Maliro 5 - Mawu a Mulluku

Nivekello na echifundo

¹ Nyu Apwiya, upuwellani ddinimorenllenndda, ngoonani nave wehani owullihiwa muru wahu.

² Yoohallanaahu yoovelleelliwa wa alleto, enyumba ddahu ddiri m'mattani mwa athu oovira.

³ Hiyaano tti akhwaadduni, oohikhalla ni attiitthiiwa, ameehu aatthattuwa anaamukhwelle.

⁴ Naari maaddi ninawirya ookulla, ekhunittho ddawiiddeellella munllo tti ddookulla.

⁵ Enanikakha mweekuku nigoli* niri munikohini mwahu, nootopa koma khannaakhullelliwa wiithuuwa.

⁶ Naakokhora vamiitthoni va Aiguputo ni Aasiriya, wi ttuuphwanya yoocha yookwakhwana.

⁷ Makhollwaahu yaachimwa nave kheyiiwo, vano nootukhulla machimwiiwa.

⁸ Akaporo sika enanilamulella, khaavo naari mmodda oonaakihera m'mattani mwiwa.

⁹ Ninnakumana ni ddawoopiha wi niphwanye yoocha, ekaamba ya anamasikita okhalla muutthakoni.

¹⁰ Mwiilliihu onaviha wonanko ufuni ekaamba ya ovolliwa ettalla.

¹¹ Atthiyana ennapharelliwa o Ziyoni, naarittho anamwalli mu mizinda dda Yuda.

¹² Enduna ddinnatthomeyiwa voomakellellani mattiiwa, naarittho attekweene khenavahiwa olemu.

¹³ Asombwe enawatiheriwa omusilla tirigu, asaasombwe ennahahareya ni mitolo dda ekhuni.

¹⁴ Attekweene aapallalleya va nthato na muzinda, machipo a asombwe kheniiweyattho.

¹⁵ Ehakallallo yoopallalleya m'murimani mwahu, wiina wahu wootthattuwa winlla.

¹⁶ Enduwiraahu yoomora omuruni, ootulli hiyaano vawi noochimwa.

¹⁷ Ekaamba ya yeella mirima ddahu ddookukhumulleya navettho m'miitthoni mwahu moowa epiphi.

¹⁸ Mwaango wa Ziyoni wootthattuwa ntepe, akhatwe sika eneeteetamo.

¹⁹ Koma Apwiya, nyuwaano tti mwene wa enthawi yoohimalla, mpandwaanyu wa omwene oneerokhallawo o mibado ddittheddene.

²⁰ Kaambiiwa tini munitiwanlleenyu moohihiyerera? Kaambiiwa tini munihiyalleenyu enthawi yoorekama?

²¹ Nyu Apwiya, nirukunusellenittho wa nyuwaano! Nirukunusellenittho wa nyuwaano wi nihokollweelle mwakhalle.

²² Apaalle neereke moonikhootellaatu? Neereke moonishella murima mookhwaranya muyeso?