe okithware.”

²² Muthooyo iiwalleeye ddenndda, ekhovaaye yaamora, avenyavo ari ookhupanya wunchichi kaambiiwa aakhalla ni eyuuma yinchichi.

²³ Yesu ahaaweha oohudderaaye allota wi, “Tti wookatamiha wi athu eeyuuma yavollowe mu omwene wa Mulluku!”

²⁴ Oohudderaayo yaattikhina ni mawaalla nave Yesu aallotave wi, “Akhwaaka, tti wookatamiha wi muthu eeyuuma avollowe mu omwene wa Mulluku!

²⁵ Tti yavakhuviru wi ekamira* evire vamullakoni va singano ohiyana ni wi muthu eeyuuma avollowe mu omwene wa Mulluku.”

²⁶ Vano oohudderaayo yaattikhina wunchichi ekohana wi, “Ttaani vano, anaawore ovulluwa?”

²⁷ Yesu ahaawehesesa aakhulla wi, “Ddenndda tti ddoohiworeya ni athu koma ddinaworeya ni Mulluku kaambiiwa ddittheddene ddinaworeya ni Mulluku.”

²⁸ Vano Petro aallota wi, “Noohiya ddeko ddittheddene nuuthwarani nyuwaano.”

²⁹ Yesu aallota wi, “Ddawoona, kinimuulleellani wi, ayo ehiyalle enyumba ddiwa, asinniwa, arokoriwa, ameewa, attiitthiiwa, aniiwa apaalle emata ddiwa, ekaamba ya miyaano ni othenga waphaama,

³⁰ eneerewaakhella 100 m'mallaponi yaalla nnddo yahiyalliiwa monga enyumba, asinniwa, arokoriwa, ameewa, aniiwa ni emata ni ddoohoosa nave mallapo amuhoollo eneerewaakhella okumi woohimalla.

³¹ Nave anchichi ayo eri awaamba eneerokhalla ookomihera nave ayo eri ookomihera eneerokhalla awaamba.”

Yesu anallota waneeraru dda okhwa waye

³² Yesu ni oohudderaaye eri voolendoni oya o Yerusalemu ahaahoollella oohudderaayo. Vano oohudderaayo yaattikhina nave athu yaathwaraayo yahoova. Vano Yesu ahaakusellattho vakhwipi oohuddera khumi ni eellaayo aamba waalleella dda ddeko nnddo ddinaamwereyelle.

³³ Ahaalleella wi, “Ninnawella oya o Yerusalemu. Wenko mi, Mwaana a Muthu, kineerovelleelliwa wa allupa mukutho uullupalli ni ahuddihi a malamulo* nave eneerokamulla wi kiiphiwe nave eneerokivelleella wa athu ayo ehiri Ayuda.

³⁴ Yaayo eneerokeerella epewe, eneerokittaphera mare, eneerokiwashulla, eneerokiipha nave vavira mallapo mararu kineerovenya wa ookhwa.”

Dda muullupalli wunchichi

³⁵ Yakobo ni Yohane, anamwani a Zebedayo, yaawa wa Yesu ellota wi, “Ahuddihi, ninapaalla wi muneerelle erive ello ninaavekeehu.”

³⁶ Yesu ahaakoha wi, “Munapaalla wi kiweerelleni tini?”

³⁷ Yaamwaakhulla wi, “Mwakeraatthi vampandoni wa ntitimiho mu omwenaanyu, ninapaalla wi munaakhullelle nakhalle, mmodda o nnattanatta nanyu ni mmodda o nnatta noonyottho nanyu.”

³⁸ Yesu aallota wi, “Khamunadduwella eyo munavekeenyu. Muneerowora omuwiryella kapu a ddookatamiha kinamuwiryelleemi? Muneerobatiziwa ni obatizo wa ddookatamiha wonanko miyaano?”

³⁹ Yahaakhulla wi, “Nineerowora.” Yesu aallota wi, “Ddawoona muneeromuwiryella kapu kinaamuwiryelleemi ni obatiziwa wonanko miyaano.

⁴⁰ Koma nginna olamulello woomutthoolla oyo anaakhalle o nnattanatta naka apaalle o nnatta naka noonyottho. Koma mapuro yaalla tti ayo ekhozeriwe ni Mulluku.”

⁴¹ Oohuddera amodda khumaalle yiiwalliiwa ddennddo, yahaashella murima Yakobo ni Yohane.

⁴² Vano Yesu aawiithana attheenaayo vamodda allota wi, “Munnadduwella wi oolamulella a athu a ellapo yavatthi ennakhalla ni masiva va olamulelliwa nave oohoollella aakhalla ni olamulello va oohoollelliiwa.

⁴³ Wa nyuwaano ddihikhalleke ddiidda. Koma muthu apaalla okhalla muullupalli anaphwanella akhalle oorumeyella attheenenyu.

⁴⁴ Nave oyo anapaalla okhalla awaambeella mwa nyuwaano, akhalle kaporo a attheene.

⁴⁵ Vawi naari mi, Mwaana a Muthu, ngaawiille wi kirumeyelliwe koma wi kaarumeyelle ni ovelleella okumaaka owoopolla athu anchichi.”

Yesu anamuchiriha muthu oohoona

⁴⁶ Yesu ni oohudderaaye yaawa o muzinda wa Yeriko. Yavenyeewawo ni mulloko wa athu muullupallooyo, muthu ooveka oohoonooyo nnddina naye Bartimeyu, mwaana a Timeyu, aakeraatthi mukhwipi mwa musewu.

⁴⁷ Iiwalleeye wi tti Yesu a o Nazareti anavira, ahaamba okhuwa wi, “Nyu Yesu, edduullu ya Davide, mukeerelle echifundo!”

⁴⁸ Athu anchichi yaamusimwella emulleella wi amaalle. Koma aavirellella okhuwa ohiyana ni vawaamba wi, “Edduullu ya Davide, mukeerelle echifundo!”

⁴⁹ Yesu ahiimella allota wi, “Mwiithaneni awe.” Sika yaamwiithana muthu oohoonooyo ellota wi, “Llipa murima, venya, animawiithana.”

⁵⁰ Aatathilla yawiikhuneellaaye nave aallupha, awa wa Yesu.

⁵¹ Yesu aamukoha wi, “Onapaalla wi kiweerelle tini?” Ahaakhulla wi, “Ahuddihi, kinapaalla wi kooneke.”

⁵² Yesu aamulleella wi, “Rowa, echikhulupilwaawo yohuuchiriha.” Enthawi yeeyo ahoona, amuthwara Yesu voolendonooyo.