Mariko 1 - Mawu a Mulluku

Ollalleya wa Yohane Oobatiza

¹ Nngu sika waambeya wa othenga waphaama woollota dda Yesu Khrisitu, Mwaana a Mulluku.

² Ollikana ni ddalembiwe ni namallotella Yesaya ddawi, “Mulluku aallota wi, ‘Kineeromurumiha amithengaaka vahoollo vanyu, wi allime musewu wa nyuwaano.’

³ Okhuwa waye muchipululuni onallalleya wi, ‘Llimani musewu wa Apwiya, okollani ettilla wi yeetemo.’ ”

⁴ Sika Yohane ahooneya ochipululuni, abatizaka nave allalleyaka wi, “Rukunuwani murima, mubatiziwe wi Mulluku uukhululukelleni machimwaanyu”

⁵ Athu attheene oovenyera o echigawo ya Yudeya ni muzinda wa Yerusalemu yaakhuma wi emwiiwe Yohane. Yaalapa machimwiiwa nave ahaabatiza athwaayo mu Yordani.

⁶ Yohane awara ddoowara ddawoopiwa ni mapururu a ekamira,* am'makella laamba anttapara muyuununi mwaye navettho acha middope ni enwi dda muchipululuni.

⁷ Allalleya wi, “Mutulli mwaka animawa muthu mmodda muullupalli ookikhwaranya miyaano. Ngiphwanenlle naari owarama wi kittaphulle mikwe dda esapato ddaye.

⁸ Kahuubatizani ni maaddi koma olliyooyo aneerewuubatizani ni Munepa Waweella.”

Obatiziwa ni weesiwa wa Yesu

⁹ Va mallapo yaayo Yesu aawa ovenyera o etawoni ya Nazareti o echigawo ya Galileya nave aabatiziwa ni Yohane mu Yordani.

¹⁰ Akhumalleeye ovenyera m'maaddini, enthawi yeeyo ahoona oddullu ohulleyaka. Nave Munepa Waweella akitthaka wonanko ekhunda va olliye.

¹¹ Vano mawu yahiiweya ovenyera oddullu wi, “We tti Mwanaka ookondiwa. Kinnahakallalla ni murimaaka muttheene ni weyaano.”

¹² Enthawi yeeyo Munepa Waweella aamukusa amuhoollella wi aye ochipululuni.

¹³ Wenko akhanllewo mallapo 40, eesiwaka ni Satana. Nave Yesu aari variyari va enama ddawoopiha dda muchipululuni koma angelo yaamurumeyella.

Yesu anaamba muttekwaaye

¹⁴ Yohane amakiwe, Yesu aaya o Galileya nave aallalleya othenga waphaama wa Mulluku.

¹⁵ Olliye aallota wi, “Enthawi yookwakhwanihiwa nave omwene wa Mulluku wohaatamella. Rukunuwani murima nave mukhulupilile othenga waphaama!”

¹⁶ Yesu eeteeye mukhwipi mwa enyanja ya Galileya,* aawoona athu eelli ayo yaari awiipha ehomba, Simoni ni mwanamunne Andreya, yiiphaka ehomba ni nthavi mu enyanja.

¹⁷ Yesu aallota wa athwaayo wi, “Waawoni mukithware miyaano nave kineerewuuhuddihani wi mukhalle owaattottha athu.”

¹⁸ Enthawi yeeyo yaahiya mathaviiwa enamuthwara.

¹⁹ Eetille vang'ono oya vahoollo aamoonattho Yakobo ni mwanamunne Yohane, anamwani a Zebedayo. Alliwaalla yaari mu ekallawiiwa esowaka mathaviiwa.

²⁰ Enthawi yeeyo Yesu aawiithana. Vano yahaahiya attiitthiiwa mukallawanimmo ni mullupa mutteko aganyu nave yaamuthwara Yesu.

Muthu ookhalla ni munepa woonanara

²¹ Yesu ni oohudderaaye yaawa o etawoni ya Kaperenao nave niphiyalle nllapo na Sabata aavollowa mu enyumba yamavekello anaahuddiha.

