Maliro 4 - Mawu a Mulluku

Vatulli va omora wa Yerusalemu

¹ Ha! Golidaahu oowa murawa, golidaahu aphaama ootthattuwa. Malluku a o nipuro naweella aamwareya, aapallalleyella o makhullukana mattheene a misewu.

² Ngoonani, anamwani a Ziyoni ayo khalle yaari wonanko golide aphaama, koma vano eneesiwa epalli.

³ Akhatwe khenawatteella nipelle, ennawaamwiha asaaniiwa. Koma mwaana aamutthiyana, athwaaka tti eekuku, tti wonanko enthiwatiwa ddamuutthakoni.

⁴ Nllumi na awaamwa ninnuumellella ommilloni ekaamba ya nthona. Anamwani ang'onong'ono ennaveka yoocha koma khaavo anaavaha naari vang'ono.

⁵ Ayo yavona ddaphaama, enamallella okhwa m'musewuni. Ayo yawara ddooreera ddoofiira, ekonaatthille vaddallani.

⁶ Ollakiwa wa mwaana aamutthiyana, athwaaka tti wuullupalli okhwaranya oollakiwa wa Sodomu oyo allakiwe moorurumusa oohikhallavo awaakavihera.

⁷ Enduna ddaye ddaari ddoowala wunchichi, ddaweella okhwaranya mukaka. Miilli ddiwa ddaari ddooreera okhwaranya malluku a rubi, ddaanooneya mooreera okhwaranya malluku a safire.

⁸ Koma vano ekhove ddiwa ddootthattuwa, ddooripa wonanko ninkhalla wawi khaavo anawuupuwella m'musewuni. Mwiilliiwa woowa mahoonya, wohumma wonanko muteekho.

⁹ Anakari tti ayo yiiphiwe vakhotoni, okhwaranya ayo yakhwille ni ettalla. Vawi attallaalla yamalliheya vang'ono vang'ono ekaamba yoorama yoocha.

¹⁰ Naari atthiyana amahalla yaaphiya voowaapeyani aniiwa, aniiwa yaatthattuwa yoochiiwa va enthawi eyo mwaana aamutthiyana, athwaaka yoonongeyiiwa.

¹¹ Apwiya aasha murima wunchichi, aamorihella vatthi osha murima wiwa wamunllo. Aakhariha munllo o Ziyoni oyo woonongille matthipello a muzinda.

¹² Mamwene a va ellapo yavatthi kheyaakhulupililalle apaalle arive muthu ookhalla va ellapo yavatthi wi adani apaalle akhoto ttuuvollowa va millako dda Yerusalemu.

¹³ Ddenndda ddaheereya ekaamba ya machimo a anamallotelliiwa ni ddoonanara dda allupa mukuthwiiwa ayo yawiiphalle oolungama.

¹⁴ Yaaneeteeta m'misewuni wonanko oohoona, ddoowara ddiwa ddiri nikhameve, mwawi khaavo anaawore oddittannya.

¹⁵ Athu yaanaakhuwella wi, “Khaweni nko! Ooripihiwanyu, muhinittannye!” Sika yaathawa, eneeteeta, nave athu a mitundu ddimodda yaallota wi, “Ehikhallettho ni hiyaano.”

¹⁶ Apwiya mwaneeniiwa sika yaamwarille, khenapwathawottho dda alliwa. Kheyaavahillettho olemu allupa mukutho, apaalle oweerella echifundo attekweene.

¹⁷ Miitthwaahu yaatopa ni otiyerella nikavihero koma khayiivo naphunreehu. Naatiyerella mutundu wa athu oyo wahiwonre onivullusa.

¹⁸ Athu yaananithwara manyallo, khenaaworattho weeta m'misewuni ddahu. Mallapwaahu yaanayeva, okhwa wahu wahaatamella, omalla wahu waaphiya.

¹⁹ Athu oonithwara manyallo yaari awaakuva, okhwaranya mipungu ddoovava muddullu. Yaaniikariha omiyaangoni, yaanniipitthella muchipululuni wi enisikite.

²⁰ Oozoziwa* a Apwiya ayo aari mpweya wookumi, aamakiwa m'musamphani mwiwa. Oyo nalloteehu wi, “Mu muuthuuchaaye nneerokhalla variyari va athu amitundu ddimodda.”

²¹ Hakallallani wunchichi, nyu anamwani aatthiyana a Edomu, nyu athu ookhalla mu ellapo ya Uzi. Nyuttho kapu a ddoohoosa eneerewuuphiyerani, muneerolezela ophiyera orulla ddoowara.

²² Nyu anamwani aatthiyana, Ziyoni, ollakiwa wa machimwaanyu woomalla, Apwiya kheyoonjerera okaporwaanyu. Koma nyu athu a o Edomu, Apwiya eneerewuullakani ekaamba ya machimwaanyu, eneerewoonihella vaweella ddoonanara ddanyu.