²² Athu yaattikhina ni ehuddiherwaaye vawi aahuddiha ni olamulello waakhwaranya ahuddihi a malamulo.*

²³ Vano mu enyumba yamavekellwiiwa mwaawa muthu ookhalla ni munepa woonanara.

²⁴ Nave aakhuwa moollipiha wi, “Aa! Nuullikalleni tini nyuwaano Yesu a o Nazareti? Munapaalla wi muniiphe hiyaano? Miyaano kohuudduwellani wi nyuwaano tti Aweella a Mulluku!”

²⁵ Nave Yesu aawusimwella munepa woonanarooyo wi, “Okhurumuwe nave okhumemo mwa muthooyo!”

²⁶ Vano munepa woonanarooyo waamukuha muthooyo angomowa nave wakhumiiwa waakhuwa.

²⁷ Athu attheene yaattikhina sika yaakohana wi, “Yeella tti tini? Ehuddiho yanaanweene yookhalla ni olamulello! Muthu yoolla annalamulella minepa ddoonanara nave ddinnamwiiwellella!”

²⁸ Enthawi yeeyo epilli ya Yesu yaavuwa virive veko mu echigawo ya Galileya.

Yesu anaachiriha athu anchichi

²⁹ Enthawi yeeyo Yesu ni Yakobo, Yohane, Simoni ni Andreya yaakhumalliiwa mu enyumba yamavekello, yaaya yavollowa mpa mwa Simoni ni Andreya.

³⁰ Nave amoottonaaye a Simoni yaakonaatthi vabedini evoriiwaka oviha mwiilli. Yesu aphiyalleeye yaamulleella dda alliwa.

³¹ Vano aaya yaariiwamvo aaphara nnatta niwa, ahaakavihera wi yiimelle nave yaachirihiwa. Vano yahaarumeyella ni ddoocha.

³² Misikuwa nndduwa nivollowille athu yaawaana wa Yesu oovoriiwa attheene ni athu ookhalla ni minepa ddoonanara.

³³ Athu attheene a mu etawonimmo yaatthukumana va mullako vaatte va enyumbeeyo.

³⁴ Yesu ahaachiriha athu anchichi yavoriiwalle ereta ddoohiyanahiyana. Aakhumihattho minepa ddoonanara ddinchichi koma khaaddaakhullenlle wi ddillote ello kaambiiwa ddaamudduwella.

Yesu anallalleya mu Galileya

³⁵ Ohinase nndduwa nihinakhume Yesu aavenya akhuma mpammo. Aaya onipuroni nayeekha nave wenko aamavekellawo.

³⁶ Nave Simoni ni akhwaaye yaaya yamwaashaashaka.

³⁷ Yamphwanyilliiwa, yaamulleella wi, “Athu attheene enimawaashaashani nyuwaano.”

³⁸ Nave Yesu ahaakhulla wi, “Hankoni niye o mizi nnddo ddiri vakhuviru wi kallalleyettho wenko kaambiiwa kawiille wi kiphare muttekweene yooyo.”

³⁹ Vano aheeta mu Galileya mutthemwene, ollalleya mu enyumba ddamavekello* akhumihaka minepa ddoonanara.

Yesu anamuchiriha muthu amakate

⁴⁰ Vano muthu amakate aawa, amukokhorella, amuveka wi, “Apwiya, mwaapaallaka ttuuwora okeelliha.”

⁴¹ Yesu aamoriwa ethakaraka nave ahookolla nnatta naye, amuttannya, allota wi, “Kinnapaalla, ellihiwa!”

⁴² Nave enthawi yeeyo aheellihiwa o makataaye.

⁴³ Vano Yesu aamulamulella wi aroweke, allotesesa wi,

⁴⁴ “Ngiiwa nndda vano! Ohimulleelle arive muthu koma khawe wa mullupa mukutho wi awoone wi woheella. Vano waheraatthi mukutho olle walamuliwe ni Mose wi vikhalle omboni wa athu wi woheellihiwa.”

⁴⁵ Koma muthooyo aavenyavo nave ahaamba ollotallota wa athu avuwiha epilli virive veko. Sika Yesu khaworille ovira vawooneya ni athu m'matawoni koma akhanlle m'mapuroni ayeekha otte wa matawoni. Koma athu yaawa ovenyera m'mapuroni manchichi oohiyanahiyana.